استانا ۆوكزالىندا جولاۋشىلارعا كورسەتىلەتىن قىزمەت ساپاسىن ارتتىرىپ, تەمىرجول كولىگىندە زاماناۋي قىزمەت تۇرلەرىن دامىتۋ ماقساتىندا ەلەكتروندى ساتۋ ورتالىعى اشىلدى.
ەلەكتروندى ساتۋ ورتالىعى حالىققا قولما-قول نەمەسە ەلەكتروندى اقشا جانە اۆتوماتتاندىرىلعان قىزمەت كورسەتۋ كاسسالارى ارقىلى بيلەت ساتۋدىڭ جاڭا ءادىسىن ۇسىنادى. سونداي-اق, وندا جولاۋشىلار اقپاراتتىق تاقتا ارقىلى پويىزدار كەستەسى مەن بوس ورىندار تۋرالى اقپارات الىپ, كەڭەسشىلەردىڭ كومەگىنە جۇگىنە الادى. جولاۋشىلارعا ارناپ زالعا جايلى ورىندىقتار قويىلعان. بەينەمونيتور ورناتىلىپ, اۋا باپتايتىن جانە جىلىتاتىن اۆتونومدى جۇيە قىزمەت كورسەتەدى. جاڭا قىزمەتتىڭ ىسكە قوسىلۋى كاسسالارداعى كەزەكتى ازايتىپ, جولاۋشىلاردىڭ بيلەت ساتىپ الۋىن بارىنشا وڭايلاتادى دەگەن ءۇمىت بار.
ەلباسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا ەلىمىزدىڭ ەڭ دامىعان 30 مەملەكەتتىڭ قاتارىنا ەنۋى باستى باعىت رەتىندە ايقىندالىپ, وعان قول جەتكىزۋدىڭ ناقتى تەتىكتەرى بەكىتىلگەن. ەلەكتروندى ساتۋ ورتالىعى تەمىرجولشىلاردىڭ جولداۋ مىندەتتەرىن ورىنداپ جاتقانىن ايقىن كورسەتەدى. ناقتىراق ايتقاندا, لوگيستيكالىق قىزمەت اۋقىمىن كەڭەيتۋ, ماگيسترالدار ينفراقۇرىلىمىن دامىتۋ, جولاۋشىلار تاسىمالى ۇدەرىسى مەن قىزمەت كورسەتۋ باعىتىندا زاماناۋي تەحنولوگيالاردى ەنگىزۋ ارقىلى كولىك جۇيەسىن دامىتۋ باستى نازاردا.
اتالعان ارنايى بيلەت ساتۋ زالىندا 16 ەلەكتروندى بيلەت كاسساسى ورناتىلعان. وعان قوسىمشا كادۋىلگى ون كاسسا حالىققا قىزمەت كورسەتەدى. «ءبىزدىڭ بۇل تەحنولوگيانى ەنگىزۋدەگى ماقساتىمىز – جولاۋشىلاردىڭ تەز ءارى جايلى جاعدايدا بيلەت ساتىپ الۋىن قامتاماسىز ەتۋ», دەدى ەلەكتروندى ساتۋ زالىنىڭ اشىلۋ سالتاناتىندا «جولاۋشىلار تاسىمالى» اق پرەزيدەنتى ەرمەك تولەگەنوۆ. وسىنداي ون كاسسا الماتىدا اشىلادى ەكەن.
ەلەكتروندى ساتۋ ورتالىعىن اشۋ تەمىرجول كولىگى جولاۋشىلارىنا قىزمەت كورسەتۋدىڭ جاڭا ءبىر باستاماسى ىسپەتتەس. «قازاقستان تەمىر جولى» ۇك» اق پەن ونىڭ ەنشىلەس كاسىپورنى «جولاۋشىلار تاسىمالى» اق 2014 جىلى ەلەكتروندى-ساندىق پىشىندە ينتەرنەت-رەسۋرس ارقىلى بيلەتتەردى رەسىمدەۋ تەحنولوگياسىن ەنگىزۋ جانە جولاۋشىلاردى ارنايى ەسەپ قۇرىلعىلارى ارقىلى تىركەپ, پويىزدارعا وتىرعىزۋ ءادىسىن تولىقتاي ەنگىزۋدى جوسپارلاپ وتىر.
نۇرباي ەلمۇراتوۆ,
«ەگەمەن قازاقستان».