كوك كۇرتەنىڭ تۇتاس ارقاسى مەن ەكى جان قالتاسىندا باسىنا قارقاراداي ەتىپ ورامال سالعان, الدە بيىك ەتىپ كيمەشەك كيگەن قازاقتىڭ سۇلۋ قىزى اسىل تاستاردان ساقينا سالعان سۇيرىك ساۋساقتارىمەن ۇلبىرەپ گۇل ۇسىنعان سۋرەتى تۇر.
«مەن قازاقتىڭ قىزىمىن!» دەگەن اسقاق ويدى ايتىپ, ۇلتتىق نامىسىڭ مەن جىگەرىڭدى الىستان-اق جانىپ جىبەرەتىن مىناۋ پرينت-كۇرتەنى كيىپ كوشەدە كەتىپ بارا جاتقان ءسات كوز الدىعا ەلەستەپ, وسىنشاما عاجاپ سەزىم سىيلايتىن ءساندى كۇرتەنى ديانانىڭ دايىنداپ ۇسىنعانىن استارىنا جاپسىرىلعان ساۋدا قاعازى ايقىنداپ تۇر.
«قازاقستاندا جاسالعان»! كەۋدەگە ماقتانىش ۇيالاتاتىن ءبىراۋىز سوزدە التىننىڭ بۋى بار سەكىلدى, ءاپ-ساتتە بۋىنىمىز بوساي قالدى. «DB-art سدەلانو ۆ كازاحستانە» دەگەن برەند بەلگىسىمەن شىققان ادەمى قىستىق كۇرتە ءارى ءساندى, ءارى جىلى. ەتيكەتكاسىنا تەلەفون ءنومىرىن دە جازىپتى, قىزىعىپ, ساتىپ العىسى كەلگەن ادامنىڭ قولما-قول قوڭىراۋ شالۋىنا ىڭعايلى. وتاندىق ءونىمدى ورىستەتۋگە قوسقان ۇلەسىنە راحمەتىمىزدى ايتتىق, جاس كاسىپكەر مەزىرەتىن ءبىلدىرىپ, بىردەن وسى كۇرتەنى ازىرلەپ جاتقان تىگىن تسەحىنا شاقىردى.
كەڭ اۋلانىڭ ىشىندەگى ەكى قاباتتى ءۇيدىڭ ۇستىڭگى اتشاپتىرىم زالىنا تولىقتاي تىگىن تسەحى ورنالاسقان. ون ەكى تىگىنشى باس كوتەرمەي كۇرتە تىگىپ وتىر. قىزىل-جاسىل كۇرتەلەردىڭ دايىن بولعانى ۇتىكتەلىپ, شەتىنەن كيىم ىلگىشكە ءىلىنىپ جاتىر. كۇرتەلەردىڭ جاعاسىندا «DB-art» دەگەن جازۋ جاپسىرىلعان. «DB-art دەگەن نە؟» دەدىك. «ول مەن – ديانا بازاروۆامىن» دەپ ءوزىن قايىرا تانىستىردى كاسىپكەر. «بۇل تاۋارلار وسى جەردەن اناۋ ىرگەڭدە ورنالاسقان ۇلكەن بازارعا باراتىن بولار؟» دەپ تەرەزەدەن الماتىنىڭ ءداۋ باراحولكاسىن يەكپەن نۇسقاپ دياناعا قارادىق. «جوق. رەسەيگە كەتەدى». تاڭىرقاعانىمىز سۇراۋلى جۇزىمىزدەن تانىلعان بولۋى كەرەك, ديانا ەندى شارۋاسىنىڭ جايىن شيراتىپ ايتا باستادى.
