اقمولا وبلىسىنداعى «Bahyt Petrol Group» جشس دەپ اتالاتىن كاسىپورىن ايدىڭ-كۇننىڭ امانىندا پاۆلودار مۇناي-حيميا زاۋىتىن ميلليارد تەڭگەگە جۋىق اقشاعا شىعىنعا باتىردى دا قويدى. قىلتا استىندا تىعىلىپ جاتقان بۇل قىلمىستى اقمولا وبلىسىنىڭ قارجى پوليتسياسى انىقتادى.
وسىعان بايلانىستى اتالمىش ايماقتى قارجى پوليتسياسىنىڭ دەپارتامەنتى قازىر «Bahyt Petrol Group» سەرىكتەستىگىن باسقاراتىن لاۋازىمدى تۇلعالاردىڭ ۇستىنەن قىلمىستىق ءىس قوزعادى.
«اتالمىش جاۋاپكەرشىلىگى شەكتەۋلى سەرىكتەستىگىنىڭ لاۋازىمدى تۇلعالارىنا 2013 جىلدىڭ قاڭتارىنان قازىرگى كەزگە دەيىن «پاۆلودار مۇناي-حيميا زاۋىتى» اكتسيونەرلىك قوعامىنان ساقتاۋعا قابىلداعان 3600 توننادان استام اي-92 ماركالى بەنزين مەن كولەمى 4500 توننادان اساتىن اي-80 ماركالى بەنزيندى ۇرلادى دەگەن ايىپ تاعىلۋدا. زاۋىتقا وسى ارقىلى 900 ملن. تەڭگەدەن استام شىعىن كەلدى», – دەدى دەپارتامەنت ءباسپاسوز قىزمەتىندەگىلەر.
قازىر قىلمىستىق ءىس قىلمىستىق كودەكستىڭ 176-بابى 4-تارماعى «ب» تارماقشاسى بويىنشا تەكسەرىلۋدە. قارجى پوليتسياسى ونىڭ ناتيجەسىن سوڭىنان جۇرتشىلىققا جاريا ەتۋگە ۋادە ەتىپ وتىر.
قۇرىش نۇرىمبەت.