باتىس قازاقستان عىلىمي-زەرتتەۋ ينستيتۋتى وتكەن جىلدىڭ قورىتىندىسى بويىنشا ينتەگراتسيالىق بايلانىستار شەڭبەرىندەگى مەملەكەتتەر اراسىندا ۇزدىك كاسىپورىن اتاندى. ويتكەنى, اتالمىش ۇجىمعا «سالا كوشباسشىسى-2013» قۇرمەتتى اتاعى مەن ۇلتتىق دارەجەدەگى سەرتيفيكاتتى ۇسىنۋشى تەك قازاقستان عانا ەمەس, سونىمەن بىرگە, ونىڭ قۇرامىنا رەسەي, ۋكراينا جانە بەلارۋس رەسپۋبليكاسى ۇلتتىق بيزنەس رەيتينگتەر وداعى كىرەدى.
تمد اۋماعى مەن كەدەن وداعى كولەمىندە ىقپالى مول, تانىمدىلىعى جوعارى رەيتينگتىك كومپانيا باتىس قازاقستان عىلىمي-زەرتتەۋ ينستيتۋتىنىڭ ايماقتاعى شاعىن كاسىپورىندار اراسىندا نارىق كونيۋكتۋراسىن جان-جاقتى ءارى تەرەڭ تالداعان زەرتتەۋ ەڭبەكتەرىن جوعارى باعالاپ وتىر.
– ءبىزدىڭ ينستيتۋتتىڭ باستى ماقساتى – قوعامدىق وي-پىكىرلەردى ەلەپ-ەكشەپ, سۇزگىدەن وتكىزىپ زەرتتەۋ ارقىلى الەۋمەتتىك جوبالار مەن ىرگەلى عىلىمي ىزدەنىستەردى جۇزەگە اسىرۋ. البەتتە قوعامدىق كوزقاراس كوپ جاعدايلاردا اداستىرا بەرمەيدى. دۇرىس جول كورسەتەدى. حالىقارالىق ساراپشىلار تاراپىنان ۇسىنىلىپ وتىرعان بۇل ماراپات ەڭبەگىمىزگە بەرىلگەن ءادىل باعا دەپ ەسەپتەيمىن, –دەيدى ينستيتۋت جەتەكشىسى ۇمبەتقالي جاڭابەكوۆ.
حالىقارالىق رەيتينگتىك باعالاۋ ۇردىستەرى بويىنشا جوعارى تابىستارعا جەتكەن قازاقستاندىق كاسىپورىنداردىڭ قاتارىن تولىقتىرعان ۇجىمنىڭ العا قويىپ وتىرعان ءىس-جوسپارلارى بۇدان دا اۋقىمدى. سونداي-اق, ينستيتۋتتىڭ اتاۋى حالىقارالىق انىقتامالىقتاردان ورىن الىپ «كەدەن وداعى جارشىسى» كاتالوگىنە كىرۋى دە ۇجىم قىزمەتكەرلەرىنىڭ بىلىكتىلىگى مەن كاسىبي دەڭگەيلەرىنىڭ بيىكتىگىن تانىتا الادى. ءيا, الەمدىك قاۋىمداستىقتا كەز كەلگەن مەملەكەتتىك الەۋمەتتىك-ەكونوميكالىق دامۋ كورسەتكىشتەرى وسىنداي وزىق كومپانيالاردىڭ ساپالىق دەڭگەيىمەن ايقىندالارى انىق.
تەمىر قۇسايىن,
«ەگەمەن قازاقستان».
ورال.