نۇر-سۇلتان قالاسى كاسىپكەرلەر پالاتاسىنىڭ ۇيىمداستىرۋىمەن ەلوردادا العاش رەت «باستاۋ بيزنەس» جوباسى تۇلەكتەرى ونىمدەرىنىڭ جارمەڭكەسى ءوتتى. قالا تۇرعىندارى مەن قوناقتارى ەلوردادا وندىرىلەتىن تاۋارلاردى كورىپ, ساتىپ الۋ مۇمكىندىگىنە يە بولدى. جارمەڭكەدە زەرگەرلىك بۇيىمدار مەن كيىم-كەشەك, توقىما تاۋارلارى, ويىنشىقتار, كارتينالار, كادەسىيلار جانە باسقا دا ونىمدەر ۇسىنىلدى.
«باستاۋ بيزنەس» جوباسى نۇر-سۇلتان قالاسىندا 2019 جىلدان باستاپ «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى شەڭبەرىندە ىسكە اسىرىلۋدا. ءۇش جىل ىشىندە كاسىپكەرلىك نەگىزدەرىنە 6,2 مىڭنان اسا ادام وقىدى. جوبا تۇلەكتەرى 1,7 مىڭنان اسا جاڭا كاسىپكەرلىك سۋبەكتىنى اشتى, 3 مىڭنان اسا جاڭا جۇمىس ورنى قۇرىلدى», دەپ اتاپ ءوتتى نۇر-سۇلتان قالاسى كاسىپكەرلەر پالاتاسىنىڭ ديرەكتورى المات ءجۇنىسوۆ.
2019-2021 جىلدارى 2 061 قاتىسۋشى جوباسىن جۇرگىزۋگە قارجىلاندىرۋ الدى, ونىڭ ىشىندە 1 957 ادام 200 اەك-كە دەيىنگى مەملەكەتتىك گرانتتار, 59 تۇلەك 2-5 ملن تەڭگەدەن باستالاتىن گرانتتار الىپ, جوبانىڭ 47 قاتىسۋشىسى «اۋىل شارۋاشىلىعىن قارجىلاي قولداۋ قورى» اق ارقىلى قارجىلاندىرىلدى. مىسالى, جوبا تۇلەگى ءاليا توقتاناەۆا 200 اەك كولەمىندە گرانت, سونىمەن قاتار «بيزنەستىڭ جول كارتاسى-2025» مەملەكەتتىك باعدارلاماسى اياسىندا 5 ملن تەڭگە گرانت الدى. وسى قاراجاتقا كاسىپكەر بالالاردى دامىتاتىن اعاش ويىنشىقتاردىڭ ءوندىرىسىن جولعا قويدى. كەلەسى تۇلەك الماش كەرەيبايقىزى گرانت قاراجاتىنا (200 اەك) كيىزدەن جاسالعان بۇيىمدار: ەرلەر مەن ايەلدەر باس كيىمىن, كۇرتەشە, ەتىك ءوندىرىسىن ىسكە قوستى.
كاسىپكەرلىك نەگىزدەرىن مۇمكىندىگى شەكتەۋلى ادامدار دا وقىپ جاتىر. مىسالى, سۇلۋشاش احمەتجانوۆا «باستاۋ بيزنەس» جوباسىندا ءبىلىم الىپ, 200 اەك گرانت ۇتىپ الىپ, توسەك-ورىن جابدىقتارىن, كوپ رەت قولدانىلاتىن ماسكالاردى تىگەتىن شاعىن تىگىن شەبەرحاناسىن اشتى. جۇمىستا وعان قىزى سونيا كومەكتەسەدى, ويتكەنى كاسىپكەر ايەلدىڭ ەستۋ جانە سويلەۋ قابىلەتى ناشار.
