2022 جىلى قىتايدىڭ باس شاھارى – بەيجىڭدە الاۋى تۇتاناتىن قىسقى وليمپيا ويىندارىنا قازاقستان قۇراماسى 60 ليتسەنزيا جەڭىپ الدى.
سپورت جانە دەنە شىنىقتىرۋ ىستەرى كوميتەتىنىڭ حابارلاۋىنشا, قازاقستاندىق سپورتشىلار سپورتتىڭ جەتى تۇرىنەن جولدامانى قورجىنعا سالعان. اتاپ ايتقاندا, بۇگىنگە دەيىن جەرلەستەرىمىز شاڭعى جارىسى, ترامپليننەن شاڭعىمەن سەكىرۋ, شاڭعى قوسسايىسى, فريستايل (موگۋل, اكروباتيكا), تاۋ شاڭعىسى, شورت-ترەك جانە كونكيمەن جۇگىرۋ سەكىلدى سپورت تۇرلەرىنەن جولداما الىپ ۇلگەرگەن.
«وليمپياداعا ىرىكتەۋ جارىستارى 2022 جىلعى قاڭتاردىڭ ورتاسىندا مارەسىنە جەتەدى. ۇلتتىق قۇرامالارعا كۆوتا مەن ليتسەنزيانى ءبولۋ 2022 جىلدىڭ 16 قاڭتارىندا اياقتالادى», دەلىنگەن ۆەدومستۆو حابارلاماسىندا. بەيجىڭدەگى قىسقى وليمپيادا 4-20 اقپان ارالىعىندا وتەدى. 2018 جىلى وڭتۇستىك كورەيانىڭ پحەنچحان قالاسىندا ۇيىمداستىرىلعان وليمپيادادا قازاقستان 57 جولداما جەڭىپ العان بولاتىن.