قر تۇڭعىش پرەزيدەنتى – ەلباسى فورۋم قاتىسۋشىلارىنا بەينەۇندەۋ جاسادى. «بارشاڭىزدى تاۋەلسىزدىكتىڭ وتىزجىلدىق مەرەيتويىمەن شىن جۇرەكتەن قۇتتىقتايمىن. بۇل ءتاڭىردىڭ ءبىزدىڭ ۇرپاققا بەرگەن باعا جەتپەس ۇلكەن سىيى. وتىز جىل - حالقىمىز ءۇشىن تاريحي بەلەس. ءبىز وسى ۋاقىت ىشىندە اتا-بابامىز ارمانىن ورىنداپ قانا قويماي, ونى باياندى ەتە بىلدىك. قازاقستاندى الەم تانىعان, جاھان مويىنداعان, ىرگەلى مەملەكەتكە اينالدىردىق», دەدى نۇرسۇلتان ءابىش ۇلى نازارباەۆ.
فورۋمنىڭ ءىس-شارالارىنا قر پارلامەنتى سەناتىنىڭ توراعاسى ماۋلەن اشىمباەۆ, اقپارات جانە قوعامدىق دامۋ ءمينيسترى ايدا بالاەۆا, پارلامەنت دەپۋتاتتارى, سونداي-اق ەلىمىزدىڭ بارلىق وڭىرلەرىندەگى قازاقستاننىڭ پروگرەسسيۆتى جاستارىنىڭ وكىلدەرى قاتىستى.
قر پارلامەنتى سەناتىنىڭ توراعاسى ماۋلەن اشىمباەۆ «تاۋەلسىزدىك ۇرپاقتارى» فورۋمىن وتكىزۋ اياسىندا عىلىمي, شىعارماشىلىق, قوعامدىق قىزمەتى, سونداي-اق جوعارى سپورتتىق جەتىستىكتەرى ءۇشىن «دارىن» مەملەكەتتىك جاستار سىيلىعىنىڭ لاۋرەاتتارىنا ديپلومدار تابىس ەتتى. ول دارىندى جاستاردىڭ جاڭا بۋىنى قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆ پەن مەملەكەت باسشىسى ق.ك.توقاەۆتىڭ جاستاردى قولداۋداعى جوعارى ءرولىن اتاي وتىرىپ, مىقتى جانە بەيبىتسۇيگىش مەملەكەت قۇرۋ باعىتىن جالعاستىراتىنىنا سەنىم ءبىلدىردى.
سەنات توراعاسى ءوز سوزىندە قاتىسۋشىلاردى تاۋەلسىزدىكتىڭ 30 جىلدىعىمەن جانە تۇڭعىش پرەزيدەنت كۇنىمەن قۇتتىقتادى. ول سونداي-اق قازاقستاننىڭ ەلىمىزدىڭ تاۋەلسىزدىك العالى قول جەتكىزگەن جەتىستىكتەرگە توقتالا كەلىپ, قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ جاستاردى قولداۋعا ارنالعان باستامالارى تۋرالى جان-جاقتى ايتىپ بەردى.
«تاۋەلسىزدىكتىڭ العاشقى جىلدارىنان باستاپ جاستارىمىز الەمنىڭ ەڭ وزىق جوعارى وقۋ ورىندارىندا ءبىلىم الۋ ءۇشىن «بولاشاق» باعدارلاماسى ىسكە اسىرىلدى. باعدارلاما ارقىلى قازاقستاندىق جاستار الەمنىڭ ەڭ ۇزدىك ۋنيۆەرسيتەتتەرىندە ءبىلىم الدى. وسى جىلدارى 1800 شاماسىندا جاڭا مەكتەپ سالىندى. ۇلت دەنساۋلىعىن جاقسارتۋ جولىندا جاڭا اۋرۋحانالار مەن عىلىمي مەديتسينا ورتالىقتارى بوي كوتەردى. تاۋەلسىزدىك العالى 1800-دەن استام دەنساۋلىق ساقتاۋ نىسانى سالىنىپ, پايدالانۋعا بەرىلدى. ەلىمىزدىڭ, اسىرەسە, وڭىرلەر مەن اۋىل-ايماقتىڭ ينفراقۇرىلىمىن جەتىلدىرۋگە باعىتتالعان كوپتەگەن جوبالار جۇزەگە اسىرىلدى. مۇنىڭ ءبارى, ەڭ الدىمەن, جاستارىمىزدىڭ ءبىلىمدى, دەنى ساۋ, باسەكەگە قابىلەتتى بولىپ قالىپتاسۋى ءۇشىن جاسالدى», دەدى ماۋلەن اشىمباەۆ.