نەگىزىنەن, كاشەمير, دراپ ماتالارمەن جۇمىس ىستەيتىن ديانا سوڭعى كەزدە سانگە شىققان پرينت ۇلگىلەرگە باسىمدىق بەرگەن. «جوسپار بويىنشا ءبىر ايداعى تاۋار كولەمى 3500 بىرلىكتى قۇرايدى. بىلەمىن, بۇل سونشالىقتى قوماقتى كورسەتكىش بولماۋى مۇمكىن, بىراق مەنىڭ مۇمكىندىگىمدە بۇل وتە اۋقىمدى جۇمىس. تسەح شاعىن. جۇمىسشىلاردىڭ تاپشىلىعىنان وسى بىرلىكتىڭ ءوزىن ارەڭ يگەرىپ وتىرمىز. تاۋاردىڭ ءبارى رەسەيگە كەتەدى. سىزگە ۇناعان كيمەشەگى بار كوك كۇرتەنى ورىستىڭ قىز-كەلىنشەكتەرى پىشاق ۇستىنەن تالاسىپ تۇرىپ الادى. نەگە ەكەنىن بىلمەيمىن, باسقا ۇلتتىڭ قىزدارى بۇل كۇرتەنى ارنايى ىزدەپ كەلىپ سۇرايدى. بۇل دا نارىقتىڭ ءبىز تۇسىنبەيتىن ءبىر قۇپياسى بولار.
تسەحتا 12 تىگىنشى, ءبىر تەحنولوگ, ءبىر كيىم پىشەتىن مامان جۇمىس ىستەيدى. كيىم قانداي ماتادان, قانداي ءسان ۇلگىسىمەن تىگىلۋى كەرەك, قاي جەرىندە تۇيمەسى, قالتاسى, سۋرەتى بولادى, سينتەپوننىڭ قالىڭدىعى قانشا بولۋى ءتيىس – وسىنىڭ ءبارىن تەحنولوگ ەكەۋمىز اقىلداسا وتىرىپ ساراپتاماسىن جاساپ, سىزباسىن ازىرلەيمىز. بيىل سانگە قانداي ءتۇس ەندى, قاي ايماق قانداي ءتۇستى ۇناتادى, ۇزىنى كەرەك پە, قىسقاسى قاجەت پە, جالپى سيپات-سۇلباسىن ازىرلەپ العان سوڭ عانا جۇمىستى باستايمىز. وسى ۇلگى ەگجەي-تەگجەيلى تالقىدان ءوتىپ, تولىقتاي ماقۇلدانعاننان كەيىن ءبىر ۇلگىسى 2-3 نۇسقادا تىگىلۋگە كەتەدى. ول دايىن بولعان سوڭ قاتەسى مەن كەمشىلىگىن تاعى دا تالقىلاپ, تولىقتىرىپ, پىسىقتايمىز. مامىق كۇرتەلەر ەكى-ءۇش قايتارا تىگىلىپ, ءمىنسىز قالىپقا كەلگەننەن كەيىن عانا وندىرىسكە جولداما الادى» دەيدى د.بازاروۆا.
مۇنداعى جانسايا ەسىمدى ەڭ شەبەر تىگىنشى كۇنىنە 7 كۇرتە تىگەدى, قالعاندارى 3 پەن 5-ءتىڭ ارالىعىندا تاپسىرىس ورىندايدى. ديانا جاقىندا تۇركيادا وتكەن جەڭىل ونەركاسىپ سالاسىنا ارنالعان حالىقارالىق كورمەگە قاتىسىپ قايتتى. بىلتىر كورەيا كاسىپكەرلەرى «قازاقستان ءوندىرىسىن وركەندەتۋگە كومەكتەسەمىز» دەپ ەلىمىزگە ارنايى كەلىپ, ماتا كورمەسىن ۇيىمداستىرعان بولاتىن. قىستىق كۇرتەگە ارنالعان سوڭعى ساندەگى قالىڭ ماتالاردى كاسىپكەر, نەگىزىنەن, وسىنداي سالالىق كورمەلەردەن ساتىپ الادى. بىراق شەكارا جاعىنان ىڭعايلى بولعاندىقتان, ماتالاردى تۇركيادان تاسىمالداعان ءتيىمدى.
