مەملەكەت باسشىسى قاسىم-جومارت توقاەۆ ەۋروپالىق كەڭەستىڭ پرەزيدەنتى شارل ميشەلمەن بەينەبايلانىس رەجيمىندە ەكىجاقتى كەلىسسوز جۇرگىزدى, دەپ حابارلايدى Egemen.kz اقورداعا سىلتەمە جاساپ.
ۆيرتۋالدى كەزدەسۋ ەۋروپالىق تاراپتىڭ باستاماسىمەن ءوتتى.
ءوزارا دوستىق پەن سەنىمگە نەگىزدەلگەن اڭگىمەلەسۋ بارىسىندا تاراپتار قازاقستانداعى قازىرگى ىشكى ساياسي احۋالدى جانە قازاقستان مەن ەۋروپالىق وداق اراسىنداعى ستراتەگيالىق سەرىكتەستىكتىڭ دامۋ پەرسپەكتيۆالارىن تالقىلادى.
شارل ميشەلدىڭ ءوتىنىشى بويىنشا قاسىم-جومارت توقاەۆ ەلىمىزدەگى قازىرگى وقيعالاردىڭ سەبەپتەرى مەن قابىلدانىپ جاتقان مەملەكەتتىك شارالار جونىندە مالىمەت بەردى. پرەزيدەنت كونستيتۋتسيالىق قۇرىلىسقا نۇقسان كەلتىرىپ, مەملەكەتتىك توڭكەرىس جاساۋعا ۇمتىلعان تەرروريستەر مەن بۇزاقىلاردىڭ زورلىق-زومبىلىق ارەكەتتەرى تۋرالى ايتتى.
پرەزيدەنت بولعان قايعىلى وقيعالاردى اسا اۋىر اگرەسسيالىق اكت جانە مەملەكەتتىلىگىمىزگە جاسالعان قاستاندىق دەپ اتادى. سونداي-اق لاڭكەستەردىڭ زورلىق ارەكەتتەرى سالدارىنان كوپتەگەن قۇقىق قورعاۋ قىزمەتكەرىلەرى مەن بەيبىت تۇرعىنداردىڭ قۇربان بولعانىن, 1300-گە جۋىق كاسىپكەرلىك نىسانعا زالال كەلگەنىن, 100-دەن استام ساۋدا ورتالىعى مەن بانكتەردىڭ تونالعانىن, 500-گە جۋىق پوليتسيا ماشيناسى ورتەنگەنىن ايتتى. قاسىم-جومارت توقاەۆتىڭ باعالاۋىنشا, مەملەكەتتىڭ الدىن الا ەكونوميكالىق شىعىنى 2-3 ميلليارد اقش دوللارىن قۇرايدى.
– مۇنىڭ تەررورلىق شابۋىل ەكەنىنە ەشقانداي كۇمانىم جوق. بۇل – قازاقستانعا قارسى جاقسى ۇيىمداسقان, ابدەن دايىندالعان اگرەسسيالىق اكت. شابۋىل جاساعانداردىڭ ىشىندە باسىم كوپشىلىگى ورتالىق ازيا ەلدەرىنەن, ونىڭ ىشىندە اۋعانستاننان كەلگەن شەتەلدىك سودىرلار بار. سونىمەن قاتار اراسىندا تاياۋ شىعىستان كەلگەن سودىرلار دا بار. ولاردىڭ پيعىلى ءبىزدىڭ اۋماقتى باقىلاۋدا ۇستايتىن حاوس ايماعىنا اينالدىرۋ, سودان كەيىن بيلىكتى باسىپ الۋ بولدى. سوندىقتان قازاقستاندا لاڭكەستىككە قارسى وپەراتسيا باستالدى, – دەدى مەملەكەت باسشىسى.
قاسىم-جومارت توقاەۆ ەل اۋماعىنا ۇقشۇ-نىڭ بىتىمگەرلىك كۇشتەرى قۇرامىنىڭ ورنالاستىرىلۋى جونىندە ناقتى تۇسىندىرمە جاسادى.
– بىتىمگەرلىك كۇشتەرى اسكەري وپەراتسيالارعا قاتىسپايتىنىن اشىپ ايتقىم كەلەدى. ولاردىڭ نەگىزگى مىندەتى – الماتى قالاسى مەن قازاقستان استاناسىنداعى ستراتەگيالىق نىسانداردى قورعاۋ. بۇل قازاقستاندىق كۇشتىك قۇرىلىمداردىڭ لاڭكەستەرگە قارسى ءىس-قيمىلدارىن جۇزەگە اسىرۋىنا مۇمكىندىك بەرەدى. ۇقشۇ-نىڭ بىتىمگەرلىك كۇشتەرى ۇقشۇ ۇجىمدىق قاۋىپسىزدىك تۋرالى شارتتىڭ 2-ءشى جانە 4-ءشى باپتارىنا سايكەس ورنالاستىرىلدى. ولار قازاقستانداعى جاعداي تولىق تۇراقتانعانشا بولادى, – دەدى قازاقستان پرەزيدەنتى.
مەملەكەت باسشىسى قازاقستان ءوزىنىڭ حالىقارالىق مىندەتتەمەلەرىن ساقتاۋعا بەيىل ەكەنىن اتاپ ءوتىپ, ەۋروپالىق وداقتىڭ ينستيتۋتتارىمەن جانە وعان مۇشە مەملەكەتتەرمەن اراداعى ىنتىماقتاستىقتى ودان ءارى دامىتۋعا دايىندىعىن ناقتىلادى.
قاسىم-جومارت توقاەۆتىڭ مالىمەتىن مۇقيات تىڭداعان شارل ميشەل ەلىمىزدەگى سوڭعى وقيعالار تۋرالى ەگجەي-تەگجەيلى بىلۋگە مۇمكىندىك بەرگەن وسى ۆيرتۋالدى كەزدەسۋدىڭ زور پايداسى بولعانىن ايتتى. ول قازاقستانداعى وقيعالارعا قاتىستى ءارتۇرلى تۇسىندىرمەلەردەن گورى وسىلاي شىنايى اقپارات الۋدىڭ ماڭىزدى ەكەنىنە توقتالدى.
– ءبىز ءسىزدىڭ ەلىڭىزدىڭ ەگەمەندىگى مەن اۋماقتىق تۇتاستىعىن قولدايمىز. قازاقستانمەن اراداعى ىنتىماقتاستىقتى ودان ءارى نىعايتۋعا دايىنبىز, – دەدى ەۋروپالىق كەڭەستىڭ پرەزيدەنتى.
كەلىسسوز قورىتىندىسى بويىنشا تاراپتار سىرتقى قۇرىلىمدار دەڭگەيىندە تۇراقتى بايلانىس جاساپ تۇرۋعا ۋاعدالاستى.