سەنات توراعاسى سونىمەن قاتار كۇنى كەشە Nur Otan پارتياسى ساياسي كەڭەسىنىڭ وتىرىسىندا ەلباسى «ەلدىكتىڭ جەتى تۇعىرى» اتتى قاعيداتتار جيىنتىعىن جاريالاپ, قازاقستاندىقتاردىڭ جاڭا داۋىردەگى باستى باعدارىن ايقىنداپ بەرگەنىن ايتتى. تۇڭعىش پرەزيدەنت ءسوزىن تىلگە تيەك ەتكەن ماۋلەن اشىمباەۆ تاۋەلسىزدىكتى, بىرلىك پەن كەلىسىمدى, اتا-بابادان ميراس بولعان جەردى, وتباسىلىق قۇندىلىقتار مەن سالت-ءداستۇردى, ۇلتتىق مادەنيەتتى ساقتاپ, ءبىلىم مەن ەڭبەككە جانە پراگماتيزمگە باسىمدىق بەرۋ ارقىلى جاسامپاز ۇلت بولىپ قالىپتاساتىنىمىزدى اتاپ ءوتتى.
سەنات توراعاسى مەملەكەت باسشىسى قاسىم-جومارت توقاەۆتىڭ تاپسىرماسىمەن سوڭعى جىلدارى ەلىمىزدە جاستار ساياساتى اياسىندا اۋقىمدى جۇمىس اتقارىلعانىن دا جەتكىزدى. ولاردىڭ قاتارىندا ۆولونتەر جىلىن وتكىزۋ, پرەزيدەنتتىك جاستار كادرلىق رەزەرۆىن قۇرۋ, ساياسي پارتيالاردىڭ سايلاۋ تىزىمىندە ايەلدەر مەن جاستار ءۇشىن مىندەتتى 30 پايىزدىق كۆوتانى زاڭمەن ەنگىزۋ جونىندەگى باستاما جانە تاعى باسقالارى بار.
«پرەزيدەنتىمىزدىڭ باستاماسىمەن جاستاردى قولداۋعا ارنالعان جۇيەلى جوبالار ىسكە اسىرىلۋدا. مەملەكەت تاراپىنان جاستار ءۇشىن ءتيىمدى جانە ادىلەتتى الەۋمەتتىك ليفت قالىپتاستىرۋعا باسا ءمان بەرىلۋدە. وسىنىڭ نەگىزىندە پرەزيدەنتتىك جاستار كادرلىق رەزەرۆى جاساقتالىپ, بىلىكتى جاستار ىرىكتەلدى», دەدى سەنات توراعاسى.
ەل تاۋەلسىزدىگىنىڭ 30 جىل ىشىندەگى ەلباسى نۇرسۇلتان نازارباەۆتىڭ جاستار ساياساتى سالاسىنداعى باستامالارىنىڭ پراكتيكالىق ماڭىزدىلىعى جونىندە اقپارات جانە قوعامدىق دامۋ ءمينيسترى ايدا بالاەۆا ەگجەي-تەگجەيلى توقتالدى. اتاپ ايتقاندا, مينيستر مەملەكەتتىك جاستار ساياساتى تۋرالى زاڭدى, «بولاشاق» حالىقارالىق ستيپەندياسىن, تالانتتى, ەڭبەكقور جانە بەلسەندى جاستاردى قولداۋعا باعىتتالعان «دارىن» مەملەكەتتىك سىيلىعىن; سونداي-اق «ديپلوممەن اۋىلعا», «جاسىل ەل» «جاستار پراكتيكاسى», «سەرپىن» جوبالارىن جانە ت.ب. ەرەكشە اتاپ ءوتتى.
