اسقار مامين قاراعاندى وبلىسىنا باردى

ۇكىمەت باسشىسى جاڭا ءوندىرىس ورىندارى مەن الەۋمەتتىك-مادەني ينفراقۇرىلىم نىساندارىنىڭ اشىلۋ سالتاناتىنا قاتىسىپ, سونىمەن بىرگە قاراعاندىلىق ءبىر توپ ازاماتقا مەملەكەتتىك ناگرادالاردى تابىس ەتتى.

پرەمەر-مينيستر تاۋەلسىزدىكتىڭ 30 جىلدىعىنا ارنالعان سالتاناتتى ءىس-شارادا قاراعاندى وبلىسىنىڭ جوعارى ەكونوميكالىق الەۋەتكە يە ەكەنىن جانە ءوڭىردىڭ ەلىمىزدىڭ الەۋمەتتىك-ەكونوميكالىق دامۋىنا ۇلكەن ۇلەس قوسىپ وتىرعانىن اتاپ ءوتتى.

وبلىستا 1991 جىلدان باستاپ جالپى وڭىرلىك ءونىم 24 ەسە وسكەن. قاراعاندىلىق كاسىپورىندار ەلدەگى تاس كومىردىڭ 34%-دان استامىن, تەمىر كەنىنىڭ 14,5%-ىن, مىس كەنىن ءوندىرۋدىڭ 28%-ىن, جالپاق پروكات پەن مارگانەتس كەندەرىنىڭ 100%-ىن, تازارتىلعان مىستىڭ 82%-ىن, تازارتىلعان كۇمىستىڭ 32,7%-ىن جانە تازارتىلعان التىننىڭ 11,1%-ىن وندىرەدى. وبلىس قازاقستانداعى  بارلىق وڭدەلگەن ءونىمنىڭ بەستەن ءبىر بولىگىن (نەمەسە 21%) شىعارادى جانە ەلىمىزدىڭ قۋاتتى يندۋستريالىق ورتالىعى بولىپ سانالادى.

يندۋستريالاندىرۋ باعدارلاماسى وڭىردە بۇعان دەيىن شىعارىلماعان, قوسىلعان قۇنى جوعارى ونداعان جاڭا ءونىم ءتۇرىن ءوندىرۋدى ۇيىمداستىرۋعا مۇمكىندىك بەردى. وبلىستا شەتەلدىك سەرىكتەستەرمەن بىرلەسىپ جولاۋشىلار اۆتوبۋستارىن, كارەرلىك جانە جول تەحنيكاسىن قۇراستىرۋ جوبالارى ىسكە اسىرىلىپ جاتىر. جىل سايىن 1100 اۆتوبۋس پەن 400 بىرلىك ارنايى تەحنيكا جانە ارنايى كولىك شىعارۋ جوسپارلانىپ وتىر. ىشكى جانە ەكسپورتتىق نارىقتاردا كەيىننەن وتكىزۋ ماقساتىندا جىلىنا 3,5 ملن دانا جەڭىل, جەڭىل جۇك جانە جۇك كولىگىنە ارنالعان اۆتوموبيل شينالارىن شىعاراتىن ءىرى جوبا ىسكە اسىرىلا باستادى. كەلەشەكتە كاسىپورىننىڭ قۋاتىن جىلىنا 9 ملن شيناعا دەيىن كەڭەيتۋ جوسپاردا بار.

كولىك ينفراقۇرىلىمى بەلسەندى تۇردە جاڭعىرتىلىپ كەلەدى, بالاباقشالار, مەكتەپتەر, مەديتسينا جانە سپورت وبەكتىلەرى سالىنۋدا. تاۋەلسىزدىك جىلدارى 8 ملن شارشى مەتر تۇرعىن ءۇي سالىندى. وبلىستىڭ الەۋەتىن ودان ءارى دامىتۋ اياسىندا 2025 جىلعا دەيىن قۇرىلىس, مەتاللۋرگيا, حيميا ونەركاسىبى, ەنەرگەتيكا, تاۋ-كەن مەتاللۋرگيا كەشەنى, قۇرىلىس ماتەريالدارى ءوندىرىسى, ماشينا جاساۋ جانە ت. ب. پەرسپەكتيۆالى سالالاردا جالپى سوماسى 3,5 ترلن تەڭگە بولاتىن 150-دەن استام ماڭىزدى ينۆەستيتسيالىق جوبانى ىسكە اسىرۋ كوزدەلگەن.

مەملەكەت باسشىسى قاسىم-جومارت توقاەۆتىڭ جارلىعىنا سايكەس, ۇكىمەت باسشىسى تاۋەلسىزدىك كۇنىنە وراي قاراعاندى وبلىسىنىڭ اۋىل شارۋاشىلىعى جانە ونەركاسىپ كاسىپورىندارىنىڭ باسشىلارى مەن جۇمىسشىلارىنا, مەملەكەتتىك قىزمەتشىلەرگە, ءبىلىم جانە عىلىم, دەنساۋلىق ساقتاۋ, مادەنيەت سالالارىنىڭ قىزمەتكەرلەرىنە جانە كاسىپكەرلەرگە مەملەكەتتىك ناگرادالاردى تابىس ەتتى.

III دارەجەلى «بارىس» وردەنىمەن «YDD Corporation» جشس قۇرىلتايشىسى ەرلان نىعماتۋلين, «قۇرمەت» وردەنىمەن قاراعاندى قالاسىنىڭ №2 كوپسالالى اۋرۋحاناسىنىڭ ديرەكتورى ارىستان ماعزۇموۆ, «جايرەم تاۋ-كەن بايىتۋ كومبيناتى» اق باسقارما توراعاسى سەرگەي بارتوش, ەڭبەك ارداگەرى ەرلان سمايىلوۆ, «قاراعاندى فارماتسەۆتيكالىق كەشەنى» جشس باس ديرەكتورى سەرگەي بارون جانە ءا. مولداعۇلوۆا اتىنداعى وليمپيادالىق رەزەرۆتىڭ وبلىستىق مامانداندىرىلعان مەكتەپ-ينتەرنات-كوللەدجىنىڭ ديرەكتورى ەردەن حاليلين ماراپاتتالدى.

ءىىى دارەجەلى «ەڭبەك داڭقى» وردەنىنە «ارسەلورميتتال تەمىرتاۋ» اق كد «تەنتەك» شاحتاسىنىڭ تاۋ-كەن جۇمىسشىسى باحتيار مۋرزالين, «قازاقمىس كورپوراتسياسى» جشس فيليالى – «جەزقازعانتۇستىمەت» ءوب كران ءماشينيسى ۇلماش تاڭقىباەۆا, «قۇرىلىسمەت» جشس ەلەكتر دانەكەرلەۋشىسى رينات حايرۋللين يە بولدى.

«ەرەن ەڭبەگى ءۇشىن» مەدالىمەن «ميراس» شق باسشىسى سامەت باباقوۆ, قاراعاندى اكادەميالىق مۋزىكالىق كومەديا تەاترىنىڭ ءارتىسى اننا بەسپالوۆا, قاراعاندى وبلىسى ىشكى ساياسات باسقارماسىنىڭ «رۋحاني جاڭعىرۋ» وڭىرلىك جوبالىق كەڭسەسىنىڭ باسشىسى ايتباي جۇماعۇلوۆ, «سۇڭقار 2015» جشس باسشىسى ۆيكتور لەتۋتا ناگرادتالدى.

«شاپاعات» مەدالىمەن قاراعاندى قالاسىنىڭ №5 ەمحاناسىنىڭ ديرەكتورى مارال بايازيتوۆا جانە پروفەسسور ح. ج. ماقاجانوۆ اتىنداعى كوپسالالى اۋرۋحانانىڭ نەيروحيرۋرگيا ورتالىعىنىڭ جەتەكشىسى عابيت ماحامباەۆ ماراپاتتالدى. قر قۇرمەت گراموتاسى ۇشتوبە تىرەك مەكتەبىنىڭ ديرەكتورى ساۋلە ارتىقباەۆاعا تابىس ەتىلدى.

جۇمىس ساپارى بارىسىندا ۇكىمەت باسشىسى «Forever Flourishing (Middle Asia) Pty Ltd» جشس جوباسىنىڭ II كەزەڭى – بولات پروكاتى مەن شۆەللەرلەر شىعارۋ جەلىسىن ىسكە قوسۋ راسىمىنە قاتىستى. مۇنداعى ءوندىرىس قۋاتى جىلىنا 90 مىڭ توننا ءونىمدى قۇرايدى. جوبا ەلىمىزدىڭ قۇرىلىس سالاسىن بولات پروكاتىمەن قامتاماسىز ەتۋگە جانە وڭدەۋ ونەركاسىبىنىڭ ەكسپورتتىق الەۋەتىن ارتتىرۋعا مۇمكىندىك بەرەدى.

سونىمەن قاتار پرەمەر-مينيستر ساران قالاسىنداعى «Saran» يندۋستريالىق ايماعىنا بارىپ, وندا «Allur» جانە «تاتنەفت» توبىنىڭ جىلىنا 3,5 ملن شينا شىعاراتىن «KamaTyresKZ» شينا زاۋىتىن سالۋ جونىندەگى بىرلەسكەن جوباسىنىڭ ىسكە اسىرىلۋ بارىسىمەن تانىستى. «تاتنەفت» جاق باس ديرەكتورى نايل ماگانوۆ بۇگىنگى كۇنى جوبالاۋدىڭ 78%-عا جانە قۇرىلىس-مونتاجداۋ جۇمىستارىنىڭ 20%-عا ورىندالعانىن باياندادى. قۇرىلىستى 2022 جىلدىڭ IV توقسانىندا اياقتاۋ جوسپارلانعان. كاسىپورىن 1100-دەن استام جاڭا جۇمىس ورنىن اشادى.

ۇكىمەت باسشىسىنا رەسەي فەدەراتسياسىنىڭ ەڭ ءىرى شينا ونەركاسىبى كاسىپورنىندا نيجنەكامسكىدە (تاتارستان) وقىپ جاتقان بولاشاق زاۋىت ماماندارى شىعارعان العاشقى شينا كورسەتىلدى.

سونداي-اق اسقار مامين وقۋشىلار سارايىندا بولىپ, بالالاردىڭ عىلىمي-تەحنيكالىق, مۋزىكالىق-ەستەتيكالىق, پسيحولينگۆيستيكالىق, كوركەمدىك جانە باسقا دا باعىتتاعى ۇيىرمەلەرگە قاتىسۋى ءۇشىن جاعدايلار جاسالعان جاڭادان بوي كوتەرگەن مەكەمەنىڭ تىنىس-تىرشىلىگىمەن تانىستى.

قاراعاندى وبلىسى