«وتباسى بانك» زەينەتاقى جيناعىن دەپوزيتكە اۋدارۋعا قاتىستى مالىمدەمە جاسادى

باسقارما باسشىسىنىڭ ايتۋىنشا, ءبىر رەتتىك زەينەتاقى تولەمىن پايدالانۋ ەرەجەسىنە وزگەرىستەر ەنگىزۋ پروتسەسىن جەدەلدەتۋ تۋرالى شەشىم قابىلداندى.

«يندۋستريا جانە ينفراقۇرىلىمدىق دامۋ مينيسترلىگى بۇيرىقتى مەرزىمىنەن بۇرىن جاريالاۋدى جوسپارلاپ وتىر. ءبىزدىڭ كليەنتتەر ءۇشىن ەرەجەگە ەنگىزىلگەن بۇل وزگەرىستەر جاڭا مۇمكىندىكتەرگە جول اشادى. ءبىز دەپوزيتتەردى تولىقتىرۋ باتىرماسىن 2021 جىلدىڭ 16 جەلتوقسانىندا قوسىپ, ءتورت دەمالىس كۇنى ارنايى شوت پەن دەپوزيت اشۋعا دايىنبىز», دەپ جازدى يبراگيموۆا Facebook پاراقشاسىندا.

ول مۇنى www.enpf-otbasy.kz پلاتفورماسىندا ونلاين رەجيمىندە ىستەۋگە بولاتىنىن ايتتى.

«اقپارات قاۋىپسىزدىگى ماقساتىندا پلاتفورما قازاقستاندىق IP مەكەنجايلاردا عانا قولجەتىمدى جانە پلانشەت نەمەسە ستاتسيونارلىق كومپيۋتەردە جۇمىس ىستەۋگە لايىقتالعان. ەگەر بىرەۋدىڭ پورتالعا كىرە الماي جاتقانى تۋرالى جازباسىن كورسەڭىز, بۇل جازبا اۆتورىنىڭ VPN ارنا ارقىلى تۇسىنىكسىز سايتتارعا كىرىپ, ەندى پلاتفورماعا كىرە الماي جاتقانىن بىلدىرەدى. ونىمدەردى قاراۋ ءۇشىن فيليال قىزمەتكەرلەرىن قاشىقتان جۇمىس ىستەۋگە قوسۋدى باستايمىز», دەپ اتاپ ءوتتى ول.

«وتباسى بانك» اق باسشىسى بانك بولىمشەلەرىنە كەلۋدىڭ ورنىنا وپەراتورمەن ۆيدەوبايلانىس ارقىلى قوسىلۋعا شاقىردى.

سونداي-اق يبراگيموۆا بجزق-داعى بۇرىنعى جەتكىلىكتى شەكتى قولدانۋ مەرزىمىنىڭ ۇزارتىلۋىنا قاتىستى دا پىكىر ءبىلدىردى.

«پرەزيدەنت قاسىم-جومارت توقاەۆ ۇكىمەتكە بۇرىنعى جەتكىلىكتى شەكتى قولدانۋ مەرزىمىن 2022 جىلدىڭ 1 ساۋىرىنە دەيىن ۇزارتۋدى تاپسىردى. ەڭ الدىمەن بۇل 200 مىڭعا جۋىق سالىمشىعا ءوزىنىڭ ءبىر رەتتىك زەينەتاقى تولەمىن پايدالانۋعا مۇمكىندىك بەرەدى. ەڭبەككە قابىلەتتى 170 مىڭعا جۋىق قازاقستاندىق ءبىر اپتا ىشىندە ءوتىنىش بەرگەن. ەگەر ەلدەگى وتباسىنىڭ ورتاشا كوەففيتسيەنتى 3.8 بولسا, وندا 640 مىڭ ادام كەتىپ بارا جاتقان پويىزدىڭ ۆاگونىنا سەكىرۋگە تىرىسقانداي بولدى. ەندى اسىقپاي اقىلعا قونىمدى شەشىمدەر قابىلداۋعا بولادى. ءوتىنىم بەرۋشىگە قاراجاتتى پايدالانۋ ماقساتىن راستاۋعا 45 جۇمىس كۇنى بەرىلەدى. ەگەر اقشا بۇگىن تۇسسە, جەلتوقسانداعى مەرەكەلەردى ەسكەرىپ, 20 اقپانعا دەيىن ۋاقىت بار دەپ ەسەپتەۋگە بولادى», دەپ تۇيىندەدى ول.

ايتا كەتەرى,«وتباسى بانك» – ەلىمىزدەگى تۇرعىن ءۇي قۇرىلىس جيناق جۇيەسىندەگى جالعىز بانك.

ەل پرەزيدەنتى قىركۇيەكتەگى جولداۋىندا قازاقستاندىقتاردىڭ زەينەتاقى جيناعىنىڭ ءبىر بولىگىن جەتكىلىكتى شەكتەن اسقان جاعدايدا «وتباسى بانك» شوتىنا اۋدارا الاتىنى تۋرالى ايتقان. توقاەۆتىڭ سوزىنشە, بۇل شارا قاراجات جيناۋ جانە ونى ساۋاتتى باسقارۋعا ىنتالاندىرادى.