اۋىلعا سالىنعان ينۆەستيتسيا قىسقاردى

وڭىرلىك ءبولىنىس بويىنشا ينۆەس­تيتسيانىڭ باسىم بولىگى اتىراۋ وبلىسىنا (40,1 پايىز) تيەسىلى ەكەن. اتالعان وڭىرگە 1,6 ترلن تەڭگە كولە­مىندە ينۆەستيتسيا قۇيىلعان. وسىنىڭ ءوزى بىلتىرعى كورسەتكىشتەن 28,5 پايىزعا از دەپ حابارلايدى Finprom. ۇزدىك ۇشتىككە اقتوبە (311,7 ملرد تەڭگە – ءبىر جىلدا 26,1 پا­يىزعا كوپ) جانە الماتى (277,1 ملرد تەڭگە – ءبىر جىلدا 1,8 پايىزعا كوپ) وبلىستارى دا كىرەدى. ەڭ تومەنگى كور­سەتكىش پاۆلودار وبلىسىندا – 96,3 ملرد تەڭگە. ءبىر جىل بۇرىنعى دەرەك­تەن 33,5 پايىزعا ازايىپ كەتكەن.

ال بولىنگەن ينۆەستيتسيانى جان باسىنا شاعار بولساق, ءار اۋىل تۇر­عىنىنا 506,5 مىڭ تەڭگەدەن كەلەدى ەكەن. بۇل جاعىنان دا اتىراۋ وبلىسى كوش باستايدى. ادام باسىنا 5,2 ملن تەڭگەدەن. توپ-3-كە اقتوبە (1,2 ملن تەڭگە) جانە باتىس قازاقستان وبلىستارى (598 مىڭ تەڭگە) ەنگەن. ەڭ تومەنگى كورسەتكىش تۇركىستان وبلىسىندا – جان باسىنا شاققاندا 100,8 مىڭ تەڭگەدەن تيەسىلى.

«اۋىلدىق جەرلەردەگى كاپيتال­دىق ينۆەستيتسيانىڭ 80,8 پايىزى كاسىپورىنداردىڭ جەكە قاراجاتى ەسەبىنەن قامتاماسىز ەتىلگەن – 3,2 ترلن تەڭگە. جىلدىق قىسقارۋ 14,1 پايىزعا جەتكەن. تاعى 367,6 ملرد تەڭگەنى بانكتىك ەمەس ۇيىمدار ۇسىنعان. رەسپۋبليكالىق بيۋدجەتتەن 142,9 ملرد تەڭگە ءبولىندى (-19,5 پايىز ءبىر جىلدا). جەرگىلىكتى بيۋدجەتتەن 172,3 ملرد تەڭگە (-20 پايىز ءبىر جىلدا) ءبولىندى. تاعى 71 ملرد تەڭگە بانكتىك نەسيەلەر ەسەبىنەن قۇرالدى. بۇل تۇرعىدان ءبىر جىلدا 40 پايىزعا ءوسىم بار. سالىمنىڭ نەگىزگى بولىگى بيىل قۇرىلىس جانە نىسانداردى كۇردەلى جوندەۋدەن وتكىزۋگە جۇمسالدى. ونىڭ مولشەرى 1,9 ترلن تەڭگەنى قۇرايدى. 877,2 ملرد تەڭگەگە ماشينا, قۇرىلعى جانە ترانسپورتتىق قۇرالدار ساتىپ الىندى» دەپ جازادى Finprom.

ۇكىمەتتىڭ رەسمي سايتىنىڭ حابارلاۋىنشا, اۋىلدىق ەلدى مەكەندەر­دى دامىتۋ ماقساتىندا ەلدە تۇرعىن ءۇيدى قايتا جاڭارتۋ جانە ونىڭ قۇرىلى­سى, اگروونەركاسىپتىك كەشەندى دامىتۋ, شاعىن جانە ورتا كاسىپكەرلىكتى قول­داۋ, ينفراقۇرىلىمعا ينۆەستي­­تسيا سالۋ بويىنشا شارالار اتقارى­لىپ جاتىر. 2019-2020 جىلدارى قازىرگى باع­دارلامالار اياسىندا 618 ملرد تەڭ­گەگە 12 مىڭنان استام جوبا جۇزە­گە اسىرىلعان. الداعى 4 جىلدا «اۋىل – ەل بەسىگى» جوباسىن قارجى­لان­دى­رۋ كولەمى 800 ملرد تەڭگەگە دە­يىن ۇل­عاي­تىلماق. سونداي-اق بار­لىق قار­جى­لاندىرۋ كوزدەرىن ەسەپ­كە الا وتىرىپ اۋىلداردى جاڭعىرتۋعا 1,3 ترلن تەڭگە قارجى ءبولۋ جوسپارلانعان.

قازىر بىزدە باعانىڭ شارىقتاپ تۇرعانى بەلگىلى. وسى ورايدا اۋىل شارۋاشىلىعى ەل ەكونوميكاسىنىڭ درايۆەرىنە اينالىپ, جەتەكشى پوزيتسيادا ءجۇرۋى كەرەك ەدى. الايدا بۇل سەكتوردىڭ دامۋ قارقىنى دا, بەرەر ءونىمى دە كوڭىل كونشىتپەيدى. بۇل تۇرعىدا ەل باسشىلىعى قازاق­ستاننىڭ اۋىل شارۋاشىلىق الەۋەتىن دۇرىس پايدالانا الماي وتىر. سالا­داعى جالاقىنىڭ تومەندىگى دە جۇمىس ساپاسىنا تەرىس اسەر ەتەتىنى بەل­گىلى. ازىق-ت ۇلىك قاۋىپسىزدىگىن تىكە­لەي قامتاماسىز ەتۋگە قابىلەتتى اگرو­ونەركاسىپ كەشەنى قازىر ەلدەگى ەڭ از جالاقى تولەنەتىن سالا قاتا­رىن­دا. اۋىل, ورمان جانە بالىق شارۋا­شىلىعى سالاسىنداعى ورتاشا اي­لىق جالاقى كولەمى – 167,5 مىڭ تەڭ­گە. وسىمدىك, مال ءوسىرۋ, اڭشىلىق سالا­سىنداعى جالاقى بۇدان دا تومەن – 167,1 مىڭ تەڭگە. سەكتورداعى ساتىپ الۋ قابىلەتى 7,7 پايىزعا وسكەن. ال بالىق اۋلاۋ جانە اكۆامادەنيەت سا­لا­سىندا جۇمىس ىستەيتىندەردىڭ ور­ت­اشا ايلىق جالاقىسى 85,7 مىڭ تەڭگە ەكەن.