اقش-پەن ادام قۇقىقتارى بويىنشا ەكىجاقتى ۋاعدالاستىققا قول جەتكىزىلدى

بيىلعى 8-10 جەلتوقساندا پرەزيدەنتتىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان ۆاشينگتونعا جۇمىس ساپارىمەن باردى.

اق ءۇيدىڭ, مەملەكەتتىك دەپارتامەنتتىڭ جانە اقش كونگرەسىنىڭ رەسمي وكىلدەرىمەن وتكەن كەلىسسوزدەر ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلاۋعا, بىرقاتار حالىقارالىق پروبلەما بويىنشا, ونىڭ ىشىندە ايماقتىق قاۋىپسىزدىك پەن تۇراقتىلىقتى ساقتاۋعا, پاندەمياعا قارسى ءىس-قيمىل جانە كليماتتىڭ وزگەرۋىنە قارسى كۇرەسكە باعىتتالعان ماسەلەلەر بويىنشا پىكىر الماسۋعا مۇمكىندىك بەردى. ارناۋلى وكىل قازاقستانداعى ساياسي جانە ەكونوميكالىق رەفورمالارعا قاتىستى ماسەلەگە ەرەكشە نازار اۋداردى. كەزدەسۋ قورىتىندىسى بويىنشا نۇر-سۇلتان مەن ۆاشينگتون اراسىنداعى كەڭەيتىلگەن ستراتەگيالىق سەرىكتەستىكتى ودان ءارى جانداندىرۋ جونىندە ناقتى كەلىسىمدەرگە قول جەتكىزىلدى.

اقش مەملەكەتتىك حاتشىسىنىڭ ازاماتتىق قاۋىپسىزدىك, دەموكراتيا جانە ادام قۇقىقتارى ماسەلەلەرى جونىندەگى ورىنباسارى ۋ.زەيا قازاقستان پرەزيدەنتى قاسىم-جومارت توقاەۆتىڭ ادام قۇقىقتارى مەن بوستاندىقتارىن, زاڭ ۇستەمدىگىن جان-جاقتى قامتاماسىز ەتۋگە جانە مەملەكەتتىك باسقارۋ جۇيەسىن ودان ءارى جانداندىرۋعا باعىتتالعان رەفورمالارىنىڭ ءتيىمدى ىسكە اسىرىلىپ جاتقانىنا قولداۋ ءبىلدىردى. تاراپتار 2022 جىلى ادام قۇقىقتارى بويىنشا جوعارى دەڭگەيدەگى ەكىجاقتى ديالوگتى باستاۋ تۋرالى ۋاعدالاستىققا قول جەتكىزدى.

مەملەكەتتىك دەپارتامەنت باسشىلىعىمەن كەزدەسۋ بارىسىندا ساياسي جانە ەكونوميكالىق سالالارداعى ەكىجاقتى ىنتىماقتاستىق, «س5+1» فورماتىنداعى وڭىرلىك ديالوگتى نىعايتۋدىڭ پەرسپەكتيۆالارى, سونداي-اق اۋعانستانداعى جاعدايدى تۇراقتاندىرۋعا جاردەمدەسۋ ماسەلەلەرى تالقىلاندى. امەريكالىق تاراپ قازاقستاننىڭ اۋعان حالقىنا ءىس-جۇزىندە كورسەتكەن گۋمانيتارلىق كومەگىن, سونداي-اق نۇر-سۇلتاننىڭ اۋعانستانداعى گۋمانيتارلىق داعدارىسقا جول بەرمەۋ جونىندەگى حالىقارالىق كۇش-جىگەردى ۇيلەستىرۋدەگى ءرولىن جوعارى باعالادى.

اقش كونگرەسىنىڭ مۇشەلەرى ە.بەر, ر.ادەرحولت جانە س.شابوتپەن وتكەن كەزدەسۋلەردە اقش كونگرەسىندە قازاقستاننىڭ دوستارى توبىنىڭ الەۋەتىن بارىنشا ارتتىرا وتىرىپ, پارلامەنتارالىق ىنتىماقتاستىقتى تەرەڭدەتۋدىڭ ماڭىزدىلىعىنا ءمان بەرىلدى. امەريكالىق پارلامەنتاريلەر مەملەكەت باسشىسى جۇرگىزىپ جاتقان ساياسي رەفورمالاردى جوعارى باعالاپ, ەكىجاقتى ءوزارا ءىس-قيمىلدىڭ الەۋەتىن بارىنشا اشۋعا جاردەمدەسۋگە دايىن ەكەندىكتەرىن جەتكىزدى.

ساپار اياسىندا ەرجان قازىحان قازاقستان تاۋەلسىزدىگىنىڭ 30 جىلدىعىنا جانە اقش-پەن ديپلوماتيالىق قارىم-قاتىناس ورناتۋعا ارنالعان كونۆەنتسيانىڭ جۇمىسىنا قاتىستى. مەملەكەتتىك دەپارتامەنتتەن, ساۋدا مينيسترلىگىنەن, يۋسايد-تەن جانە اقش ساۋدا وكىلى كەڭسەسىنەن كەلگەن ءىس-شارا قوناقتارى مەن قاتىسۋشىلارى, سونداي-اق ۆاشينگتوننىڭ تالداۋ ورتالىقتارىنىڭ قىزمەتكەرلەرى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ تاۋەلسىز قازاقستاندى قۇرۋداعى, ەۋرازيالىق كەڭىستىكتەگى تۇراقتىلىقتى, قاۋىپسىزدىكتى جانە ورنىقتى دامۋدى قامتاماسىز ەتۋدەگى ۇلكەن ءرولىن, قازاقستان-امەريكا ستراتەگيالىق ارىپتەستىگىنىڭ ماڭىزدىلىعى مەن ناتيجەلىلىگىن, نۇر-سۇلتاننىڭ بىرقاتار حالىقارالىق پروبلەمانى شەشۋگە ولشەۋسىز ۇلەس قوسقانىن اتاپ ءوتتى.

كونۆەنتسيانىڭ ارنايى سەسسياسى قازاقستان مەن اقش اراسىنداعى ساۋدا-ەكونوميكالىق ارىپتەستىككە ارنالدى. قازاقستاندا جۇمىس ىستەيتىن امەريكالىق كومپانيالاردىڭ وكىلدەرى قازاقستان ۇكىمەتىنىڭ شەتەلدىك ينۆەستيتسيالاردى تارتۋ, سونداي-اق مەملەكەت پەن ينۆەستورلار اراسىنداعى اشىق ديالوگتى قامتاماسىز ەتۋ جونىندەگى كۇش-جىگەرىنىڭ تيىمدىلىگىن اتاپ ءوتتى.

ءىس-شارا اياسىندا ورتالىق ازيا جانە كاۆكاز ينستيتۋتى پروفەسسورلارى ف.ستارر جانە س.كورنەللدىڭ «Strong and Unique: three Decades of US-Kazakhstan Partnership» اتتى كىتابىنىڭ تۇساۋكەسەرى ءوتتى. كىتاپ قازاقستان تاۋەلسىزدىك العان ساتتەن باستاپ ەكىجاقتى قارىم-قاتىناستاردىڭ دامۋ تاريحىن قامتيتىن العاشقى كەشەندى زەرتتەۋ ەڭبەگى بولىپ تابىلادى.

ساپار قورىتىندىسى بويىنشا قازاقستاننىڭ اقش-تاعى ەلشىلىگىنىڭ ۇيىمداستىرۋىمەن قازاقستان تاۋەلسىزدىگىنىڭ 30 جىلدىعىنا ارنالعان سالتاناتتى قابىلداۋ ءوتتى.