بار جاقسىلىق – بالالارعا

– قازىر اتىراۋ قالاسىندا 96 بالا­باقشا جۇمىس ىستەپ تۇر. ونىڭ ىشىندە 46 مەملەكەتتىك بالاباقشادا 12 030 بالا تاربيەلەنەدى. سونداي-اق 50 جەكەمەنشىك بالاباقشاعا 4 455 بالا بارىپ ءجۇر. وسىنداي 34 بالاباقشاعا مەملەكەتتىك تاپسىرىس بەرىلەدى. ەندى, مىنە, مەكتەپكە دەيىنگى ءتالىم-تاربيە بەرەتىن تاعى ءبىر بالاباقشا ىسكە قوسىل­دى. بۇل – وسى اۋىلدا تۇراتىن وتباسىلار ءۇشىن ۇلكەن قۋانىش, – دەيدى اتى­راۋ قالاسىنىڭ اكىمى قايرات ورازباەۆ.

جاڭا نىساننىڭ قۇرىلىسىنا دەمەۋ­شىلىك كورسەتكەن كومپانيانىڭ ۇكى­مەتپەن جانە جۇرتشىلىقپەن باي­لانىس ءبولىمىنىڭ باس مەنەدجەرى رزا­بەك ارتىعاليەۆتىڭ مالىمەتىنشە, با­لا­باق­شانىڭ جالپى اۋدانى 2 785 شارشى مەتردى قۇرايدى. بالاباقشا اۋماعىندا 14 توپتىق, دەنەشىنىقتىرۋ جانە جول قوزعالىسى ەرەجەلەرىن زەرتتەۋ­گە ارنالعان الاڭ جابدىقتالعان. عي­ماراتتا گيمناستيكاعا, مۋزىكا سابا­عىنا, دەنە تاربيەسىنە ارنالعان زالدار, سونداي-اق امبەباپ ۇيىرمە بولمەسى بار.

– ءبىزدىڭ كومپانيا ءبىلىم بەرۋدىڭ ساپاسى مەن قولجەتىمدىلىگىن دامىتۋعا ەرەكشە كوڭىل ءبولىپ وتىر. سول سەبەپتەن, ءار بالا مەن ءجاسوسپىرىمنىڭ جەكە قابىلەتىن جەتىلدىرۋ ءۇشىن بە­يىن­دى داعدىلارعا وقىتۋ, كاسىپتىك باع­دارلاۋ جوبالارىنا ۇدايى قولداۋ كور­سەتىپ كەلەدى. ماسەلەن, بيىل كورۋ قابىلەتىنەن ايىرىلعان جانە ناشار كورەتىن بالالارعا برايل قارپىن قازاق, اعىلشىن جانە ورىس تىلدەرىندە بىرەگەي ترەناجەردىڭ كومەگىمەن ۇيرەتۋگە كو­مەكتەسەتىن Sezual جوباسىنا قولداۋ ءبىلدىردى. تاعى ءبىر مىسال – اكادەميك قابدولوۆ قورىنا كورسەتىلگەن قول­داۋ. بۇل قور قازاقستاننىڭ بارلىق ايما­عىندا الەۋمەتتىك جەلىلەردىڭ كومە­گىمەن قازاق ءتىلىن ۇيرەنۋشىلەردى ىنتالاندىرىپ وتىر, – دەيدى ر.ارتىعاليەۆ.

اتىراۋ قالاسىنىڭ «بەرەكە» شا­عىن اۋدانىندا جاڭا مەكتەپتىڭ بوي كوتەرگەنى تۇرعىنداردى قۋانىشقا كەنەلتتى. مەكتەپتىڭ اشىلۋ سالتاناتىنا قاتىسقان وبلىس اكىمى ماحامبەت دوسمۇحامبەتوۆتىڭ پىكىرىنشە, تاۋەل­سىزدىك جىلدارىندا ءبىلىم بەرۋ سالاسىنا ايرىقشا كوڭىل ءبولىنىپتى. جىل سايىن ءبىلىم بەرۋ مەكەمەلەرىنىڭ ماتەريالدىق-تەحنيكالىق بازاسى جا­ڭارتىلىپ كەلەدى.

– تاۋەلسىزدىك العاننان بەرگى 30 جىلدا وبلىستا 95 مەكتەپ پەن 7 تەح­ني­كالىق-كاسىپتىك ءبىلىم بەرەتىن وقۋ ورنى­نىڭ عيماراتى سالىنىپ, پايدالانۋعا بەرىلدى. ەندى الداعى جىلى 8 مەكتەپتىڭ قۇرىلىسى اياقتالادى دەپ جوسپارلانىپ وتىر. بۇل باعىتتاعى ءىس-شارالار جالعاسىن تابادى. ويتكەنى ءبىزدىڭ باستى ماقساتىمىز – جاس بۋىننىڭ الاڭسىز, ساپالى ءبىلىم الۋىنا قولايلى جاعداي جاساۋ, – دەيدى م.دوسمۇحامبەتوۆ.

«بەرەكە» – سوڭعى جىلدارى بوي كوتەرگەن جاڭا شاعىن اۋدان. مۇن­دا بىرنەشە كوپقاباتتى ءۇي سالىنىپ, تۇرعىندار سانى ارتتى. بىراق شا­عىن اۋداندا وسى كەزگە دەيىن ءبىلىم وشاعى بولعان جوق. سول سەبەپتەن, شا­عىن اۋدان­دا تۇراتىن وتباسىلاردىڭ 824 با­لاسى قالاداعى باسقا مەكتەپ­تەردە ءبىلىم الىپ كەلگەن. ەندى جا­ڭا­­دان اشىلعان 1 200 ورىندىق مەك­تەپ زاماناۋي قۇرال-جابدىقتارمەن قامتىل­عان. مەكتەپتە 360 ورىندىق ءما­جىلىس زالى, اسحانا, جازعى سپورت الاڭى بار. ال سپورت زالى بوكس, ۇستەل تەننيسى, باسكەتبول, ۆولەيبول, كىشى اياقدوپ تۇرلەرىنە نەگىزدەلىپ سالىنعان. بۇعان قوسا مەكتەپتە ارنايى قاۋىپسىزدىك ءۇشىن بەينەباقىلاۋ بولمەسى قاراستىرىلعان.

يساتاي اۋدانىندا جانباي دەگەن اۋىل بار. كاسپي تەڭىزىنىڭ جاعالاۋىنا تاياۋ ورىن تەپكەن اۋىلدىڭ تۇرعىنى كوپ. سوعان ساي بوي تۇزەپ كەلە جاتقان بالالار سانى از ەمەس. اۋىلدىڭ الەۋ­مەتتىك ماسەلەلەرى بىرتىندەپ شەشى­مىن تاۋىپ وتىر.

جاقىندا وسى اۋىلدا «جالىندى قۇرىلىس» جشس سپورت كەشەنىنىڭ قۇ­رىلىسىن اياقتادى. ەكى قاباتتى سپورت كەشەنى قاجەتتى قۇرال-جابدىقتارمەن تولىق قامتاماسىز ەتىلگەن. مۇندا ءبىر مەزگىلدە 300-گە جۋىق ءجاسوسپىرىم بوكس, ۆولەيبول, باسكەتبول, كاراتە, تاەك­ۆاندو, قازاق كۇرەسى سەكىلدى سپورت تۇر­لەرىمەن شۇعىلدانا الادى. سونداي-اق ويلاۋ قابىلەتىن جەتىلدىرەتىن توعىز­قۇ­مالاق ويىنى ءۇشىن دە جاعداي جاسالعان.

– ەلىمىزدى الەمگە تانىتىپ جۇرگەن چەمپيوندارىمىز الىستاعى ەلدى مەكەندەردەن كوپتەپ شىعىپ جاتىر. بولا­شاقتا جانباي اۋىلىنان دا ازيا, الەم, وليمپيادا چەمپيوندارى شىعادى دەگەن سەنىمدەمىز. وسى ورايدا ەندى اۋىل بالا­لارىنىڭ سپورتتىڭ بىرنەشە تۇرىمەن الاڭسىز شۇعىلدانۋىنا تولىق مۇمكىندىك بار. اۋىل سپورتىن دامىتۋ ءۇشىن وسىنداي قولداۋ شارالارى جالعاسا بەرەدى, – دەيدى وبلىس اكىمىنىڭ ورىنباسارى ناريمان تاۋشوۆ.

اتىراۋ وبلىسى