«DB-art» برەندى رەسەيدىڭ ەڭ ۇلكەن ينتەرنەت ساۋدا جەلىلەرىنىڭ ءبىرى Wildberries-پەن كەلىسىمشارت جاساسقان. ديانانىڭ ايتۋىنشا, باسقا ەلدەرمەن سالىستىرعاندا, قازاقستاندا ينتەرنەت دۇكەن جەلىسى دامىماعان, ادامدار ءالى دە بولسا بازاردان, دۇكەندەردەن ساۋدا جاساۋدى ءجون سانايدى, ال رەسەيدە ەكىنىڭ ءبىرى Wildberries-تەن كيىنەتىنىن ماقتانىشپەن ايتاتىن كورىنەدى. «DB-art» تاۋارلارى قازىر باسەكەمەن عانا ءومىر سۇرەتىن Ozon, Amazon ماركەتپلەيستەرىنەن دە كورىنىس تاپتى. Amazon-مەن كەلىسىم جاساۋ دەگەن ءسوز – بۇل الەمدىك ساۋدا جەلىسىنىڭ اينالىمىنان تابىلۋ, شەكسىزدىك الەمىمەن تابىسۋ, مىڭ بىرلىك تاۋاردىڭ ميلليوندارمەن الماسۋى دەگەن ءسوز. بۇگىنگى 3 500 بىرلىكتىڭ 350 ملن-عا نەمەسە ودان دا كوپ بىرلىككە اينالۋى دەگەن ءسوز. قانشا وندىرگىڭ كەلەدى – ءوندىر, تەك نارىقتىڭ جىلدامدىعىنا ىلەسە الساڭ, شاڭ قاۋىپ, شاشىلىپ قالماساڭ, بولعانى. Amazon-مەن كەلىسىمگە وتىرعاننان كەيىن تەك ايەلدەردىڭ قىسقى كيىمىنە عانا باعىتتالعان برەند كومپانيا ەندى ەرلەرگە ارنالعان كۇرتەلەردى دە تىگە باستادى.
– ءبىز, قىز-كەلىنشەكتەر, وتە قىزىق حالىقپىز, – دەيدى ديانا. – سالماعى – 80 كيلو, 50-52 ولشەمدەگى كيىم كيەتىن ايەلدەر ينتەرنەت دۇكەننىڭ جارناماسىنداعى سىمباتى مەن سىنى كەلىسكەن 46 ولشەمدەگى مودەل قىزدىڭ ۇستىندەگى كيىمگە تاپسىرىس بەرەدى. بەس بيەنىڭ ساباسىنداي جايقالعان, كەڭ پىشىلگەن دەنەسىنە قارامايدى, ول ءوزىن سۋرەتتەگى 46 ولشەمدەگى قىز سەكىلدى ەلەستەدى. ال تاپ وسى جارناماعا 52-54 ولشەمدەگى كيىمدى پايدالانساق, تاۋار وتپەيدى. ينتەرنەت دۇكەننىڭ دە جۇمباعى, قۇپيا قىرى مەن سىرى كوپ, ۇنەمى زەرتتەۋ مەن ساراپتاۋدى قاجەت ەتەتىن وزىنشە جاتقان ءبىر الەم ەكەنىنە ەندى كوزىم جەتىپ ءجۇر.
