حالىقارالىق كينو كۇنىنە وراي «قازاقفيلم» كينوستۋدياسىنىڭ اۋماعىندا قازاق كينوسىنىڭ كورنەكتى قايراتكەرلەرىنىڭ ەسىمى بەرىلگەن جۇلدىزدار اللەياسىندا ون ءۇش مەموريالدىق ەسكەرتكىشتىڭ سالتاناتتى اشىلۋ ءراسىمى بولدى. سالتاناتتى شارانى ۇلتتىق كينو ونەرىنىڭ مەترلەرى – ءاسانالى ءاشىموۆ پەن ولجاس سۇلەيمەنوۆ اشىپ, ش.ايمانوۆتىڭ ەسكەرتكىشىنە گۇل شوقتارىن قويدى. كەلەسى ءسوز تىزگىنىن العان كينوستۋديا پرەزيدەنتى اقان ساتاەۆ بۇل شارانىڭ الماتى كينوحرونيكا ستۋدياسىنىڭ 80 جىلدىعى مەن حالىقارالىق كينو كۇنىنە ورايلاستىرىلعانىن اتاپ ءوتتى.
– وكىنىشكە قاراي, قازاق كينوسىنىڭ نەگىزىن قالاۋشىلاردىڭ ءبىرازى باقيلىق بولىپ, بۇگىندە ورنى ورتامىزدا ويسىراپ تۇر. ءبىز ولاردىڭ ەسىمىن قۇرمەتتەپ, بولاشاق ۇرپاققا دارىپتەۋىمىز كەرەك. ولاردىڭ ەسىمدەرى جۇلدىز يەلەنىپ جاتقانىنا شىن جۇرەكتەن قۋانىشتىمىن, بارشاڭىزعا زور دەنساۋلىق تىلەيمىن, – دەگەن قازاقستاننىڭ ەڭبەك ەرى, كسرو حالىق ءارتىسى ءاسانالى ءاشىموۆ بارشا كينوگەرلەردى بىرلىككە شاقىردى.
جۇلدىزدار اللەياسى, ەڭ الدىمەن, قازاقستاننىڭ ۇلتتىق مادەنيەتىنە, اسىرەسە, قازاق كينو ونەرىنىڭ وركەندەۋىنە ولشەۋسىز ەڭبەك سىڭىرگەن ولجاس سۇلەيمەنوۆتىڭ ەسىمىمەن تولىقتى. اقىننىڭ شىعارماشىلىق ءومىربايانى كينومەن بىرگە ءورىلدى: «قازاقفيلم» كينوستۋدياسىنىڭ باس رەداكتورى, قازاق كسر مەملەكەتتىك كينوسىنىڭ توراعاسى قىزمەتىن اتقاردى. قازاق كينوسىنىڭ التىن قورىنا ەنگەن ش.ايمانوۆتىڭ «اتامەكەن» ءفيلمى ولجاس سۇلەيمەنوۆتىڭ ستسەناريى بويىنشا ءتۇسىرىلدى. سونداي-اق ولجاس سۇلەيمەنوۆتىڭ تىكەلەي قولداۋىمەن «ۇلتتىق كينونىڭ جاڭا تولقىنى» كينو الەمىنىڭ ەسىگىن اشتى.
قازاق كينوسىنداعى تۇڭعىش دىبىس رەجيسسەرلەرىنىڭ ءبىرى قادىر قوساي مەن قازاق كسر-نىڭ ەڭبەك سىڭىرگەن ءارتىسى, «قىز جىبەك» فيلمىندە باستى ءرولدى سومداعان مەرۋەرت وتەكەشەۆا دا ءوز جۇلدىزىن اشتى. ەستەلىك-جۇلدىز 2017 جىلى ومىردەن وزعان اكتەر, قازاقستاننىڭ حالىق ءارتىسى قۇمان تاستانبەكوۆكە دە بەرىلدى. ونىڭ جۇلدىزىن ءاسانالى ءاشىموۆ اشتى.
سونىمەن قاتار بيىل جازدا مەزگىلسىز ومىردەن وزعان رەجيسسەر ساتىبالدى نارىمبەتوۆتىڭ ەسىمى دە جۇلدىزدار اللەياسىنان ءوز ورنىن تاپتى. ونىڭ تۋىندىلارى قازاقستاننىڭ داڭقىن دۇنيە جۇزىنە اسقاقتاتتى, تاريحتىڭ قاتپارلارىن اشتى, وتكەنگە تاعزىم جاساي وتىرىپ بولاشاققا سەنىممەن قاراۋعا شاقىردى. س.نارىمبەتوۆ العاشقىلاردىڭ ءبىرى بولىپ فرانتسيانىڭ كينو ونەرى اكادەمياسىنىڭ لاۋرەاتى اتاندى, جورج جانە ريتا سادۋل اتىنداعى بەدەلدى سىيلىقتى يەلەندى. جۇلدىزدى اشقان «قازاقفيلم» كينوستۋدياسىنىڭ پرەزيدەنتى اقان ساتاەۆ نارىمبەتوۆتىڭ ۇلدارىنا جاقىندا فرانتسيادا وتكەن قازاقستان كينوسىنىڭ فەستيۆالى اياسىندا رەجيسسەرگە مارقۇم بولعاننان كەيىن بەرىلگەن «ۇلتتىق كينەماتوگرافيانىڭ دامۋىنا قوسقان ۇلەسى ءۇشىن» سىيلىعىن تابىس ەتتى.
وپەراتور جانە رەجيسسەر, ستسەناريست يگور ۆوۆنيانكو, اكتەرلەر – مەڭتاي وتەپبەرگەنوۆ, جامبىل قۇدايبەرگەنوۆ جانە فارحات ءابدىرايىموۆ, وپەراتور-رەجيسسەر ۆياچەسلاۆ بەليالوۆ, باس ينجەنەر-ساۋلەتشى يۋري برەۋس, كينووپەراتور جانە رەجيسسەر, وتان سوعىسىنىڭ ارداگەرى مارك بەركوۆيچ, سونداي-اق كەڭەستىك قازاقستاننىڭ العاشقى حرونيكاسىن تۇسىرگەن العاشقى كينووپەراتورلاردىڭ ءبىرى ەسكەندىر تىنىشپاەۆ سىندى ەڭبەگى سىڭگەن قايراتكەرلەردىڭ ەسىمى جۇلدىزدار اللەياسىنان ءوز ورنىن ەنشىلەدى.
ەستەرىڭىزگە سالا كەتسەك, جۇلدىزدار اللەياسى 2011 جىلى YII حالىقارالىق «ەۋرازيا» كينوفەستيۆالى اياسىندا اشىلعان بولاتىن. بۇگىندە بۇل اللەيادا بارلىعى 46 كينوگەردىڭ ەسىمى بار جۇلدىزدار ورناتىلعان.
الماتى