تاۋەلسىز مەملەكەتتەر دوستاستىعىنا مۇشە مەملەكەتتەر باسشىلارىنىڭ ءداستۇرلى بەيرەسمي كەزدەسۋىنە قازاقستان پرەزيدەنتىمەن قاتار تۇڭعىش پرەزيدەنت – ەلباسى نۇرسۇلتان نازارباەۆ, ازەربايجان پرەزيدەنتى يلحام اليەۆ, ارمەنيانىڭ پرەمەر-ءمينيسترى نيكول پاشينيان, بەلارۋس پرەزيدەنتى الەكساندر لۋكاشەنكو, قىرعىزستان پرەزيدەنتى سادىر جاپاروۆ, رەسەي پرەزيدەنتى ۆلاديمير پۋتين, تاجىكستان پرەزيدەنتى ەمومالي راحمون, تۇرىكمەنستان پرەزيدەنتى گۋربانگۋلى بەردىمۇحامەدوۆ, وزبەكستان پرەزيدەنتى شاۆكات ميرزيوەۆ قاتىستى, دەپ حابارلايدى Egemen.kz.
جيىن بارىسىندا تمد-عا مۇشە مەملەكەتتەردىڭ باسشىلارى 2021 جىلعى ىقپالداستىقتى قورىتىندىلاپ, الداعى كەزەڭدەگى ءوزارا ءتيىمدى ىنتىماقتاستىقتى ودان ءارى نىعايتۋ جانە دامىتۋ, سونداي-اق ەكونوميكالىق جانە مادەني-گۋمانيتارلىق سالالارداعى بىرلەسكەن جوبالاردى جۇزەگە اسىرۋ جونىندەگى ورتاق جوسپاردى تالقىلادى.
مەملەكەتتەر باسشىلارى ءوزارا ساۋدا-ساتتىقتى جانداندىرۋ شارالارىن قاراستىرىپ, حالىقارالىق جانە ايماقتىق كۇن تارتىبىندەگى وزەكتى ماسەلەلەر بويىنشا پىكىر الماستى, سونداي-اق پاندەميانىڭ سالدارىن ەڭسەرۋ جانە بيولوگيالىق قاۋىپسىزدىكتى قامتاماسىز ەتۋ جونىندەگى بىرلەسكەن ءىس-قيمىلداردى تالقىلادى.
قازاقستان پرەزيدەنتى بيولوگيالىق قاۋىپسىزدىكتى قامتاماسىز ەتۋ جونىندەگى وزەكتى ماسەلەنىڭ كەزدەسۋدە قاراستىرىلعانى ءۇشىن رەسەي تاراپىنا ريزاشىلىعىن ءبىلدىرىپ, وسى سالاداعى ىنتىماقتاستىق تۋرالى ءتيىستى كەلىسىمگە ۇقشۇ اياسىندا قول قويىلعانىن ەسكە سالدى. مەملەكەت باسشىسى پاندەميا كەزىندە كومەك كورسەتكەنى ءۇشىن رەسەي پرەزيدەنتى ۆلاديمير پۋتينگە العىس ايتتى.
«قازاقستانعا قيىن كەزەڭدە قولداۋ كورسەتكەنىڭىز ءۇشىن ريزاشىلىعىمدى بىلدىرەمىن. ورتاق ۋاعدالاستىقتى ورىنداۋ ماقساتىمەن قاراعاندىدا رەسەيلىك سپۋتنيك V تەحنولوگياسى نەگىزىندەگى بىرلەسكەن ءوندىرىستى جولعا قويا الدىق. سپۋتنيك V ۆاكتسيناسى COVID-19 ىندەتىنىڭ تارالۋىنا توسقاۋىل قويۋ ىسىندە شەشۋشى ءرول اتقاردى دەپ ايتۋعا بولادى», دەدى پرەزيدەنت.
قاسىم-جومارت توقاەۆ ەلىمىزدىڭ ۇيىمعا كەلەسى جىلعى توراعالىعى بارىسىندا قازاقستان تمد اياسىنداعى كوپجاقتى ىنتىماقتاستىقتى ودان ءارى دامىتۋعا دايىن ەكەنىن ايتتى.