قوستانايدا «تاۋەلسىزدىك جىلدارى كاسىپكەر ايەلدەردىڭ ءوڭىر ەكونوميكاسىنا قوسقان ۇلەسى» تاقىرىبىندا دوڭگەلەك ۇستەل وتىرىسى ءوتتى. تاۋەلسىزدىكتىڭ 30 جىلدىعىنا وراي ۇيىمداستىرىلعان ءىس-شارا بارىسىندا كەزىندە تاۋەكەلگە بارىپ بيزنەسىن باستاپ, بۇگىندە كوپشىلىككە تابىستى كاسىپكەر رەتىندە تانىلعان ىسكەر ايەلدەردىڭ تاۋەلسىزدىكپەن تامىرلاسا ورىلگەن تاعدىرى تۋرالى اڭگىمە ايتىلىپ, ايەلدەر بيزنەسىنىڭ بۇگىنى مەن ەرتەڭى قالاي بولادى دەگەن ماسەلەلەر توڭىرەگىندە ءسوز ءوربىدى.
وبلىستىق ىسكەر ايەلدەر قاۋىمداستىعىنىڭ ءتورايىمى گۇلسارا جامانقۇلوۆانىڭ ايتۋىنشا, تاۋەلسىزدىك جىلدارى قوستاناي وڭىرىندە بيزنەس سالاسىندا ءىرى تابىسقا جەتكەن نەمەسە ءىرى كومپانيالارعا باسشىلىق ەتىپ جۇرگەن, سونداي-اق مەملەكەتتىك قۇرىلىمدارداعى جاۋاپتى ورىنداردا باسشىلىق قىزمەت اتقارىپ جۇرگەن ىسكەر ايەلدەردىڭ بىرنەشە بۋىن شوعىرى قالىپتاسقان.
– تاۋەلسىز قازاقستاننىڭ ايەلدەرى دەگەن ۇعىمعا بۇگىندە اسىل جار, ارداقتى انا, تابىستى كاسىپكەر, قوعام بەلسەندىسى, ءبىر سوزبەن ايتقاندا, سىرتتا ەڭبەك پەن جەتىستىكتىڭ, ۇيدە جىلۋ مەن سۇيىسپەنشىلىكتىڭ, تاربيەنىڭ ۇيىتقىسى بولىپ جۇرگەن ارۋلاردىڭ ءبارى كىرەدى. ەلىمىز تاۋەلسىزدىك العاننان كەيىن ايەلدەردىڭ قوعامداعى ورنى ءوسىپ, بارلىق سالادا جوعارى تابىستارعا قول جەتكىزىپ جاتقانىن كورىپ وتىرمىز. ماسەلەن, وبلىسىمىزداعى ىسكەر ايەلدەر قاۋىمداستىعىندا 68 ايەل بار. ولاردىڭ ءبارى دە جانى نازىك بولعانىمەن, وزدەرىن ءار سالادا مويىنداتقان مىقتى ايەلدەر, – دەدى گ.جامانقۇلوۆا.
باسقوسۋ مىنبەرىنە شىققاندار اگروونەركاسىپ كەشەنى, تسيفرلاندىرۋ, شاعىن بيزنەس سالاسىنداعى بۇگىندە تولعاۋى جەتكەن وزەكتى ماسەلەلەردى كوتەردى. ماسەلەن, قوستاناي قالالىق كوشباسشى ايەلدەر كلۋبىنىڭ ءتورايىمى گۇلۆيرا قۇدايقۇلوۆا بيزنەستىڭ بىرقاتار سالاسى, سونىڭ ىشىندە اسىرەسە قوعامدىق تاماقتاندىرۋ ورىندارى بۇگىندە كادر تاپشىلىعىن قاتتى سەزىنىپ وتىرعانىن جانە پاندەميا بۇل ماسەلەنى ودان سايىن ۋشىقتىرىپ جىبەرگەنىن ايتتى. ال «سارىباي» كومپانيالار توبىنىڭ باسشىسى سۆەتلانا ميحايلەنكو ءوڭىردىڭ اگروونەركاسىپ كەشەنىن دامىتۋعا ەلەۋلى ۇلەس قوسىپ جۇرگەن ايەلدەردى ۇلگى ەتە سويلەدى.
دوڭگەلەك ۇستەل وتىرىسىنا قاتىسۋشىلار جيىن اياقتالعان سوڭ, وبلىستىق فيلارمونيانىڭ زالىندا اشىلعان «ايەلدەر. بيزنەس. تاعدىرلار» اتتى فوتوكورمەنى تاماشالادى.
قوستاناي وبلىسى