تاعدىردىڭ سان تاراۋ جولىندا توسىننان كەزدەسىپ, تۋىستاي جاقىن, اعايىنداي ەتەنە بولىپ كەتەتىن ادامدار بولادى. كوكشەتاۋدان كوشىپ كەلگەندە تالعاردان جولىقتىرعان, سوڭعى شيرەك عاسىردا ارالاس-قۇرالاس جۇرگەن ابزالداردىڭ ءبىرى – وتان دوسبالاەۆ اعامىز ەدى. اتتەڭ, وتكەن جىلدىڭ ناۋرىزىندا, الپىستىڭ سەگىزىنەن اتتار تۇسىندا كوز جازىپ, وكىنىشتە قالدىق.
بالۋان دەنەلى, باتىر تۇلعالى, ەر مىنەزدى, دالاداي دارقان كوڭىلدى وتان وتاعاسى جاقسىلىققا جانى قۇشتار, رياسىز جان بولاتىن. شەشەمىز قايتىس بولعاندا ءالى تانىسىپ-بىلىسپەي جاتىپ-اق قول ۇشىن سوزعان قامقورشىلدىعىن مەن دە استە ۇمىتپاق ەمەسپىن.
ءبىزدىڭ كوشەدە تويلار دا ءجيى بولىپ تۇرادى. سوندايدا كورشى-كولەمنىڭ كوزگە تۇسەر كورنەكتىسى, الدىمەن ءسوز بەرەر قۇرمەتتىسى دە وسى وتان اعا-تىن. ءيا, اعامىز ويى دا, بويى دا كەلىسكەن جىگىتتىڭ سويىنان ەدى دەسەك, سول دۇرىس. سوناۋ 60-جىلدارداعى جەنپي-ءدىڭ تاربيە-ءتالىمىن العان ءنازيپا جەڭگەمىزدىڭ دە جارقىلداپ جارقىن كۇلۋدەن جازعانىن كورگەن ەمەسپىز. جاراستى جۇپتاردىڭ ۇيىنەن قويىن قۇرتتاپ, ايرانىن ۇرتتاعان قۇت-بەرەكە دە ۇزىلمەدى.
كەيىن جاتا-جاستانا بىلدىك قوي. وتان اعا كيەلى وتىراردىڭ تۋماسى ەكەن. الماتىدان جوعارى ءبىلىمدى زووتەحنيك ماماندىعىن العاننان كەيىن قاسيەتتى تۇركىستاندا, ءبىرقاتار كولحوز-سوۆحوزداردا ابىرويلى ەڭبەك ەتكەن. ودان 1984 جىلى اسقار الاتاۋ ەتەگىندەگى تالعار شاھارىنا قونىس اۋدارىپ, وسىنداعى اتاقتى مال بورداقىلاۋ شارۋاشىلىعىندا تابانى كۇرەكتەي 15 جىل اعا زووتەحنيك بولدى.
كۋرستاس دوسىم, «حابار» ارناسىنداعى تانىمال تەلەجۋرناليست تىلەۋقابىل مىڭجاسار ۇلى وتان اعامەن كورشى ەكەنىمدى ەستي سالا كوزى ك ۇلىمدەپ, ول كىسى جايلى ادەمى ءبىر اڭگىمەلەردىڭ تيەگىن اعىتتى دەرسىز. دەرەۋ اعاعا سالەم بەرۋگە اسىقتى. ول دا تۇركىستاننىڭ تۋماسى عوي. وتان اعا, ءنازيپا جەڭگەي ءوزىمىزدىڭ ايگىلى سىقاقشى كوپەن امىربەك, بىلگىر ادەبيەتشى قۇلبەك ەرگوبەكتەردى دە جاقسى بىلەتىن بولىپ شىقتى. ايتايىن دەگەنىم, وتان اعا بويى عانا ەمەس, وي-ءورىسى, پاراساتى, مادەنيەتى دە بيىك تۇلعا ەدى.
«جىگىتتى جولداسىنا قاراپ تانى» دەيدى عوي دانا حالقىمىز. وتان اعانىڭ ۇزەڭگىلەس دوس-جولداستارى ايتۋلى ازاماتتار. اتاپ ايتساق, ولاردىڭ قاتارىندا پارلامەنت ءماجىلىسىنىڭ دەپۋتاتى شالاتاي مىرزاحمەتوۆ, سەناتور قۋانىش ايتاحانوۆتار دا بار.
انا ءبىر جىلدارى ءاسانالى ءاشىموۆ تۇركىستاننىڭ كوشەسىندە وتان اعانى كەزدەيسوق ۇشىراتىپ قالىپ: «مىناۋ ءبىر تۇلعاسى كەلىسكەن, كينوعا تۇسىرگەندەي جىگىت ەكەن-اۋ!» دەپ قىزىعا تانىسقان ەكەن. سول تانىستىقتىڭ اياعى دوستىققا ۇلاسادى.
مىنە, ءبىزدىڭ وتان اعامىز وسىنداي جالپاق جۇرتقا جاقسىلىعى تانىلعان جايساڭ جان ەدى. جولداس-جورالارىنىڭ بالالارى «ءبىزدىڭ وتانىمىز – قازاقستان» دەگەن قاعيدالى ءتامسىلدى نەگىزگە الىپ, ول كىسىنى «قازاقستان اعا» دەپ اتاپ كەتكەنى جانە بار. ءوزى وتسە دە, ومىردە ونەگەلى ورنەگى, ىزگىلىكتى ءىزى قالدى. پەرزەنتتەرىنىڭ ءبارى قوعامدا كەتىگىن تاۋىپ, ءبىر-ءبىر كىرپىش بولىپ قالانعان. ءنازيپا جەڭگەمىز وتان دەپ ويانىپ, وتان دەپ باس قويادى ۇيقىعا. دۇعاسىنان قالدىرمايدى. وتان اعانىڭ جارقىن بەينەسىن تالعارداعى ءبىزدىڭ كوشەنىڭ ادامدارى دا ۇنەمى جادىراي ەسكە الىپ جۇرەدى.
قورعانبەك امانجول,
«ەگەمەن قازاقستان».
الماتى.