بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش ەفيوپياداعى سوعىس قيمىلدارىن توقتاتۋعا شاقىردى, دەپ حابارلايدى Egemen.kz.
بۇل تۋرالى Reuters اگەنتتىگى ءمالىم ەتتى.
كولۋمبياعا ۇكىمەت پەن دەموبيليزاتسيالانعان رەۆوليۋتسيالىق قارۋلى كۇشتەر (FARC) اراسىنداعى بەيبىت كەلىسىمنىڭ بەس جىلدىعىن اتاپ ءوتۋ ءۇشىن بارعان گۋتەرريش سوعىس قيمىلدارىن تەز ارادا توقتاتۋعا شاقىردى.
«بۇگىنگى كولۋمبياداعى بەيبىتشىلىك پروتسەسى مەنى ەفيوپياداعى قاقتىعىس تاراپتارىن جانە اتىستى دەرەۋ توقتاتۋعا شاقىرۋعا شابىتتاندىردى», دەدى گۋتەرريش كولۋمبيا پرەزيدەنتى يۆان دۋكەمەن بىرگە سويلەگەن سوزىندە.
بۇۇ باس حاتشىسىنىڭ پىكىرىنشە, ەفيوپياداعى اسكەري ءىس-قيمىلداردى توقتاتۋ ەفيوپيالىقتار اراسىندا ديالوگ ورناتۋعا مۇمكىندىك بەرەدى, بۇل ءوز كەزەگىندە ءوڭىر تۇراقتىلىعىنا ءوز ۇلەسىن قوسادى.
«كولۋمبيانىڭ ەفيوپيا باسشىلارىنا ۇلگى بولعانىن قالايمىن», دەپ تولىقتىردى گۋتەرريش.
ەفيوپيا بيلىگى مەن تيگراي بيلىگىندەگى سولشىل پارتيا «تيگرايدى ازات ەتۋدەگى حالىقتىق مايدان» (TPLF) اراسىنداعى قارۋلى قاقتىعىس 2020 جىلدىڭ 4 قاراشاسىندا باستالدى.
بۇۇ مالىمەتتەرى بويىنشا, قاقتىعىس سالدارىنان ونداعان مىڭ ادام ەفيوپيادان سۋدانعا قاشىپ كەتكەن. ۇيىم بىرنەشە رەت ەفيوپيالىق تيگراي ايماعىنىڭ تۇرعىندارى كەيىنگى ونجىلدىقتا بۇرىن-سوڭدى بولماعان اشارشىلىق الدىندا تۇرعانىن حابارلادى.