كەز كەلگەن ۇلتتى قالىپتاستىراتىن ورتا – ونىڭ ۇلتتىق ءبىلىم ورداسى. سوندىقتان قازاق مەكتەبىنىڭ تاعدىرى – ەل تاعدىرى. ۇلتىمىزدىڭ بولاشاعىن ويلاعان الاشتىڭ ارداقتىلارى مۇنى ارقاشان ەسكەرىپ وتىرعان. قازاق حالقىنىڭ ۇلى پەرزەنتى مۇستافا شوقاي «ۇلتتىڭ مادەنيەتتەن جۇرداي رۋحپەن تاربيەلەنگەن ۇرپاقتان حالقىمىزدىڭ قاجەتى مەن مۇددەسىن جاقتايتىن پايدالى ازامات شىقپايدى» دەپ, ۇلت بولاشاعىن ۇلتتىق ءبىلىم بەرۋ ورداسىندا, ۇلتتىق رۋحتا تاربيەلەۋ كەرەكتىگىن باسا ايتقان.
تاۋەلسىزدىككە 30 جىل تولۋىنا وراي ءبىلىم ورداسىنىڭ بەلسەندى جەتەكشىلەرى 5 «ا» سىنىپ جەتەكشىسى دينارا بەيسەنبينوۆنا مەن 6 «ج» سىنىپ جەتەكشىسى مەرۋەرت ەركىنبەكقىزى سىنىبى جانە اتا-انالارمەن بىرلەسكەن جۇمىس توڭىرەگىندە ء«بىز جاس ۇرپاق ˗ تابيعات قورعانى» دەگەن ۇراندى ۇستانا وتىرىپ تاعىلىمدىق, تاربيەلىك ءمانى زور ءىس-شارانى جۇزەگە اسىردى. نەگىزگى ماقسات – كورىكتى جەردى كوپشىلىككە تانىستىرۋ, ادامنىڭ بويىنا قۋات, كوڭىلىنە شابىت, سەزىمىنە ءلاززات شاپاعاتىن ۇيالاتاتىن سۇلۋلىق پەن اسەمدىك الەمىن ۇرپاق يگىلىگىنە جاراتۋ. تۋعان جەردىڭ تاعدىرىنا تولعاناتىن, جانى تەبىرەنىپ سول تۋرالى ويلايتىن ۇرپاق تاربيەلەۋ جولىندا ءماشھۇر ءجۇسىپ اتىنداعى №57 ورتا مەكتەپتىڭ ءبىلىم الۋشىلارى سىنىپ جەتەكشىلەرىمەن بىرگە بۋراباي تابيعاتىن تاماشالاۋعا جول تارتتى.
اقمولا وبلىسىنا قاراستى شورتاندى قالاسىنان 20 شاقىرىمداي قاشىقتىقتاعى بۋراباي كولىنىڭ جاعاسىندا ابىلاي الاڭى, وقجەتپەس, بۋراباي كەنتى, بۋراباي قورىمى, جەكە باتىر تاريحي-مادەني ورىندارىمەن وقۋشىلار كەڭىنەن تانىستى جانە ءاربىر تاريحي اڭىزدىڭ اتاۋى مەن تىلسىم تابيعاتتىڭ تىرشىلىگى, ماڭگى توزباس قۇتتى مەكەن قونىس بولاتىنى تۋرالى تەرەڭ ماعلۇمات الدى. اسىرەسە, «ابىلاي الاڭى» وقۋشىلاردىڭ نازارىن وزدەرىنە قاتتى اۋداردى. ءۇش ءجۇزدىڭ باسىن قوسىپ, ەل ەرتەڭى ءۇشىن كەلەلى كەڭەستەر مەن ماڭىزدى شەشىم قابىلداعان حان تاعىن, ورنالاسقان جەردى كورۋ وقۋشىلارعا قاتتى اسەر قالدىردى. وقۋشىلار «قانشا عاسىر وتكەن ەل بيلەۋشىسىنىڭ تاعى ءالى ساقتالعان با؟» دەگەن سۇراقتار قويىپ جاتتى.
تابيعاتقا مەيىرىمدىلىكپەن, سۇيىسپەنشىلىكپەن, قامقورلىقپەن قاراپ, ۇيلەسىمدىلىك ساقتاعاندا, ادامزات بالاسى ءۇشىن تابيعات كەڭ ساراي ەكەنى ايتىلدى. جالپى, تىرشىلىك اتاۋلىنىڭ بارلىعى جەر-اناعا, تابيعاتقا قارىزدار ەكەنى بولاشاق ۇرپاقتىڭ ساناسىنا بەكي ءتۇستى. سوندىقتان دا تابيعاتقا نەمقۇرايلى قاراۋ, ونىمەن ساناسپاۋ – انا ءسۇتىن اقتاماعانمەن پارا-پار. كوزىمەن كورىپ, قولىمەن ۇستاعان ۇرپاقتىڭ سەزىمىنە سەلك ەتكىزەر شوكىمدەي وي تاستاپ, ويلانتۋ سىنىپ جەتەكشىلەردىڭ باستى ماقساتى بولاتىن. شىنىندا دا ايالى تابيعاتتى ايالايتىن ۇرپاقتى كورۋ – ماقتانىش.
ادام بالاسى تابيعاتتىڭ ەڭ ۇلى پەرزەنتى بولۋمەن بىرگە, ەڭ ۇلى قامقورشىسى دا ەكەنىن ەشقاشان ەستەن شىعارماۋىمىز كەرەك.
گۋلفايرۋز داۋلەتوۆا,
نۇر-سۇلتان قالاسىنداعى
ءماشھۇر ءجۇسىپ اتىنداعى №57 ورتا
مەكتەپتىڭ قازاق ءتىلى مەن ادەبيەتى
ءپانىنىڭ مۇعالىمى