الەم حالقى جىلىنا 120 مىڭ توننادان استام ۇلۋدى تاڭسىق اس رەتىندە تۇتىنادى ەكەن. مۇنىڭ ءوزى جالپى سۇرانىستىڭ 60-70 پايىزىن عانا جاباتىن كورىنەدى. توبىل وڭىرىندە تۇڭعىش ۇلۋ فەرماسىن اشقان ەرلى-زايىپتى ستاركوۆتاردىڭ ايتۋىنشا, ونى ءوسىرۋ كوپ قارجىنى كەرەك ەتپەيدى جانە باسەكەسى از ءارى تابىستى بيزنەس بولىپ سانالادى.
كارانتين كەزىندە الەۋجەلىنى ءارلى-بەرلى ساپىرىپ تابىس كوزىن ىزدەگەن ەرلى-زايىپتىلار تاۋەكەل دەپ بۇرىن-سوڭدى قۇلاق ەستىپ, كوز كورمەگەن جاڭا كاسىپ – ۇلۋ وسىرۋگە بەل بايلايدى. وسىلايشا, بيىل جازدا قوستاناي قالاسىندا ۇلۋ فەرماسىن اشتى. كاسىپكەرلەر باستاپقىدا ۇلۋدىڭ انالىعىن تاپپاي ءبىراز قينالىپتى. مۇنداي فەرمالار قازاقستاندا جوق, ال رەسەي شەكاراسى جابىق. اقىرى ىزدەگەندەرى بەلارۋس ەلىنەن تابىلىپ, ەكى ايدىڭ ىشىندە قوراپ-كونتەينەرمەن قوستانايعا جەتكىزىلگەن. جاندىكتەردىڭ 20 پايىزى جولدى كوتەرە الماپتى. ەندى قالعانىن قايتىپ كوبەيتپەك؟ وزدەرى كوپقاباتتى ۇيدەگى پاتەرلەردىڭ بىرىندە تۇرادى.
– الدىمەن 8 سوتىق جەرى بار ساياباق ساتىپ الدىق تا, جاندىكتەردى سول جەردەگى ءشوپتىڭ اراسىنا توكتىك. سوسىن 2 اي بويى ءشوپتىڭ اراسىنا ۇڭىلدىك تە وتىردىق. باسىندا ەشتەمە كورىنبەپ ەدى, كەيىن كادىمگىدەي جىبىرلاپ, تىرشىلىك نىشانىن سەزدىرە باستادى. وسىلايشا, بىرتە-بىرتە ۇلكەيە بەردى, – دەدى ۆاسيلي ستاركوۆ.
جاندىكتەر كوبەيە باستاعان سوڭ, ستاركوۆتار وتباسى پاتەرلەرىن ساتىپ, جەكە ۇيگە قونىس اۋدارىپ, اۋلاسىنا جىل ون ەكى اي بويى ۇلۋ وسىرۋگە بولاتىن جىلىجاي سالادى. وكسانا ستاركوۆانىڭ ايتۋىنشا, جاندىكتەردى ساۋداعا شىعاراتىن كەز ءالى جەتكەن جوق. سوعان قاراماستان, الەۋمەتتىك جەلىدەگى جەكە پاراقشالارىنا كەلىپ جاتقان سۇرانىس كوپ.
– ساتاتىن كەزدە ەرتەرەك حابار بەرىڭىزدەرشى, ءوزىمىز كەلىپ الىپ كەتەمىز دەگەن وتىنىشتەر كوپ ءتۇسىپ جاتىر. كاسىپتى ءوز كۇشىمىزبەن اشتىق. بىراق ونى ءارى قاراي دامىتۋ ءۇشىن مەملەكەتتىڭ قولداۋىنا سۇيەندىك. كاسىپكەرلەر پالاتاسىندا بيزنەس نەگىزدەرى كۋرسىن ءتامامداپ, فەرمانى دامىتۋعا قاجەتتى قارجى گرانتىن ۇتىپ الدىق. الايدا ۇلۋ مەملەكەتتىك رەەستردە جوق بولىپ شىقتى. سوندىقتان ءونىمدى نارىققا شىعارۋ ءۇشىن مەملەكەتتىك سەرتيفيكات الۋعا تۋرا كەلەدى, – دەدى وكسانا.
ستاركوۆتار وتباسى الداعى ۋاقىتتا توبىل وڭىرىندەگى سۇرانىستى عانا قامتىپ قويماي, ونىمدەرىن وبلىستان تىس ايماقتارعا دا شىعارۋدى كوزدەپ وتىر.
قوستاناي وبلىسى