قر بعم 2021 جىلعى «ۇزدىك عىلىمي قىزمەتكەر» سىيلىعىنىڭ قورىتىندىسىن شىعاردى. ناتيجەسىندە, ەلىمىزدىڭ عىلىمي-زەرتتەۋ ينستيتۋتتارى مەن جوو-نىڭ 50 عالىمى جەڭىمپاز اتاندى, دەپ حابارلايدى Egemen.kz.
ولاردىڭ ارقايسىسى 2000 اەك - 5 ملن 834 مىڭ تەڭگە كولەمىندە سىياقى الادى.
كونكۋرسقا قاتىسۋ ءۇشىن بارلىعى 7 باعىت بويىنشا 575 ءوتىنىم كەلىپ ءتۇستى: «جاراتىلىستانۋ عىلىمدارى», «ينجينيرينگ جانە تەحنولوگيالار», «مەديتسينا جانە دەنساۋلىق ساقتاۋ», «الەۋمەتتىك جانە گۋمانيتارلىق عىلىمدار», «اۋىل شارۋاشىلىعى جانە ۆەتەريناريا عىلىمدارى», «اسكەري عىلىمدار جانە ۇلتتىق قاۋىپسىزدىك».
ناتيجەسىندە, كوميسسيا 6 عزي مەن 16 جوو-دان 50 عالىمعا «ۇزدىك عىلىمي قىزمەتكەر-2021» سىيلىعىن بەرۋ تۋرالى شەشىم قابىلدادى.
ولاردىڭ اراسىندا ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى راحمەتقاجى بەرسىمباي, يادرولىق فيزيكا ينستيتۋتى فيليالىنىڭ جەتەكشىسى ماكسيم زدوروۆەتس, قاراعاندى تەحنيكالىق ۋنيۆەرسيتەتىنىڭ پروفەسسورى اريستوتەل يساگۋلوۆ, ونكولوگيا جانە راديولوگيا عزي باسقارما ءتورايىمى ديليارا قايداروۆا,ء ال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى قايرات داۋلەتوۆ, قازاق ۇلتتىق اگرارلىق زەرتتەۋ ۋنيۆەرسيتەتىنىڭ پروفەسسورى قايسار تابىنوۆ جانە باسقالارى قاتىستى.
جىل سايىنعى «ۇزدىك عىلىمي قىزمەتكەر» سىيلىعى عىلىم مەن تەحنيكانىڭ دامۋىنا ەلەۋلى ۇلەس قوسقان عالىمداردى, عىلىمي قىزمەتكەرلەردى قولداۋعا جانە كوتەرمەلەۋگە باعىتتالعان.
«مەملەكەت باسشىسىنىڭ تاپسىرماسى بويىنشا ءبىلىم جانە عىلىم مينيسترلىگى عالىمدار مەن عىلىمي ۇيىمداردىڭ, جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ قىزمەتكەرلەرىن جان-جاقتى قولداۋ ماسەلەلەرىنە نازار اۋدارادى. وسى جىلى مينيسترلىك العاش رەت ەلىمىزدىڭ ۇزدىك عالىمدارى ءۇشىن سىيلىقتار تاعايىندادى. كونكۋرسقا قاتىسۋعا وتىنىمدەر وسى كونكۋرس ءۇشىن ارنايى قۇرىلعان جانە اۆتوماتتى تۇردە سەگىز ولشەمشارت بويىنشا بالدارى بار اقپاراتتىق جۇيە ارقىلى قابىلداندى», دەدى قر بعم عىلىم كوميتەتىنىڭ ءتورايىمى جاننا قۇرمانعاليەۆا.
ول بۇل بايقاۋدىڭ اشىقتىعى مەن ترانسپارەنتتىلىگىن قامتاماسىز ەتكەنىن اتاپ ءوتتى. عىلىمي جەتىستىكتەردى باعالاۋ كريتەريلەرى عىلىمي جانە ساراپتامالىق قاۋىمداستىقپەن بىرگە جاسالدى.
«بايقاۋدىڭ بارلىق قاتىسۋشىلارى ءوتىنىم بەرۋ كەزەڭىندە ءوز ۇپايلارىن كورە الدى. ولاردى كوميسسيا قاراپ,ساراپتامالىق توپتار ۇسىنىلعان قۇجاتتاردىڭ بەكىتىلگەن كريتەريلەرگە سايكەستىگىن سەكتسيالاردا تەكسەردى», دەپ قوستى جاننا قۇرمانعاليەۆا.
كوميسسيا مەن ساراپتامالىق توپتاردىڭ قۇرامىندا جەتەكشى عالىمدار, تاۋەلسىز ساراپشىلار, مەملەكەتتىك ورگانداردىڭ وكىلدەرى, جاس عالىمدار كەڭەسى مەن جاس عالىمدار اليانسىنىڭ مۇشەلەرى جۇمىس ىستەدى.