وليمپ كلينيكالىق-دياگنوستيكالىق زەرتحاناسىنىڭ مالىمەتىنشە, ءاربىر ءتورتىنشى پاتسيەنتتە تەمىر تاپشىلىعى انىقتالعان, دەپ جازادى Egemen.kz.
2021 جىلدىڭ باسىنان بەرى وليمپ زەرتحاناسىندا تەمىر مولشەرىن انىقتاۋ ءۇشىن 211 500 ادام قان تاپسىرعان. ولاردىڭ 74%-ى – ايەلدەر, 26%-ى – ەرلەر.
«قارالعانداردىڭ 25%-دا تەمىر تاپشىلىعى انىقتالدى. جىنىس بويىنشا ەرەكشەلىك اسا قاتتى بىلىنبەيدى, بىراق ادامداردىڭ جاسىنا بايلانىستى ايتارلىقتاي ايىرماشىلىق بار», - دەپ حابارلادى «كدل وليمپ» جشس باس ديرەكتورى ەرلان سۇلەيمەنوۆ. «تەمىر تاپشىلىعى انىقتالعان پاتسيەنتتەردىڭ باسىم بولىگى 19-25 جاس ارالىعىندا, ولاردىڭ 34%-دا اتالعان ميكروەلەمەنتتىڭ جەتىسپەۋشىلىگى بار. تەمىر تاپشىلىعى ەڭ سيرەك انىقتالعان پاتسيەنتتەر 0-7 جاس توبىنا ەنەدى, ولاردىڭ تەك 16,5%-دا تەمىر دەفيتسيتى بار».
ادەتتە 19-25 جاس ارالىعىنداعى پاتسيەنتتەر – بۇل ستۋدەنت جاستار. ولاردىڭ اراسىندا تەمىر تاپشىلىعىنىڭ كەڭ تارالۋى دۇرىس تاماقتانباۋدىڭ سالدارى بولۋى مۇمكىن. اتالعان پاتسيەنتتەرگە قۇرامىندا قولجەتىمدى تەمىرى بار تاعامداردى (ەت پەن ەت ونىمدەرى), تەمىردىڭ ءسىڭىرىلۋىن جاقسارتاتىن ونىمدەردى (س دارۋمەنى بار كوكونىس پەن جەمىستەر) كوبىرەك جەپ, كەرىسىنشە تەمىردىڭ ءسىڭىرىلۋىن تەجەيتىن ونىمدەردى (شاي, كوفە) از تