Nur Otan پارتياسى ساياسي كەڭەسىنىڭ كەڭەيتىلگەن وتىرىسىندا ەلباسى نۇرسۇلتان نازارباەۆ تاۋەلسىزدىگىمىزدى نىعايتىپ, ەل تۇتاستىعىن ساقتاپ, وتباسىلىق قۇندىلىقتاردى قولداپ, ۇلتتىق مادەنيەتىمىزدى ناسيحاتتاپ, تەرەڭ ءبىلىم مەن ادال ەڭبەككە دەن قويۋ ارقىلى جاسامپاز ەل بولاتىنىمىزدى اتاپ كورسەتە وتىرىپ, حالىققا «ەلدىكتىڭ جەتى تۇعىرى» قاعيداتتار جيىنتىعىن ۇسىنعانى بەلگىلى. بۇگىندە وسى قاعيداتتار جيىنتىعىن قوعام جىلى قابىلداپ وتىر. وسى ورايدا كوپتەگەن وتانداسىمىز رەداكتسيامىزعا اتالعان «ەلدىكتىڭ جەتى تۇعىرى» قاعيداتتارىنا قاتىستى ىستىق ىقىلاسىن بىلدىرە كەلىپ, ءوز وي-پىكىرلەرىن جولداۋدا.
ەلباسى نۇرسۇلتان نازارباەۆ Nur Otan پارتياسى ساياسي كەڭەسىنىڭ وتىرىسىندا «ەلدىكتىڭ جەتى تۇعىرى» قاعيداتتار جيىنتىعىن ۇسىندى. بۇل قاعيداتتاردا ءبىرىنشى قۇندىلىق رەتىندە تاۋەلسىزدىك ايتىلادى. شىنىمەن, سان عاسىر بويى حالقىمىز ەلىنىڭ ازاتتىعىن, بوستاندىعىن اڭساپ كەلدى. وسىدان وتىز جىل بۇرىن وسى ۇلى ارمان شىندىققا اينالىپ, ەگەمەن ەلىمىزدىڭ ۋىعى قادالىپ, شاڭىراعى كوتەرىلدى. كۇن مەن قىران, اسپان بەينەسىندەگى كوك تۋىمىز كوكتە سامعادى. ەلباسى وسى سىندارلى ساتتەردە ءوزى باستاماشى بولىپ, تاۋەلسىز ەلدىڭ ەرتەڭى مەن حالقىنىڭ ءۇمىتىن اقتاۋ جولىندا ايانباي ەڭبەك ەتتى. وتىز جىلداعى تابىستارىمىز – ءبىز ءۇشىن ماقتانىش. كەشەگى قيىن-قىستاۋ كەزدە ەل باسشىسى, ونىڭ حالقى تىزە قوسا وتىرىپ, ەڭسەلى مەملەكەت قۇردى. ەندى ءبىز وسى مەملەكەتتىڭ وتىز جىلدىق مەرەيلى ساتىندە وتكەن جىلدارداعى تابىستارىمىزدى ەرتەڭگى دامۋىمىزدىڭ باستاۋى دەپ ۇعىنعانىمىز ابزال. ءار قازاقستاندىق ءۇشىن تاۋەلسىز ەلىمىزدىڭ وركەندەۋى, وزگە مەملەكەتتەرمەن يىق تىرەسە وتىرىپ, ەرتەڭگى بولاشاققا قادام باسۋى ماڭىزدى بولماق. ەلباسى ايتقانداي, «تاۋەلسىزدىكتى نىعايتۋ – ەكونوميكانى نىعايتۋدىڭ نەگىزى». «جەتى تۇعىرداعى» العاشقى قۇندىلىق دەپ اتالعان تاۋەلسىزدىك ۇعىمى – ءبىزدىڭ ماڭگىلىك قۇندىلىقتارىمىزدىڭ ءبىرى.
ال «ەلدىكتىڭ جەتى تۇعىرىندا» «بىرلىك پەن كەلىسىم – ەلدىگىمىزدىڭ مىزعىماس تۇعىرى» دەلىنگەن. بۇل دا – ءبىزدىڭ قازىرگى قوعام ءۇشىن ايتىلۋعا ءتيىستى ءسوزدىڭ ءبىرى. ارينە, بىرلىگى بولماعان ەلدىڭ دامۋى دا, ەكونوميكاسى دا, ىشكى ىنتىماعى دا كەرى كەتەدى. ەلباسىنىڭ سارابدال ساياساتى وسى قۇندىلىقتى باستى نازاردا ۇستاپ كەلەدى. دۇنيەجۇزىندەگى دامىعان ەلدەردىڭ تاجىريبەسىنە كوز سالساق, ءبارى دە ىشكى ىنتىماقتى الدىڭعى ورىنعا قويعان. وسى ۇستانىم ولاردىڭ كۇن ساناپ دامۋىنا, ەلدىك پەن ىنتىماقتىڭ التىن شەجىرەسىن جازۋىندا ماڭىزدى ءرول وينادى. ۇزاق بولاشاقتى كوزدەگەن ەلباسى وسى تۇرعىدان مەملەكەتىمىزدىڭ ماڭگىلىك ەل بولۋىنداعى دارا جولىنا بەرەكە-بىرلىك ارقىلى جەتۋگە ۇندەپ وتىر. بۇل – ءبىز ءۇشىن دەر كەزىندە ايتىلعان وي-تولعام.
