جەتىستىكتىڭ جولىن ەڭبەكسۇيگىشتىك اشاتىنىن اناسى تۇرسىناي جانتاعۇلوۆا وسيەت ەتىپ ايتىپ قانا قويماي, ساناسىنا ابدەن سىڭىرگەندىكتەن بولار تالدىقورعاندىق كاسىپكەر كەلىنشەك ريمما سالىقوۆا قانداي جۇمىس باستاسا دا ەت جۇرەگىنەن وتكىزىپ, بەرىلە ىستەۋگە ادەتتەنگەن. بۇل ەكىنىڭ ءبىرىنىڭ ماڭدايىنا جازىلماعان ءھام قولىنان كەلە بەرمەيتىن وڭ قادام.
ءيا, ريمما سالىقوۆا باسقاراتىن «الماتى بوياۋلارى» جشس بۇگىندە قازاقستان رەسپۋبليكاسى اۋماعىندا كەڭىنەن تانىلعان فيرما. زاۋىت 2013 جىلى 1200 توننا الۋان ءتۇرلى جىلتىر بوياۋ ماتەريالدارىن شىعاردى. ونىڭ قاتارىندا كۇرەجول ەرەجەسىنە ساي ەسكەرتۋ, تىيىم سالۋ بەلگىلەرىن بويايتىن «اك-500» ەمالىنىڭ 600 تونناسى, جول بەلگىسىن بەدەرلەپ ايقىندايتىن «تر-اك» تەرماپلاستيكتىڭ 400 تونناسى جانە 200 توننا قۇرىلىس, 300 توننادان استام قاشىقتىقتان جالتىراپ كورىنەتىن اينەك ىسپەتتى جول بەلگىلەرىنىڭ بوياۋلارى بار. مىنە, وسى ماتەريالدار بۇل كۇندەرى ەلىمىزدە ۇلكەن سۇرانىسقا يە بولىپ وتىر. اعىمداعى جىلى سول ءۇردىس وزىندىك جالعاسىن تابۋى ءۇشىن زاۋىتتا تالاپقا ساي قوندىرعىلار ورناتىلىپ, ءتۇرلى كولەمدەگى تاپسىرىستاردى وتەۋ جالعاسۋدا. بۇل ماتەريالداردىڭ ءبارى زاۋىت زەرتحاناسىندا تەكسەرىلىپ, تاجىريبەدەن وتكىزىلىپ بارىپ رىنوكقا شىعارىلۋدا. سونداي-اق, اۋا رايىنىڭ قۇبىلىستارىنا توتەپ بەرە الاتىن, ياعني ءوشىپ قالمايتىن ءتوزىمدى ءھام ساپالى ونىمدەردى مولىنان شىعارۋ ءۇشىن قۋاتتىلىعى 5000 توننا «لكم» جانە 6000 توننا تەرموپلاستيك ورناتىلعان. تاعى ءبىر ايتا كەتەر جايت, بۇل ءوندىرىس ورنى «جول كارتاسى-2020» مەملەكەتتىك باعدارلاماسىنا ەنگەن. تۇرعىلىقتى حالىقتان قۇرالعان قاتارداعى جۇمىسكەرلەر مەن مامانداردىڭ بىلمەگەنىن ۇيرەتىپ, تاجىريبە الماسىپ, ساناتتارىن ءوسىرۋ ءۇشىن شەتەلدىك ماماندار دا زاۋىتقا تارتىلعان. ناتيجەسىندە جەرگىلىكتى ماماندار جىلتىر بوياۋدىڭ قاي ءتۇرىن بولسىن شىعارۋدى مەڭگەرىپ العان. زاۋىتتا 7 ادامنان قۇرالعان 5 ءتۇرلى تەحنيكالارى بار ەكى بريگادا جاساقتالىپ, جۇمىس ىستەۋدە.
