سينوپتيكتەر 8 جەلتوقساندا قانداي اۋا رايى بولاتىنىن ايتتى, دەپ حابارلايدى Egemen.kz.
قازاقستاننىڭ باسىم بولىگىندە اۋا رايى جاۋىن-شاشىنسىز بولادى دەسەك تە, كەيبىر اۋماقتا قار جاپالاقتاپ جاۋادى.
«ەلىمىزدىڭ شىعىسىندا, وڭتۇستىك-شىعىسىندا جانە قاراعاندى وبلىسىنىڭ شىعىسىندا قار جاۋادى. تۇندە شىعىس قازاقستان وبلىسىنىڭ سولتۇستىك-شىعىسىندا قاتتى قار جاۋادى. رەسپۋبليكا بويىنشا كەي جەرلەردە تۇمان, كوكتايعاق, جەلدىڭ كۇشەيۋى كۇتىلەدى, ەلىمىزدىڭ شىعىسى مەن ورتالىعىندا بوران سوعادى», دەپ جازادى «قازگيدرومەت» رمك.
اقمولا وبلىسىنىڭ سولتۇستىك-باتىسىندا, شىعىسىندا جانە ورتالىعىندا تۇمان كۇتىلەدى.
باتىس قازاقستان, اتىراۋ, ماڭعىستاۋ وبلىستارىنىڭ سولتۇستىگىندە تۇمان, وڭتۇستىك-باتىستا جەلدىڭ جىلدامدىعى 15-22 م/س, ماڭعىستاۋ وبلىسىندا شاڭدى داۋىل كۇتىلەدى.
قوستاناي وبلىسىنىڭ سولتۇستىگىندە, سولتۇستىك قازاقستان وبلىسىنىڭ وڭتۇستىك-شىعىسىندا, الماتى وبلىسىنىڭ سولتۇستىك-شىعىسىندا جانە وڭتۇستىگىندە تۇمان كۇتىلەدى.
قىزىلوردا وبلىسىنىڭ سولتۇستىگىندە, تۇركىستان وبلىسىنىڭ وڭتۇستىگىندە جانە تاۋلى اۋداندارىندا تۇمان كۇتىلەدى, كۇندىز قىزىلوردا وبلىسىنىڭ ورتالىعىندا, تۇركىستان وبلىسىنىڭ سولتۇستىگىندە جانە تاۋلى اۋداندارىندا جەل 15-20 م/س كۇشەيەدى, تۇركىستان وبلىسىنىڭ سولتۇستىگىندە شاڭدى داۋىل بولادى.
قاراعاندى وبلىسىنىڭ شىعىسىندا كوكتايعاق, بۇرقاسىن, سولتۇستىك پەن شىعىستا تۇمان كۇتىلەدى.
شىعىس قازاقستان وبلىسىنىڭ سولتۇستىك جارتىسىندا تۇمان, كوكتايعاق, بۇرقاسىن كۇتىلەدى, جەل 15-20 م/س دەيىن كۇشەيەدى.
جامبىل وبلىسىنىڭ سولتۇستىگىندە, تاۋلى جانە تاۋ بوكتەرىندە تۇمان ءتۇسىپ, كوكتايعاق بولادى, تاۋلى اۋدانداردا جەل 15-20 م/س دەيىن كۇشەيەدى.