كەلەسى قۇندىلىق – جەر تۋرالى. ەلباسى بۇل جونىندە «جەردەن قاسيەتتى ەشنارسە جوق» دەپ اشىق ايتتى. بۇل ءاربىر اشىق ويلى قازاقستاندىقتىڭ ساناسىنا تەرەڭ ۇيالايتىن ءسوز بولۋعا ءتيىس. ءبىزدىڭ بابالارىمىز «اق نايزانىڭ ۇشىمەن, اق بىلەكتىڭ كۇشىمەن» قورعاپ, ۇرپاقتارىنا اماناتتاعان قاسيەتتى جەرىمىزدى قورعاۋ, ونى كەلەسى ۇرپاققا تابىستاۋ دا – ءبىز ءۇشىن ۇلكەن جاۋاپكەرشىلىك. ەگەمەن ەلىمىزدەگى ءار جاس سالماقپەن ويلايتىن ماسەلەنىڭ ءبىرى دە – وسى جەر ماسەلەسى. ەلباسى ءبىزدىڭ ەلىمىزدىڭ شەكاراسىن شەگەندەپ, كورشىلەرمەن باسىن اشىپ, قۇجات جۇزىندە بەكىتتى. بۇل دا – تاۋەلسىز ەلىمىزدىڭ وتىز جىلىنداعى ماڭىزدى تابىستاردىڭ ءبىرى دە بىرەگەيى.
وتباسى, اتا-بابا ءداستۇرى دە – وسى ۇندەۋدىڭ ىشىندەگى ەڭ ءتۇيىندى ماسەلە. قوعامداعى ءار وتباسى الدىمەن وتباسىن, سوسىن وتانىنا دەگەن سۇيىسپەنشىلىگىن تەرەڭدەتۋ ءۇشىن ءوزىن دامىتۋ كەرەك دەپ ويلايمىن. وتباسى تىنىش ادامنىڭ وتانعا دەگەن ماحابباتى دا شەكسىز. قازاق حالقىنىڭ دالالىق مادەنيەتىندەگى وتباسى تاربيەسىنىڭ عىلىمي نەگىزدى تۇستارى وتە كوپ. ونى بۇگىنگى قوعامدىق جاعدايلارمەن بىرلەستىرە وتىرىپ, سانالى ۇرپاق تاربيەلەۋگە اتسالىسۋىمىز كەرەك.
ال مادەنيەت تۋرالى كوپ ايتۋعا بولادى. جاھانداعى حالىقتاردىڭ كوبى مادەنيەت پەن وركەنيەتكە كوڭىل ءبولۋدى باستى ماسەلە رەتىندە قارايدى. ءححى عاسىرداعى ءبىز ءۇشىن مادەنيەت اۋاداي قاجەت. قازاقتىڭ ۇلتتىق مادەنيەتى ەشكىمنەن كەم ەمەس. ونىڭ قاينارى كەشەگى اتا-بابالار جاساعان ەركىن زامان, تىنىستى قوعام. ءبىز سولاردىڭ اسىل مادەنيەتىن جالعاستىرۋشىلارىمىز. ەندىگى ۇرپاق ءۇشىن مادەنيەتتى بولۋ – زامانعا ساي تۇلعا بولۋدىڭ, ءبىلىمدى ادام بولۋدىڭ العىشارتى.
ءبىلىم تۋرالى دا ەلباسى ءوز ويىن حاكىم ابايدىڭ دانالىعىمەن جەتكىزدى. ءبىز قازىرگىدەي عىلىم مەن تەحنيكا, ءبىلىم قارىشتاپ دامىعان زاماندا جاساپ وتىرمىز. «بىلەگى جۋان ءبىردى جىعادى, ءبىلىمى جۋان مىڭدى جىعادى» دەپ دانا حالقىمىز ايتقانداي, ءبىلىم ارقاشان قارۋدىڭ ەڭ وزىعى بولعان. ءبىزدىڭ ۇلتىمىزدىڭ تاريحىنداعى دانىشپاندار, ەل تۇتقاسىن ۇستاعان تۇلعالار زامانعا ساي ءبىلىم الىپ, ونى ەلىنىڭ, جەرىنىڭ قاجەتىنە جۇمساعان. ەندىگى وسكەلەڭ ۇرپاقتىڭ دا وزىنە, ۇلتىنا دەگەن جاۋاپكەرشىلىگى ءبىلىمدى بولۋدان باستالادى.
باسەكەگە قابىلەتتىلىك كوركەيۋ جولىنا نىقتاپ كىرىسكەن قازاقستان ءۇشىن اسا ماڭىزدى. جەر شارىندا جاساپ جاتقان ەلدەردىڭ ءبارى زاماناۋي باسەكەلىككە ساي جۇمىستار اتقارىپ, ءوز ەلىنىڭ دامۋىنا مۇمكىندىكتەر قاراستىردى. بۇل تاجىريبەلەر بىزگە ۇلگى بولۋى ءتيىس. مەملەكەت ءۇشىن دە, جەكە تۇلعا ءۇشىن دە باسەكەگە قابىلەتتى بولۋدىڭ پايداسى زور. سىناقتان كەيىن ارينە جەڭىس كۇتىپ تۇرادى. ەلباسى ءوز ۇندەۋىندە وسى كۇلتەلى ماسەلەلەردى ەلدىڭ يگىلىگى ءۇشىن, ەلىمىز بەن جەرىمىزدىڭ العا قادام تاستاۋى ءۇشىن ايتقانىن انىق تۇسىنەمىز. ۇندەۋگە نەگىز بولعان «ەلدىكتىڭ جەتى تۇعىرى» ەل بولاشاعىنا ارنالعان وي-تولعامدار ەكەنى داۋسىز.
ماقپال تاجماعامبەتوۆا,
ءماجىلىس دەپۋتاتى, Nur Otan پارتياسى فراكتسياسىنىڭ مۇشەسى