قۇلاقتان كىرگەن قۇدىرەتتى مۋزىكا تۋىندىلارى دەنەنى شىمىرلاتىپ, الپىس ەكى تامىرعا رۋح جۇگىرتكەندەي تەبىرەنەسىڭ. ۇلت اسپاپتارىنىڭ شەرتولعاق شاناعىنان شىمىر-شىمىر نوتالار تۇلەگەندە ات تۇياعىنان سۇردەككە اينالعان جولدا جورتۋىلدا كۇن كەشكەن ۇلى بابالاردىڭ مۇرات-ماقساتى مەن اسقاق ارمانى بولعان بۇگىنگى بەرەكەلى شاقتا بەسىك تەربەتكەن قازاق ۇلتىنىڭ تەكتىلىگى قىلاڭ بەرەدى. مىنە, وسىنداي سان تولقىنىسقا جەتەلەگەن بەلگىلى ءانشى, قازاقكونتسەرت ءسوليسى ەربولات شالدىبەكوۆتىڭ «توگەيىن جىردى حالقىما» اتتى جاڭا كونتسەرتىنىڭ كۋاسى بولدىق.
تىڭدارماننىڭ كوڭىلىن كوك تەڭىزدەي تولقىتقان, مۋزىكا ونەرىنىڭ جاۋھار تۋىندىلارى ورىندالعان كەرەمەت كەش قازاقكونتسەرت ساحناسىندا ءوتتى. جەتىسۋ انشىلىك-جىرشىلىق مەكتەبىنىڭ جارقىن وكىلى ەربولات شالدىبەكوۆ ءداستۇرلى انگە شولىركەگەن جۇرتتىڭ ءشولىن ءبىر باستى.
كوڭىلدىڭ كيەلى پەرنەسىن ءدوپ باسىپ, جان سارايىن جادىراتاتىن ساز ونەرىنىڭ سيقىرىنا ءجيى ەلتىپ كەتەسىڭ. قانشا ۋاقىت تىرشىلىك تەپەڭىمەن جۇرسەڭ دە, بابالاردىڭ ومىرشەڭ تۋىندىلارى كوكەيىڭدە كۇمبىرلەپ قويا بەرەدى. كەش يەسىنىڭ قۋانىشىنا قولداۋ كورسەتكەن «استانا سازى» مەملەكەتتىك فولكلورلىق ءانسامبلى ساحنادا بەبەۋلەتكەندە كوڭىل تولقيدى. ساحنادان ۇشقان تامىلجىعان ءمولدىر تۋىندىلار, اسقاق رۋحتى كۇيلەر جادىڭدا جاڭعىرسا, جەر-الەمگە سىيمايتىنداي كۇيگە تۇسەسىڭ. سوندا بارىپ شىنايى ونەرگە دەگەن ىشكى سەزىمىڭ بەكي تۇسەدى.
شىندىعىندا ەربولات شالدىبەكوۆتىڭ رەپەرتۋارىنداعى ءاربىر تۋىندىنى تولقي تىڭداماۋ مۇمكىن ەمەس. اتتىڭ شابىسى, سۋدىڭ اعىسىنان باستاپ قازاقى قاندى تاسىتار نەبىر سازدى ءون بويىنا جيناعان ۇلى كۇيلەر مەن اسقاق مۋزىكالاردى جوعارى دەڭگەيدە ورىندايتىن ونەر يەسى بۇگىنگە دەيىن تالاي اسۋدى باعىندىرىپ, شىعارماشىلىقتىڭ جەمىستى جولىن تاريحي سۇردەككە اينالدىردى.
شارا بارىسىندا كۇللى قازاق تىڭدارماندارىنىڭ سۇيىسپەنشىلىگىنە, قۇرمەت-قوشەمەتىنە بولەنىپ جۇرگەن جانعالي ءجۇزباي, ەرلان رىسقالي, ارداق بالاجانوۆا, كلارا تولەنباەۆا, ەلبول قۋانبەك سىندى كەش قوناقتارى حالىقتىڭ ىستىق ىقىلاسىنا يە بولىپ, ساحنانى دۇبىرگە بولەدى.
كەش سوڭىندا جامبىل جاباەۆتىڭ جىرلارى مەن جەتىسۋ ءوڭىرىنىڭ اندەرىنەن جان دۇنيەسى جادىراپ, رۋحاني ءلاززات العان كورەرمەن كەش يەسىنە العىسىن ايتىپ, تارقاستى.