سەناتور اقىلبەك كۇرىشباەۆ ءوزىنىڭ دەپۋتاتتىق ساۋالىندا جاستار تاربيەسىنە قاتىستى ماسەلەلەر قوعامدا الاڭداۋشىلىق تۋعىزىپ وتىرعانىن ايتىپ, ۇكىمەتتى جوو-لاردا وتكىزىلەتىن تاربيە جۇمىستارىنىڭ ساپاسىن ارتتىرۋعا شاقىردى, دەپ حابارلايدى Egemen.kz.
«باس پروكۋراتۋرانىڭ مالىمەتى بويىنشا, ەلىمىزدە جىل سايىن كوللەدجدەر مەن ۋنيۆەرسيتەتتەردىڭ شامامەن 1,5 مىڭ ستۋدەنتى قىلمىستىق جاۋاپكەرشىلىككە تارتىلادى. 2020 جىلى 18-30 جاس ارالىعىنداعى 4 207 جاس ەسىرتكى زاتتارىن قولدانعانى ءۇشىن ەسەپكە الىندى. ولاردىڭ ىشىندە ۋنيۆەرسيتەتتەردە وقيتىندار دا از ەمەس», دەدى اقىلبەك كۇرىشباەۆ ءوز ساۋالىندا.
ول ەلدەگى جوو-لاردا پسيحولوگتاردىڭ, تەولوگتاردىڭ, سپورت بازالارىنىڭ جەتىسپەيتىنىن, ادامگەرشىلىك-پاتريوتتىق تاربيەنىڭ السىزدىگىن, شىعارماشىلىق بەلسەندى جاستاردى دامىتۋعا ءتيىستى كوڭىل بولىنبەيتىنىن ءسوز ەتىپ, بۇعان كوپتەگەن ءىس-شارالاردىڭ رەسمي سيپاتتا عانا جۇرگىزىلۋى سەبەپ ەكەنىن ءتۇسىندىردى.
«قازىر ۋنيۆەرسيتەت باسشىلارى ستۋدەنتتەرگە «تاربيەلەنۋشى تۇلعا» رەتىندە ەمەس, ۋنيۆەرسيتەتكە «قارجى ءتۇسىرۋدىڭ كوزى» دەپ تىم جايداق قارايدى. انىعىن ايتساق, كوپتەگەن جوعارى وقۋ ورىندارىندا كادرلاردى دايىنداۋ قاراپايىم بيزنەسكە اينالىپ كەتتى. ءتىپتى, ۋنيۆەرسيتەتتەردى اككرەديتتەۋ جۇيەسىندە ستۋدەنتتەردىڭ تاربيە جۇمىسى قاراستىرىلماعان. جالپى, ءبىزدىڭ تاربيە جۇيەمىز ۇلتتىق قۇندىلىقتارىمىزعا نەگىزدەلۋى كەرەك. وكىنىشكە وراي, سوڭعى كەزدە, اسىرەسە, حالىقارالىق دەڭگەيدەگى ۋنيۆەرسيتەتتەردە باتىستىق ۇستانىمدارعا ەلىكتەۋ ورىن الۋدا», دەدى سەناتور.
وسىعان وراي, اقىلبەك كۇرىشباەۆ ۋنيۆەرسيتەتتەردەگى تاربيە جۇمىستارىنىڭ جاي-كۇيىنە سىني تالداۋ جۇرگىزۋدى جانە ونى قازىرگى زامانعى ۇردىستەر مەن دامۋ باسىمدىقتارىنا سايكەس ساپالى جاڭا دەڭگەيگە كوتەرۋ ءۇشىن قاجەتتى شارالار قابىلداۋدى ۇسىندى.