جانىنا ءبىر تىگىنشىنى الىپ, ديانانىڭ ءوز ءۇيىنىڭ جەرتولەسىندە باستالعان شاعىن كاسىپ ءتورت جىلدىڭ ىشىندە «DB-art» دەگەن اتاۋدى يەلەنىپ رەسەي نارىق الاڭىنا اياق باسقان اۋقىمدى كومپانياعا اينالىپ ۇلگەردى. ءبىر ماشيناسى ەكەۋ بولىپ, ءبىر تىگىنشىنىڭ جانىنا تاعى 4-5-ەۋى جايعاسقان سوڭ, جەرتولەگە سىيماي, جەر الىپ, ءبىر جىلدىڭ ىشىندە بۇگىنگى ەكى قاباتتى تسەحتى سالدى. تىگىن ماشيناسىن السا, جۇمىسكەرىنىڭ جالاقىسىن تولەي الماي, قىمباتتاۋ ماتاعا قىزىققانىمەن, قولىنىڭ قىسقالىعىنان ساتىپ الا الماي قاتال باسەكەلەستىك جولىندا تالاي قينالسا دا, قايسار مىنەزدى قىز كەرى شەگىنگەن جوق. تسەح شاعىن بولعان سوڭ كىرىس تە از, از كىرىستى ۇنەمدەپ جيناپ, ماشينالار ساتىپ الا وتىرىپ, بۇگىن, مىنە ونىڭ سانىن ون ەكىگە جەتكىزدى. ديانانىڭ تەك تۇيمە قادايتىن ماشيناسىنىڭ ءوزى 970 مىڭ تەڭگە تۇرادى. كيىمنىڭ ەتەك-جەڭىن ادىپتەيتىن, پرينت سالاتىن, تىگەتىن ماشينالارىنىڭ باعاسى دا وسى شامالاس. «بۇگىن ۇلكەن كورىنىپ تۇرعان بۇل تسەح بولاشاقتا قويما عانا بولىپ قالۋى دا مۇمكىن» دەيدى جاس كاسىپكەر. جاس كاسىپ يەسى ءۇشىن قيىندىق تا جوق ەمەس. ەڭ ۇلكەن قيىندىق – ماماننىڭ تاپشىلىعى. جۇمىسسىز تىگىنشى كوپ بولعانىمەن, جۇمىسقا ق ۇلىقتىسى از. جوعارى وقۋ ورىندارى مەن كوللەدجدەردىڭ جەڭىل ونەركاسىپ فاكۋلتەتىن تامامداعان بويجەتكەندەردىڭ ءبىرازىن جۇمىسقا شاقىرىپ كوردى – قولىنا ينە ۇستاي المايدى. ادامنان اسقان توزىمدىلىكتى قاجەت ەتەتىن تىگىن ونەرىن مەڭگەرىپ, كۇرتە تىككەننەن گورى بىرەۋدىڭ تىرناعىن بوياعاندى ءتاۋىر كورىپ, تايىپ تۇرادى.
ديانانىڭ جارى ارعىنتاي دا پلاستماسسا بۇيىمدارىن شىعاراتىن ەلدەگى ءىرى كاسىپكەرلەردىڭ ءبىرى. ەرىنىڭ تابىسىن ۇقساتىپ, ءتورت بالانىڭ تاربيەسىمەن ۇيدە وتىرسا دا جاراسار ەدى. بىراق قارشادايىنان ون ساۋساعىنان ونەر تامعان ىسمەر اناسى گۇلعاليفانىڭ جانىندا ءجۇرىپ ەڭبەكپەن شىنىعىپ وسكەن وجەت قىز ءوز قابىلەتىن باتىلدارعا عانا باس يەتىن بيزنەس باسەكەسىندە سىناپ كورۋگە بەل بۋدى. ەرتە تۇرىپ, كەش جاتاتىن ديانانىڭ بار ماقساتى – ۇزدىكسىز دامۋ. كەشەگىگە قاراعاندا بۇگىن مىقتىراق بولۋ. «بازاردا ساتۋشى ەمەس, تۇتىنۋشى پاتشا بولۋى كەرەك» دەپ ەسەپتەيتىن ديانا ءار تۇتىنۋشىسى ريزا بولاتىنداي تاۋارىن تالعاممەن, ساپالى تىگۋگە تىرىساتىن «DB-art» كومپانياسىن قازاقستان نارىعىنداعى باسەكەلەستىككە بوي الدىرمايتىن ماڭىزدى برەندكە اينالدىرىپ, ءوز ۋاقىتىنا ساي تۇلەتۋ ءۇشىن تىنىمسىز ەڭبەكتەنەدى. اعىلشىن ءتىلىنىڭ مامانى بولا تۇرىپ, ءوز جۇرەك قالاۋى مەن ومىرلىك ماقساتىن ءدال انىقتاعان ديانانىڭ دوڭگەلەنگەن شارۋاسىنا قاراپ, شاعىن كومپانيانىڭ كەلەشەگىنىڭ كەمەل بولاتىنىنا كۇمانسىز سەنگىڭ كەلەدى.