ەلىمىزدە ورىن العان قايعىلى وقيعا بيزنەسكە دە كەرى اسەرىن تيگىزدى. جىل باسىندا ورىن العان تارتىپسىزدىكتەر بارىسىندا بيزنەس زارداپ شەكتى. «اتامەكەن» ۇكپ-نىڭ ەسەپتەۋى بويىنشا بۇگىنگى تاڭدا بيزنەسكە كەلتىرىلگەن زالال شامامەن 104 ملرد تەڭگەنى قۇرادى. ەڭ كوپ زارداپ شەككەن الماتى قالاسىنداعى بيزنەس سۋبەكتىلەرى – 102,2 ملرد تەڭگە.
مەملەكەت باسشىسى قاسىم-جومارت توقاەۆ كاسىپكەرلىكتى دامىتۋ جانە قولداۋ جونىندە بىرقاتار تاپسىرما بەردى. قازىرگى ۋاقىتتا ءبىز وسى باعىتتا جۇمىس ىستەپ جاتىرمىز.
مەنىڭ ويىمشا, كاسىپكەرلىك سالاسىنداعى رەتتەۋشىلىك ساياسات تۋرالى زاڭنىڭ الەۋەتىن ىسكە اسىرۋدى باتىل باستاۋ كەرەك. مەملەكەتتىك قولداۋ شارالارىن ۇسىنۋ راسىمدەرىن تۇبەگەيلى قايتا قاراۋ قاجەت. بۇل اشىق جانە تۇسىنىكتى مەحانيزمدەر بولۋى ءتيىس. وڭىرلەردە شاعىن جانە ورتا بيزنەستى دامىتۋعا ەرەكشە نازار اۋدارعان ءجون. بۇل – تۇراقتى جۇمىس ورىندارىن قۇرۋ شارتتارىنىڭ ءبىرى. مەملەكەت باسشىسىنىڭ تاپسىرماسى بويىنشا جەكە ءىسىن دامىتۋعا ارنالعان گرانت مولشەرى 200-دەن 400 اەك-كە دەيىن (612,6 مىڭنان 1,2 ملن تەڭگەگە دەيىن) ۇلعايتىلادى, سونداي-اق قارجىلاندىرۋدى قاجەت ەتەتىن بيزنەس-جوبالاردىڭ اتاۋلىلىعىن جانە باعالانۋىن كۇشەيتۋ بويىنشا شارالار كەشەنى قابىلداناتىن بولادى.
رۋستام ءجۇرسىنوۆ,
قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل