«ەلدە جاريالانعان كومەندانتتىق ساعات رەجيمىنە قاراماستان ءتۇن ىشىندە جۇمىس ىستەگەن ورال قالاسىنداعى ەل-پلازا بارىنىڭ يەلەرى تۇتقىندالدى. تاعى ءبىر كولىكتەن گراناتا تابىلدى» دەپ حابارلادى باتىس قازاقستان وبلىستىق پوليتسيا دەپارتامەنتى.
8 جەلتوقسان كۇنى تۇنگى ساعان 02.45. كەزىندە ەل پلازا بارىندا ءبىر توپ ادام ويىن-ساۋىقتى قىزدىرىپ جاتقانى بەلگىلى بولعان. پوليتسيا قىزمەتكەرلەرى وقيعا ورنىنان 19 ادامدى تۇتقىندادى, اراسىندا كامەلەتكە تولماعاندار دا بار. پوليتسيانىڭ ايتۋىنشا, ۇستالعانداردىڭ كەيبىرى الكوگولدىك ىشىمدىككە ماس بولعان. ولاردىڭ ءبارى پوليتسيا بولىمىنە جەتكىزىلگەن. سونداي-اق ءتارتىپ بۇزعان كافە-باردىڭ قوجايىنى مەن قىزمەتكەرلەرى دە تۇتقىندالعان.
ءتارتىپ بۇزۋشىلارعا 10 اەك كولەمىندە ايىپپۇل نەمەسە 15 كۇنگە دەيىن قاماۋ جازاسى تاعايىندالۋى مۇمكىن.
ءدال وسى 8 جەلتوقسان كۇنى تاڭعى 03.30. ساعاتتا ورال قالاسىنىڭ ىرگەسىندەگى پودستەپنىي كەنتىندە ورنالاسقان №3 بەكەتتە ارميان ءنومىرلى «تويوتا الفارد» اۆتوكولىگى توقتاتىلدى. جۇرگىزۋشى پوليتسيانىڭ تالابىنا مويىنسۇنباي, كولىگىن تەكسەرۋگە قارسى بولعان, قاشىپ كەتۋگە ارەكەت جاساعان. ءتىنتۋ كەزىندە كولىكتىڭ جۇكسالعىشىنان كوزدەن جاس اعىزاتىن گراناتا, 12 كاليبرلى مىلتىقتىڭ وقتارى, 50 دانا سۋ جاڭا, ءارتۇرلى ماركالى تەلەفون, 6 پلانشەت, 23 سمارت ساعات جانە باسقا دا گادجەتتەر مەن ولارعا قاجەتتى اكسەسسۋارلار تابىلعان. ودان بولەك, جۇكسالعىشتا بىرنەشە سومكەگە سالىنعان كيىم-كەشەك تە بولعان. نازار اۋدارارلىعى, بۇل كيىمدەرگە دۇكەندە سالىناتىن ۇرلىققا قارسى ماگنيتتىك سىرعالارى الىنباعان ەكەن.
قازىر اۆتوكولىك جۇرگىزۋشىسىنە تەرگەۋ ءجۇرىپ جاتىر. اۆتوكولىك ارنايى تۇراققا قويىلعان. پوليتسيانىڭ حابارلاۋىنشا, تۇتقىندالعاندار دەسترۋكتيۆتى ءدىني اعىم مۇشەلەرى.
قر ىشكى ىستەر مينيسترلىگى جەدەل شتابىنىڭ مالىمەتىنشە, ولار الماتىداعى توناۋ اكتىلەرىنە جانە نارازىلىق اكتسيالارىنا قاتىسقان. ۇستالعانداردىڭ سوزىنە قاراعاندا, گراناتا مەن وقتاردى الماتىداعى تانىستارىنان ساتىپ العان. ال سمارتفوندار مەن اكسەۋارلاردى, كيىم كەشەكتەردى دۇكەندەردى توناۋ كەزىندە الىپ كەتكەن