كەشە ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى, گەنەرال-لەيتەنانت نۇرلان جولامانوۆ شەكارا اسكەرلەرى قولباسشىلارى كەڭەسى ۇيلەستىرۋ قىزمەتىنىڭ توراعاسى, گەنەرال-پولكوۆنيك الەكساندر مانيلوۆپەن كەزدەستى.
شەكارا باسشىسى وسىنداي كەزدەسۋلەردىڭ تمد شەڭبەرىندەگى شەكارالىق ۆەدومستۆولاردىڭ ءوزارا قارىم-قاتىناسىنا جوعارى ىقپال ەتەتىندىگىن اتاپ ءوتتى جانە شەكارالىق ىنتىماقتاستىقتىڭ بارىسى تۋرالى ۇيلەستىرۋ كەڭەسىنىڭ وكىلدەرىنە اڭگىمەلەپ بەردى.
– قازىرگى ۋاقىتتا ءبىز قر ۇقك شەكارا قىزمەتىن ساپالىلىق پارامەترلەرى بويىنشا دامىتۋدى جالعاستىرۋدامىز, – دەپ اتاپ ءوتتى گەنەرال-لەيتەنانت نۇرلان جولامانوۆ, – مەملەكەت باسشىسى العا قويعان تاپسىرمالاردى جۇزەگە اسىرۋدامىز, ارينە, ارىپتەستەردىڭ كومەگىنسىز, الدىڭعى قاتارلى تاجىريبەلەردى زەرتتەمەي ولاردى اتقارۋ مۇمكىن ەمەس.
تاراپتار الدا كەلە جاتقان شەكارا اسكەرلەرى قولباسشىلارى كەڭەسىنىڭ ۇيلەستىرۋ قىزمەتىنىڭ 71-ءماجىلىسىن (ماۋسىم ايىندا كيشينەۆتە وتكىزۋ جوسپارلانۋدا) جانە تمد-عا قاتىسۋشى مەملەكەتتەردىڭ ورتالىق ازيا ايماعى شەكارا ۆەدومستۆولارىنىڭ باسشىلارىنىڭ 4-ايماقتىق كەڭەسىنىڭ (ماۋسىمدا ماسكەۋدە وتكىزۋ جوسپارلانۋدا) ماسەلەلەرىن تالقىلادى. تمد-عا قاتىسۋشى مەملەكەتتەردىڭ ورتالىق ازيا ايماعى شەكاراسىنان تىس جەردە بولىپ جاتقان جاعدايلار بويىنشا سىندارلى پىكىر الماسىلدى, سونداي-اق ونىڭ «فاكتور 2014» دەگەن شارتتى اتاۋى بويىنشا دامۋ جولدارى تالداندى.
اتالعان كەزدەسۋ شەكارا اسكەرلەرى قولباسشىلارى كەڭەسى ۇيلەستىرۋ قىزمەتىنىڭ جۇمىس جوسپارىنا سايكەس وتكىزىلدى, كەزدەسۋ سوڭىندا تاراپتار بىرلەسە جۇمىس ىستەۋ سەنىمدىلىك پەن ءوزارا تيىمدىلىكتى ارتتىرا بەرەتىندىگىنە نەگىز قالايتىندىعىن اتاپ ءوتتى, دەپ حابارلادى ۇقك شق ءباسپاسوز قىزمەتى.