ەلباسى نۇرسۇلتان نازارباەۆ رەسەي پرەزيدەنتى ۆلاديمير پۋتينمەن كەزدەستى, دەپ حابارلايدى Egemen.kz ەلباسىنىڭ رەسمي سايتىنا سىلتەمە جاساپ.
كەزدەسۋ بارىسىندا تاراپتار وڭىرلىك جانە حالىقارالىق كۇن تارتىبىندەگى اسا ماڭىزدى ماسەلەلەر جونىندە پىكىر الماستى.
ەلباسى رەسەي فەدەراتسياسىنىڭ پرەزيدەنتىنە جەەك-ءتىڭ قۇرمەتتى توراعاسى رەتىندە تمد-عا قاتىسۋشى ەلدەر كوشباسشىلارىنىڭ بەيرەسمي سامميتىنە قاتىسۋعا شاقىرعانى ءۇشىن العىس ايتتى.
«قۇرمەتتى توراعا رەتىندە مەن بۇگىن بەيرەسمي كەزدەسۋگە قاتىسامىن. مەن 1991 جىلعى جەلتوقساندا الماتىدا تمد-نىڭ قۇرىلۋىنا الىپ كەلگەن تاريحي وقيعانىڭ از عانا كۋاگەرلەرىنىڭ ءبىرىمىن. مۇنىڭ قالاي بولعانى ءالى ەسىمدە», دەدى نۇرسۇلتان نازارباەۆ.
سونىمەن قاتار, قازاقستاننىڭ تۇڭعىش پرەزيدەنتى وسى ينتەگراتسيالىق بىرلەستىكتىڭ تيىمدىلىگى مەن وزەكتىلىگىمەن قاتار, ەاەو-نى ودان ءارى دامىتۋدىڭ ماڭىزدىلىعىن اتاپ ءوتتى.
«ەاەو ورنىقتى جانە كوپتەگەن ادامدار بۇعان سەنەدى. الەمدەگى پاندەمياعا قاراماستان, قازاقستان مەن رەسەي اراسىنداعى ساۋدا كولەمى 24 ميللياردتى قۇرايدى. بۇل بارلىق جىلدارداعى رەكورد. ءبىزدىڭ مىندەتىمىز - ەاەو-نى ودان ءارى دامىتۋ, قاۋىمداستىرىلعان مۇشەلەر مەن بايقاۋشىلاردى قابىلداۋ. جاڭا قاتىسۋشىلارعا بۇل پايدالى ەكەنىن دالەلدەۋ. ويتكەنى, كونسەنسۋس نەگىزىندە جۇمىس ىستەيتىن بۇل بىرلەستىك ونىڭ بارلىق مۇشەلەرىنىڭ قۇقىقتارى مەن مۇددەلەرىنە نۇقسان كەلتىرمەيدى», دەدى ەلباسى ءوز سوزىندە.
ۆلاديمير پۋتين ءوز كەزەگىندە قازاقستاننىڭ تۇڭعىش پرەزيدەنتىنىڭ ەاەو قۇرۋعا جانە ەۋرازيالىق كونتينەنتتە ەكونوميكالىق ينتەگراتسيانى ودان ءارى دامىتۋعا قوسقان جەكە ۇلەسىن ەرەكشە اتاپ ءوتتى.
«قازىر پاندەميا, بۇكىل الەمدە ءوندىرىس دەڭگەيىنىڭ تومەندەۋى وتە قيىن جاعدايدا, ءبىز ءوز ۋاقىتىمىزدا سىزدەرمەن بىرگە جۇمىس ىستەگەن تەتىكتەر مەن قۇرالدار ءتيىمدى جۇمىس ىستەۋدە. قازاقستانمەن ءوزارا قارىم-قاتىناستاردا ءبىز 2020 جىلى, پاندەميانىڭ ەڭ قيىن جىلىندا ەكونوميكانىڭ ەلەۋلى قۇلدىراۋىنا جول بەرمەدىك دەپ ايتۋ جەتكىلىكتى. ال بيىلعى جىلدىڭ العاشقى توعىز ايىندا ءوسىم 30 پايىزدان استى. بۇل, ارينە, قازاقستاننىڭ قازىرگى باسشىلىعىمەن بىرلەسكەن قىزمەتىمىزدىڭ وتە ماڭىزدى ناتيجەسى», دەدى ۆلاديمير پۋتين.