قازاقستاننىڭ دەنساۋلىق ساقتاۋ مينيسترلىگى Meta كومپانياسىمەن بىرلەسىپ Facebook پلاتفورماسىندا قان دونورلىعى جوباسىن ىسكە قوسادى, دەپ حابارلايدى Egemen.kz.
مينيسترلىك اقپاراتىنا سايكەس, بۇل باستاما قازاقستاندىقتاردى دونور بولۋعا ىنتالاندىرادى.
«Facebook ەلدەگى قان قورىن تولىقتىرۋعا كومەكتەسۋ ماقساتىندا قازاقستاننىڭ دەنساۋلىق ساقتاۋ مينيسترلىگىمەن سەرىكتەس بولدى. بۇل جوبا ادامداردى دونورلىقتان حاباردار ەتىپ, دونور بولۋ جولدارىن ىزدەۋدى جەڭىلدەتەدى», دەدى Meta كومپانياسىنىڭ وكىلدەرى.
بىرنەشە سەكۋند سايىن قازاقستاندا ادام ءومىرىن قۇتقارۋ ءۇشىن قان قۇيۋ قاجەت بولادى, ال ءبىر دونور ءۇش ادامنىڭ ءومىرىن ساقتاپ قالۋى مۇمكىن.
مينيسترلىك اقپاراتىنا سايكەس, كوپ جاعدايدا ادامدار قاندى قايدا جانە قاشان تاپسىرۋعا بولاتىنىن بىلمەيدى. Facebook دونور بولۋ جولدارى, پۋنكتەردىڭ قايدا ورنالاسقانىن, وسى تاقىرىپتاعى ءىس-شارالار تۋرالى اقپاراتتى تەزىرەك تابۋعا كومەكتەسەتىن فۋنكتسيانى ۇسىندى.
«دەنساۋلىق ساقتاۋ جۇيەسى ءۇشىن قان قورىن ساقتاۋ اۋقىمدى ماسەلە ەكەنىن بىلەمىز. قازاقستاندا وسى فۋنكتسيانى ىسكە قوسۋ ارقىلى قان دونورلارىنىڭ سانىن كوبەيتىپ, ناۋقاستاردى قانمەن تۇراقتى تۇردە قامتاماسىز ەتۋگە ۇلەس قوسا الامىز دەپ ۇمىتتەنەمىز», دەدى قىتاي, تايۆان, سينگاپۋر, موڭعوليا جانە ورتالىق ازيانىڭ Meta كومپانياسىنىڭ مەملەكەتتىك ساياسات جونىندەگى باسقارۋشى ديرەكتورى دجوردج چەن.
دەنساۋلىق ساقتاۋ ءمينيسترى الەكسەي تسوي Facebook بۇل ماڭىزدى جوبا ەكەنىن اتاپ ءوتتى.
«پاندەميا كەزىندە دونورلىق بەلسەندىلىك ءبىرشاما تومەندەدى, ادامدار مەديتسينالىق ۇيىمدارعا از بارا باستادى. بىرلەسكەن كۇش-جىگەرىمىزدىڭ ارقاسىندا قان مەن ونىڭ كومپونەنتتەرى تاپشىلىعىنا جول بەرمەۋىمىز كەرەك. الەۋمەتتىك جەلىدەگى وسى جاھاندىق جوبا ەلدەگى قان قورىن ارتتىرۋعا كومەكتەسەدى دەپ سەنەمىن», دەدى الەكسەي تسوي.
ايتا كەتەرى, بۇل فۋنكتسيا 18-65 جاس ارالىعىنداعى ادامدارعا Facebook-تە قان تاپسىرۋ تۋرالى اقپارات الۋعا, جەرگىلىكتى قان تاپسىرۋ ورتالىقتارىندا قان تاپسىرۋ مۇمكىندىگى تۋرالى حابارلامالار الۋعا جانە دوستارىن قان تاپسىرۋعا شاقىرۋعا مۇمكىندىك بەرەدى.
Facebook بۇل اقپاراتتى جاڭالىق ارنالارىندا حابارلاۋ ارقىلى تاراتادى نەمەسە قولدانۋشىلار ونى Facebook-تەن «قان تاپسىرۋ» سۇرانىسى بويىنشا تابا الادى.