«ەلىمىزدە وتاندىق ءونىم ءوندىرۋشىلەرگە ىشكى جالپى ءونىمنىڭ ەنشىسىن 50 پايىزعا جەتكىزۋ ءۇشىن بىرقاتار تالاپ قويىلعانى ءمالىم. بۇل مىندەتتەن شاعىن جانە ورتا بيزنەس وكىلدەرى دە شەت قالمايتىنى بەلگىلى. سوندىقتان مەن باسقاراتىن «الماتى بوياۋلارى» جشس وتباسىلىق بيزنەستىڭ دە تيىمدىلىگىن دالەلدەپ, ءونىمىن ارتتىرۋدا. بۇگىندە بۇل كومپانيادا 65 ادام جۇمىس ىستەيدى. جەكە الەۋمەتتىك باعدارلامامىزدى جۇزەگە اسىرۋدامىز. قاتارداعى جانە اسا ءىرى بيزنەستە وتباسىلىق مۇددە ءۇشىن بىرلەسە اتقاراتىن جۇمىستى جۇزەگە اسىرۋ داستۇرگە اينالعان. مىسالى, مەنىڭ بالالارىم ءمادي مەن ساكەن الۋان ءتۇرلى جىلتىر ماتەريالداردى, ونىڭ ىشىندە اۆتوكولىك جولدارىنداعى بەلگىلەرگە قاجەت بوياۋلاردى ءوندىرۋ بويىنشا ارىپتەسىمە اينالدى. سونىمەن قاتار, ساكەن سامبو بويىنشا رەسپۋبليكالىق فەدەراتسيانىڭ پرەزيدەنتى», دەدى كاسىپكەر كەلىنشەك ريمما سالىقوۆا اعىنان جارىلىپ. بۇدان تۇيگەنىمىز: «ۇيادا نە كورسەڭ ۇشقاندا سونى ىلەسىڭ» دەگەن قازاقى دانالىق بولدى.
«الماتى بوياۋلارى» جشس-ءنىڭ بارلىق ونىمدەرى قاجەتتى CT-KZ سەرتيفيكاتىن العان. زاۋىتتىڭ وندىرىستىك قۋاتتىلىعى جىلىنا 20000 توننا بوياۋ شىعارۋ. جالپى, ست رك يسو 9001-2009 تالابىنا سايكەس كەلەدى. ءۇش جىلدان بەرى ءۇزىلىسسىز جۇمىس ىستەپ كەلە جاتقان كاسىپورىن جىل سايىن 1000 توننا ونىمدەرىن ەكسپورتقا شىعارادى. 2001 جىلى رەسەي فەدەراتسياسىندا قۇرىلعان فيليالى «الماتى بوياۋلارى» ونىمدەرىن شىعىس ءسىبىر, حاباروۆ جانە التاي ولكەلەرىنە تاراتادى. استانا قالاسىنداعى فيليال قارقىنى دا جامان ەمەس.
قورىتا ايتقاندا, ارقانداي ءىستىڭ كوزىن تاۋىپ, جۇرەك قالاۋىمەن تاڭداعان جۇمىسىڭىزدى بەرىلە ىستەپ, جەتىستىككە جەتۋ ءبىر باقىت قوي. سول جەتىستىك ورىندى باعاسىن الىپ جاتسا قانداي عانيبەت. ايەل الەمىنىڭ ءبىر ارتىقشىلىعى ارقاشان ۇقىپتىلىعىمەن, تاباندىلىعىمەن, تياناقتىلىعىمەن, بار ىنتاسىمەن ەرتەڭگى ەڭبەكتىڭ نەگىزىن بۇگىن قالاي الاتىندىعىندا, ناقتىلاي تۇسسەك ەكىنىڭ ءبىرى ەسكەرە بەرمەيتىن جۇمىستىڭ كوزىن تاۋىپ, سودان وڭ ءناتيجە شىعارۋىندا جاتىر. تالدىقورعاندىق كاسىپكەر كەلىنشەك ريمما سالىقوۆانىڭ قادامى سونىڭ ءبىر دالەلى دەپ بىلەمىز.
نۇربول الدىباەۆ,
«ەگەمەن قازاقستان».
الماتى وبلىسى.