وڭدەۋ ونەركاسىبى وركەندەگەن قوستاناي قالاسىندا ەكسپورتقا جوعارى ساپالى ءونىم شىعاراتىن تاعى ءبىر ەت كومبيناتى اشىلدى. Beef export group دەپ اتالاتىن جاڭا كاسىپورىن جىلىنا 20 مىڭ توننا ەت وڭدەپ, ودان شىعاتىن سان ءتۇرلى ونىمدەر مەن جارتىلاي فابريكاتتاردى قىتاي, پاكىستان, بىرىككەن اراب امىرلىكتەرىنە, سونداي-اق رەسەيدىڭ ىرگەلەس ايماقتارىنا ساتاتىن بولادى.
«جاسىل» تەحنولوگياعا نەگىزدەلگەن جاڭا كاسىپورىنداعى وندىرىستىك جەلىلەردىڭ ءبارى الەمدىك ستاندارتتار مەن سانيتارلىق تالاپتارعا ساي. كومبيناتتىڭ اۆتوماتتاندىرىلعان قاساپحاناسىنان بولەك ەتتى سۇيەگىنەن اجىراتىپ, سىڭىرىنەن سىلىپ الاتىن دەربەس تسەحى, سورپالىق سۇيەك الاتىن, تازا ەتتى وڭدەيتىن, دايىن ءونىمدى ورايتىن, قالدىق وڭدەيتىن ارنايى تسەحتارى بار. شيكى ەت پەن دايىن ءونىمدى ساقتايتىن توڭازىتقىش بولمەلەرى دە بولەك ورنالاسقان. زاۋىتقا اكەلىنگەن شيكىزاتتى ەڭ الدىمەن وسىنداعى زەرتحانا ماماندارى ۆەتەرينارلىق-سانيتارلىق ساراپتامادان وتكىزەدى.
زاماناۋي كاسىپورىننىڭ تاعى ءبىر ەرەكشەلىگى – مۇنداعى وندىرىستىك جەلىلەر ەلەكتر قۋاتى مەن تابيعي گازدىڭ كۇشىمەن بالامالى تۇردە جۇمىس ىستەي بەرەدى. ەڭ باستىسى, مۇندا باۋىزدالعان مالدىڭ قانىن قۇيىپ الۋ, وندىرىستىك قالدىقتاردى جويۋ سياقتى جۇمىستاردىڭ ءبارىن اقىلدى قۇرىلعىلار اتقارادى. ءتىپتى بيوقالدىقتارعا دەيىن وڭدەلىپ, كادەگە جاراتىلادى. مۇنداعى وندىرىسكە «حالال» جۇيەسى مەن عسس – اس ونىمدەرى قاۋىپسىزدىگى جۇيەسى ەنگىزىلگەن.
– عيماراتتىڭ, تسەحتاردىڭ ءىشىن تازارتاتىن قۇرىلعى دا اۆتوماتتى تۇردە جۇمىس ىستەيدى. كاسىپورىننىڭ ءوزى قالادان 1 شاقىرىم قاشىق جەرگە ورنالاسقان. مۇنىڭ ءبارى اينالامىزدىڭ لاستانۋىنا جول بەرمەۋگە, قورشاعان ورتانى تازا ۇستاۋعا مۇمكىندىك بەرەدى. ءبىزدىڭ كاسىپورىن ەميسسيا بويىنشا 1 كلاستى قاۋىپسىزدىك تالاپتارىنا سايكەس جۇمىس ىستەيدى. سونىمەن قاتار ءبىز وبلىس كولەمىندەگى شارۋاشىلىقتار مەن جەكە تۇرعىنداردىڭ دا مالىن سويىپ, جىلىكتەپ بەرە الامىز, – دەدى Beef export group سەرىكتەستىگىنىڭ ديرەكتورى الەكساندر پارحومەنكو.
كاسىپورىن باسشىسىنىڭ ايتۋىنشا, «قاراپايىم زاتتار ەكونوميكاسى» اياسىندا قولعا الىنعان ايتۋلى جوبانى ىسكە اسىرۋعا باس-اياعى 7,2 ملرد تەڭگە جۇمسالعان. وبلىستىق اۋىلشارۋاشىلىق باسقارماسىنىڭ ماماندارى جاڭا كومبينات وڭىردە وندىرىلەتىن ەت ونىمدەرىنىڭ كولەمىن 30%-عا ۇلعايتۋعا مۇمكىندىك بەرەدى دەپ وتىر.
ەت كومبيناتىندا 250 ادام جۇمىس ىستەيدى. مۇنداعى اۆتوماتتاندىرىلعان وندىرىستىك جەلى تاۋلىگىنە مىڭ جارىمنان استام ءىرى قارا ەتىن وڭدەي الادى. الداعى ۋاقىتتا وندىرىستىك قۋاتىن تولىق پايدالانۋ ءۇشىن كاسىپورىن جەرگىلىكتى فەرمەرلەردىڭ سىرتىندا, اقمولا, سولتۇستىك قازاقستان, قاراعاندى وبلىستارىنداعى شارۋاشىلىقتاردان مال ساتىپ الۋدى كوزدەپ وتىر.
قوستاناي وبلىسى