«مەملەكەت باسشىسى قاسىم-جومارت توقاەۆ جاستاردى قولداۋ ساياساتىنىڭ ساباقتاستىعىن جالعاستىرىپ كەلەدى», دەدى ا.بالاەۆا.
اتاپ ايتقاندا, پرەزيدەنتتىڭ تاپسىرماسى بويىنشا مينيستر قازاقستان جاستارىن دامىتۋ يندەكسىنىڭ جوباسى ازىرلەنگەنىن, ول بويىنشا جەرگىلىكتى ورگانداردىڭ جاستار ساياساتىن ىسكە اسىرۋ جونىندەگى جۇمىسى ناقتى كريتەريلەر نەگىزىندە باعالاناتىندىعى جونىندە ايتىپ بەردى. ا.بالاەۆا اتالعان يندەكس كەلەسى جىلدان باستاپ قازاقستاننىڭ بارلىق 17 وڭىرىندە ەنگىزىلەتىنىن حابارلادى.
وتكەن فورۋمنىڭ ماڭىزدى بولىگى 2041 جىلعى بولاشاق ۇرپاققا جولداۋى بار كريپتوكاپسۋلانىڭ ىسكە قوسىلۋى بولدى. بۇل كريپتوكاپسۋلا قازاقستان تاۋەلسىزدىگىنىڭ 50 جىلدىعىنا وراي اشىلادى دەپ جوسپارلانۋدا. ونى ەل تاۋەلسىزدىگىنىڭ 30 جىلدىعى جاستارىنىڭ وكىلدەرى اتىنان ماتەماتيكا ءپانى بويىنشا حالىقارالىق وليمپيادا جەڭىمپازى سۇلتانبەك بايجانوۆ ىسكە قوستى. كريپتوۆاليۋتانى جاس ستارتاپەر تيمۋر رىسبەكوۆ ارنايى ازىرلەگەنىن اتاپ وتكەن ءجون.
فورۋم بارىسىندا جاس بەلسەندىلەردىڭ باستاماشىل توبى ەلباسى ن.ءا.نازارباەۆقا «العىس كىتابىن» تابىس ەتۋدى ۇسىندى. وندا قازاقستان تاۋەلسىزدىگىنىڭ ارقاسىندا كاسىبي جانە قوعامدىق ماڭىزى بار تابىستارعا قول جەتكىزگەن ەل جاستارى وكىلدەرىنىڭ العىس سوزدەرى جيناقتالعان.
قازاقستان جاستارىنىڭ «تاۋەلسىزدىك ۇرپاقتارى» فورۋمى اياسىندا بەلسەندى جاستارعا ارنالعان فورسايت-سەسسيالار: بيزنەسمەندەر, زەرتتەۋشىلەر, ۇەۇ كوشباسشىلارى, بۇۇ وكىلدەرى قاتارىنان بەلگىلى سپيكەرلەردىڭ قاتىسۋىمەن قازاقستان جاستارىن تولعاندىراتىن ءتۇرلى وزەكتى تاقىرىپتار بويىنشا ءوتتى.
فورسايت-سەسسيالار «تۇلعانى دامىتۋ ترەندتەرى», «سپيرالدى ديناميكا. ادامزاتقا قولجەتىمدى ويلاۋدىڭ تاسىلدەرى», «حالىقارالىق ۆولونتەرلىك – جەكە تۇلعانىڭ دامۋىنىڭ جاڭا ترەندى رەتىندە», «الەمدەگى جانە قازاقستانداعى كاسىپكەرلىكتىڭ تسيفرلىق ترانسفورماتسياسى», «XXI عاسىرداعى حالىقارالىق دامۋعا جاردەمدەسۋ: نەگىزگى ۇردىستەر» سەكىلدى تاقىرىپتارعا ارنالعان.