«بۇعان دەيىن ءۇي شارۋاشىلىعىندا وتىردىم, جاستىق شاعىمدا تىگىنشى بولىپ جۇمىس ىستەگەنمىن. «باستاۋ بيزنەستە» وقۋ تۋرالى ماعان قىزىم ايتتى. وسى جىلى بار كۇش-جىگەرىمىزدىڭ ارقاسىندا ءبىز وقۋ وقىپ, گرانتتى قورعاپ شىقتىق. باسىندا, ارينە, الاڭداۋشىلىق بولدى. ويتكەنى كوپ جىل بويى جۇمىس ىستەمەدىم. بۇگىندە اقىرىن قادام باسىپ, العا ۇمتىلىپ كەلەمىن. مەن ءوز ءىسىن اشقىسى كەلەتىندەردىڭ بارلىعىنا وقۋدان وتۋگە كەڭەس بەرەر ەدىم. ءسىز وقۋدان كوپ نارسەنى ۇيرەنۋگە مۇمكىندىك الاسىز», دەدى س.احمەتجانوۆا.
تاعى ءبىر قاتىسۋشى اسەل ءابدىراحمانوۆا مۇمكىندىگى شەكتەۋلى جاندارعا ارنالعان باسپانا اشتى. باسپاگەر اۋزىمەن نەمەسە اياعىمەن بويالعان سۋرەتتەردى ساتادى.
«جوبا بويىنشا وقىپ, گرانت الىپ, سۋبليماتسياعا ارنالعان پرينتەر, تەرمو-پرەسس ساتىپ الدىم. سۋرەتتەر مەن شوپەرلەردەن باسقا, ءبىز قولدان جاسالعان قۋىرشاقتاردى, پوليمەرلى بالشىقتان جاسالعان بۇيىمداردى ساتامىز. وسىنىڭ بارلىعى – اۆتورلىق جۇمىس», دەيدى اسەل.
سونىمەن قاتار جارمەڭكەگە كەلگەن جاندار قۇرامىندا اق قانت پەن گليۋتەنى جوق پايدالى شوكولادتىڭ ءدامىن تاتىپ, ساتىپ الدى. ونى ەلوردادا ەكىنشى جىل قاتارىنان ماحاببات قوزجانوۆا وندىرۋدە. ول الدىمەن تاتتىلەردى ۇيدە جاساعان, سودان كەيىن ءحوببيدى بيزنەسكە اينالدىرۋدى شەشكەن.
«شوكولاد تەك ءۇش ينگرەديەنتتەن جاسالعان: كاكاو مايى, ۇگىتىلگەن تابيعي كاكاو جانە قانتتىڭ ورنىنا توپينامبۋر ءشارباتى. مەن گرانتتىق قاراجاتقا وزدىگىنەن ۇن جاساۋ ءۇشىن بلەندەر ساتىپ الدىم. قازىر ءوز ونىمدەرىمدى قالاداعى بارلىق ەكو-دۇكەندەرگە, كوفەحانالار مەن پايدالى تاماقتانۋ كافەلەرىنە جەتكىزەمىن. «باستاۋدا» وقۋ ماعان ءوز ءىسىمدى باستاۋعا كومەكتەستى. ويتكەنى مەن ۇزاق ۋاقىت بويى شەشىم قابىلداي الماي جۇرگەن ەدىم. بارشاڭىزعا كاسىپكەرلىكتى تانۋ ءۇشىن وقۋدان وتۋگە كەڭەس بەرەمىن», دەپ اتاپ ءوتتى ماحاببات.
راحيما وماروۆا – بيزنەستى كەز كەلگەن جاستا باستاۋعا بولاتىنىنىڭ ايقىن دالەلى. ول – 68 جاستا. قۇراق-كورپەنى جانە باسقا دا ۇلتتىق ناقىشتاعى توقىما ونىمدەرىن تىگەدى. بۇل بيزنەسپەن ەكى جىل بويى قىزى گۇلسىممەن بىرگە اينالىسۋدا.
جارمەڭكەنىڭ سالتاناتتى اشىلۋىنا «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ءبىرىنشى ورىنباسارى ناريمان ابىلشايىقوۆ, نۇر-سۇلتان قالاسى ءماسليحاتىنىڭ حاتشىسى ەرلان قاناليموۆ, Nur Otan پارتياسى قالالىق فيليالى توراعاسىنىڭ ءبىرىنشى ورىنباسارى ساقتاعان سادۋاقاسوۆ, نۇر-سۇلتان قالاسى حالىقتى جۇمىسپەن قامتۋ ورتالىعىنىڭ ديرەكتورى ازامات بايتاسوۆ جانە قالا اكىمدىگىنىڭ بىرقاتار باسقارما باسشىسى قاتىستى.