2021 جىلعى 20 جەلتوقساندا اشحاباد قالاسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى رومان سكلياردىڭ جانە تۇرىكمەنستان مينيسترلەر كابينەتى توراعاسىنىڭ ورىنباسارى چ. گىلىدجوۆتىڭ تەڭ توراعالىعىمەن ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى قازاقستان-تۇرىكمەنستان ۇكىمەتارالىق كوميسسياسىنىڭ 11-وتىرىسى ءوتتى, دەپ جازادى Egemen.kz.
كوميسسيا وتىرىسى بارىسىندا قاتىسۋشىلار ەكىجاقتى ىنتىماقتاستىقتىڭ كۇن تارتىبىندەگى وزەكتى ماسەلەلەردى, سونىڭ ىشىندە ساۋدا-ەكونوميكالىق ىنتىماقتاستىقتى ودان ءارى دامىتۋ پەرسپەكتيۆالارىن, كولىك جانە كوممۋنيكاتسيالار, قارجى جانە ينۆەستيتسيا, اۋىل شارۋاشىلىعى, سۋ شارۋاشىلىعى جانە باسقا دا سالالارداعى ءوزارا ءىس-قيمىلدى تالقىلادى.
قورشاعان ورتانى قورعاۋ, قۇرىلىس, مادەنيەت جانە تۋريزم, دەنساۋلىق ساقتاۋ, ءبىلىم جانە عىلىم, سونداي-اق گاز بەن الەۋمەتتىك جانە ەڭبەك سالالارى قاراستىرىلدى.
تۇرىكمەنستان قازاقستاننىڭ ورتالىق ازياداعى ماڭىزدى ساۋدا سەرىكتەستەرىنىڭ ءبىرى. بيىلعى جىلدىڭ 11 ايىنىڭ قورىتىندىسى ءوزارا ساۋدانىڭ قارقىندى وسكەنىن ايعاقتايدى. كەزدەسۋ قورىتىندىسى بويىنشا ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى قازاقستان-تۇرىكمەنستان ۇكىمەتارالىق كوميسسياسىنىڭ 11-وتىرىسىنىڭ حاتتاماسىنا قول قويىلدى.