بىزدەر بۇعان دەيىنگى ماقالالارىمىزدا «قازپوشتا»اق-تىڭ جۇمىسىنا سىن ايتىپ جۇردىك. ءبىزدىڭ ءوڭىر عانا ەمەس وزگە ايماقتارداعى تىلشىلەرىمىز, جەرگىلىكتى اۆتورلىق ورنىقتى دا بايسالدى سىن ايتتى. ونداي سىنعا اۋىلدارداعى پوشتا بايلانىسى, گازەت-جۋرنالداردىڭ وقىرمانعا ۋاقتىلى جەتكىزىلمەۋى سەبەپ بولعان-دى. بىلتىر وبلىستا 52 اۋىلدىق پوشتا بولىمشەسى جابىلىپ قالدى. اۋداندىق پوشتا بولىمدەرىندە شالعايداعى اۋىلدارعا پوشتا اپاراتىن ءبىردى-ەكىلى عانا ەسكى, ابدەن توزعان كولىكتەر بار. جانار-جاعارمايدى ۇنەمدەۋ ماقساتىندا اپتاسىنا ءبىر-ەكى رەت قانا جولعا شىعادى. پوشتاشىلاردىڭ ەڭبەكاقىلارى از. قىسى-جازعى ارنايى كيىمدەر, قول سومكەلەر قاجەت-اق. اۋىلدارعا گازەتتەر اپتاسىنا 3 رەت بارادى. اۆتوبۋس جۇرگىزۋشىلەرمەن شارتقا وتىرىپ گازەتتەر جىبەرىلەدى. اۋىلعا «قاز- پوشتا» اق-تىڭ كومەگى اۋاداي قاجەت دەدىك.
جۋىردا وتكەن ەلىمىز پارلامەنتى ءماجىلىسىنىڭ داريعا نازارباەۆا باسقاراتىن الەۋمەتتىك-مادەني دامۋ كوميتەتىنىڭ وتىرىسىندا «قازپوشتا» اق-تىڭ جۇمىسى سىن تەزىنە ىلىككەن ەدى. ەندى, مىنە, پوشتا جۇمىسىنا جان ءبىتىپ, اۋىلدارعا قاراي بۇرىلا باستادى. وبلىستاعى «قازپوشتا»اق وبلىستىق فيليالى ديرەكتورىنىڭ ورىنباسارى نيكولاي ۆورونتسوۆتىڭ ايتۋىنشا, ەندى, وڭىردەگى پوشتا بايلانىسىنىڭ جۇمىسىن جانداندىرۋ ماقساتىندا اۋىلدارعا باراتىن جىلجىمالى كوشپەلى پوشتا بولىمشەلەرى قىزمەت كورسەتەتىن بولادى. ياعني, جاڭا زامان پوشتا كولىكتەرى ارنايى بايلانىس قۇرالدارىمەن, نوۋتبۋكتەرمەن, ەلەكتر قۋاتىمەن جابدىقتالادى. كوشپەلى پوشتا جۇيەلەرى ارقىلى مەرزىمدى باسىلىمدار, ەڭبەكاقى, زەينەتاقى, تاعى باسقا دا الەۋمەتتىك جاردەماقىلار, حات-حابارلار شالعاي اۋىلدارعا ۋاقتىلى جەتكىزىلەدى.
– كولىكتەر الىپ قۋانىپ جاتىرمىز. ەندى شالعايداعى اۋىلدار وسى جىلجىمالى كولىكتەردىڭ قىزمەتىن پايدالانا الادى, – دەيدى ەرتىس جانە باياناۋىل اۋداندىق پوشتا بولىمشەلەرىنىڭ باسشىلارى تولەۋعازى مۋسين, احات كاريپوللا. – جاڭا كولىكتەر تۇرعىندارعا دا, پوشتا قىزمەتكەرلەرىنە دە قولايلى.
پوشتا بولىمشەلەرى جابىلىپ قالعان اۋىلدارداعى قارتتارعا زەينەتاقىلارى, تۇرعىنداردىڭ گازەت-جۋرنالدارى ۋاقتىلى جەتكىزىلەدى, – دەيدى ن.ۆورونتسوۆ. ءسويتىپ, ەندى, وبلىستاعى 52 شالعاي اۋىل – «قازپوشتا» اق-تىڭ جاڭارتۋ باعدارلاماسى ارقاسىندا پوشتا قىزمەتىنىڭ جاقسىلىعىن كورمەكشى. سونىمەن قاتار, وبلىستاعى ەكىباستۇز قالاسىنىڭ اۋىلدارىنا جەتۋ ءۇشىن اقتوعاي, باياناۋىل, ەرتىس, شارباقتى, ماي, ۋسپەن اۋداندارىنداعى اۋداندىق بولىمشەلەرگە جاڭا قىزمەتتىك كولىكتەردىڭ كىلتتەرى تابىستالدى.
فاريدا بىقاي,
«ەگەمەن قازاقستان.
پاۆلودار وبلىسى.