كوكشەتاۋ قۇرىلىس الاڭىنا اينالماق

بۇل جونىندە جەرگىلىكتى اكىمدەردىڭ العاشقى بريفينگىندە مالىمدەلدى

«اقمولا مەديا-ورتالىعىنىڭ» ءباسپاسوز كلۋبىندا كوكشەتاۋ قالاسىنىڭ اكىمى جارقىن جۇماعۇلوۆ بريفينگ وتكىزدى. بۇل ءىس-شارا وبلىس تۇرعىندارىنا جەرگىلىكتى اتقارۋشى ورگاندارىنىڭ جۇمىسى تۋرالى اقپارات بەرۋ ءۇشىن العاش رەت ۇيىمداستىرىلىپ وتىر. بريفينگتە ج.جۇماعۇلوۆ كوكشەتاۋ قالاسىنىڭ وتكەن ەكى ايداعى الەۋمەتتىك-ەكونوميكالىق دامۋى تۋرالى حابارلاپ, الداعى جۇمىستار بارىسىمەن تانىستىردى. اتاپ ايتقاندا, ونەركاسىپ ونىمدەرىنىڭ كولەمى 8,9 ميلليارد تەڭگەنى قۇراپ, بىلتىرعى سايكەس مەرزىمدەگىدەن ارتىپ تۇسەدى دەپ كۇتىلۋدە. بيىل ايماقتىق يندۋستريالاندىرۋ كارتاسى اياسىندا 8 ميلليارد تەڭگەنىڭ بەس ينۆەستيتسيالىق جوباسى جۇزەگە اسىرىلىپ, 1500 ادام جاڭا جۇمىس ورىندارىمەن قامتاماسىز ەتىلمەك. قاڭتار ايىندا عانا شاعىن بيزنەستى دامىتۋ ناتيجەسىندە 60 ادام جۇمىسقا ورنالاستىرىلعان. قالا بيۋدجەتى الەۋمەتتىك سالانى مەيلىنشە قولدايتىن بولادى. قازىرگى كۇنى قالالىقتار­­­­دىڭ ورتاشا ايلىق جالاقىسى 90 مىڭ تەڭگەدەن اسىپ وتىر. بيىل ءوزىنىڭ 190 جىلدىق مەرەيتويىن اتاپ وتەتىن كوكشەتاۋ كەڭ كولەمدەگى قۇرىلىس الاڭىنا اينالماق. قازىر «تۇرعىن ءۇي قۇرىلىس جيناق بانكى» جۇيەسىمەن ۆاسيلكوۆ شاعىن اۋدانىنىڭ سولتۇستىك بولىگىندە 14 ءۇيدىڭ قۇرىلىسى باستالدى. تۇرعىندار قارجىسى ەسەبىنەن 5,7 مىڭ شارشى مەتر جايلى پاتەر پايدالانۋعا بەرىلمەك. ال, بيىلعى قاڭتار ايىنىڭ قورىتىندىسىمەن 2,7 مىڭ شارشى مەترلىك 20 ۇيدە قونىس تويى وتكىزىلگەن. بۇل بىلتىرعى سايكەس مەرزىمدەگىدەن اناعۇرلىم كوپ. سونداي-اق, تۇرعىن ءۇي-كوممۋنالدىق شارۋاشىلىقتى جاڭعىرتۋ باعدارلاماسىمەن 19 كوپ قاباتتى ءۇي كۇردەلى جوندەۋدەن وتكىزىلەدى دەپ جوسپارلانۋدا. اتالعان جۇمىستارعا 400 ميلليون تەڭگە قارجى جۇمسالادى. باقبەرگەن امالبەك, «ەگەمەن قازاقستان». كوكشەتاۋ.