قر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا ماڭعىستاۋ وبلىسىنىڭ سايوتەس اۋىلىنداعى 4-سىنىپ وقۋشىسىنىڭ سايىستا ۇتىپ العان 1 ميلليون تەڭگەنى مەكتەبىنە سىيلاعانىنا پىكىر ءبىلدىردى, دەپ حابارلايدى Egemen.kz.
«ماڭعىستاۋ وبلىسىنىڭ ءتورتىنشى سىنىپ وقۋشىسى ماتەماتيكا ساباعىندا قولدانۋعا ارنالعان قۇرال جاساپ, ءوزىنىڭ ءبىلىمى مەن كۇش-جىگەرىنىڭ ارقاسىندا رەسپۋبليكالىق كونكۋرستا 1 ميلليون تەڭگە ۇتىپ العانى قۋانتادى. دارىندى بالالاردىڭ الەۋەتىن كوتەرمەلەۋ جانە اشۋ وتە ماڭىزدى. وقۋشىنىڭ ول سىياقىنى ءوز مەكتەبىنە ينتەراكتيۆتى تاقتا ساتىپ الۋعا جۇمساۋعا نيەت بىلدىرگەنى ونىڭ كەڭ جۇرەكتى ەكەنىن جانە بويىندا باسقا دا جاعىمدى قاسيەتتەرى بار ەكەنىن كورسەتەدى. بۇل رەتتە, ينتەراكتيۆتى تاقتانى رەسپۋبليكالىق كونكۋرستا جەڭىسكە جەتكەن وقۋشى ەمەس, جەرگىلىكتى اتقارۋشى ورگان ساتىپ الۋى ءتيىس دەپ سانايمىن. ارينە, بالالاردىڭ ءوز مەكتەبىن قولداۋعا جانە دامىتۋعا دەگەن ۇمتىلىسىن كوتەرمەلەۋ جانە قولداۋ كەرەك, بىراق مۇنداي جولمەن ەمەس», دەدى كوميتەت باسشىسى.
سونداي-اق, ول مەكتەپتەردى زاڭدى تۇردە قارجىلاندىرۋ جەرگىلىكتى اكىمدىكتەردىڭ قۇزىرەتىندە ەكەنىن ەسكە سالدى.
«قاجەتتى جابدىقتاردى ساتىپ الۋ ءۇشىن اكىمدىكتەرگە بيۋدجەت قاراجاتى بولىنەدى. ماڭعىستاۋ وبلىسىنىڭ ءبىلىم باسقارماسىنا زياتكەرلىك كونكۋرستا جەڭىسكە جەتۋ ناتيجەسىندە الىنعان اقشانى مەكتەپ وقۋشىسىنا قايتارىپ, جەرگىلىكتى بيۋدجەتتەن بولىنگەن قاراجات ەسەبىنەن قاجەتتى قۇرال-جابدىقتار ساتىپ الۋ ۇسىنىلدى», دەدى گۇلميرا كارىموۆا.