بۇگىنگى تاڭدا الماتى قالاسى پوليتسياسىنىڭ اكىمشىلىك عيماراتتارىندا 420 بەينەباقىلاۋ كامەرالارى ورناتىلدى, ولاردىڭ كوپشىلىگى تەرگەۋ ارەكەتتەرى جۇرگىزىلىپ, ازاماتتارمەن جۇمىس جۇرگىزىلەتىن تەرگەۋشىلەر, انىقتاۋشىلار جانە كريمينالدىق پوليتسيا قىزمەتكەرلەرىنىڭ كابينەتتەرىندە ورنالاسقان, جازادى Egemen.kz.
بۇل بەينەباقىلاۋ كامەرالارىنىڭ دەرەكتەرى جازىلادى جانە قاجەت بولعان جاعدايدا مۇراعاتتان سۇراۋعا بولادى. جاقىن ارادا اكىمشىلىك قاماۋعا الىنعاندارعا جانە جەكە باسىن كۋالاندىراتىن قۇجاتتارى جوق تۇلعالارعا ارنالعان قابىلداپ–تاراتۋدى دا بەينەباقىلاۋ كامەرالارىمەن جابدىقتاۋ جوسپارلانۋدا. كەلەسى جىلى بارلىق ۋچاسكەلىك پوليتسيا پۋنكتتەرىندە بەينەكامەرالار ورناتىلادى», دەدى الماتى قالالىق پوليتسيا دەپارتامەنتىنىڭ باسشىسى قانات تايمەردەنوۆ.
سونداي-اق سپيكەر بۇگىنگى تاڭدا 42 مودۋلدىق پوستتا ورناتىلعان بەينەباقىلاۋ جۇيەسى ارقىلى پوليتسيا قىزمەتكەرلەرىنىڭ جۇمىسىن تالداۋعا مۇمكىندىگى بار ەكەنىن جانە جىل سوڭىنا دەيىن تاعى 7 بەينەباقىلاۋ جۇيەسىن ورناتۋ جوسپاردا ەكەندىگىن ايتتى. بۇدان بولەك جۋرناليستەرگە ءوز قىزمەتكەرلەرىن قالاي باقىلايتىندارىن كورسەتتى.
«بۇعان دەيىن حابارلانعانداي, «نۇر وتان» پارتياسىنىڭ جول كارتاسىن جۇزەگە اسىرۋ اياسىندا جاڭا تۇرعىن ۇيدە جوسپارلانعان 12 ۋچاسكەلىك پوليتسيا پۋنكتىنىڭ 5-ەۋى جۇمىس ىستەپ تۇر. قازىر ۇيالى بايلانىس كەشەنىنىڭ مۇمكىندىكتەرىن پايدالانا وتىرىپ, ءبىز سىزدەردىڭ نازارلارىڭىزعا «المالى» تۇرعىن ءۇي كەشەنىندە ورنالاسقان ۋچاسكەلىك پوليتسيا پۋنكتىن ۇسىنىپ وتىرمىز. ول بيىلعى ناۋرىز ايىندا پايدالانۋعا بەرىلدى. ۋپپ اۋدانى - 90 شارشى مەتردى قۇرايدى. قازىرگى ۋاقىتتا پاترۋلدىك كيىمدەر جاڭا ۇلگىدەگى بەينەتىركەگىشتەرمەن جابدىقتالعان. سىزدەردىڭ الدارىڭىزدا پاترۋلدىك جاساقتاردىڭ قىزمەت كورسەتكىشتەرىن ونلاين رەجيمىندە باقىلاۋعا مۇمكىندىك بەرەتىن وپەراتوردىڭ جۇمىس ورنى. ناقتى ۋاقىتتا سىرتقى قىزمەتتەردىڭ جۇمىسىن باقىلايتىن توپ قۇرىلدى. قىزمەتكەر تاراپىنان زاڭبۇزۋشىلىقتار انىقتالعان جاعدايدا دەرەۋ دەن قويۋ شارالارى قابىلدانادى», دەدى قانات تايمەردەنوۆ.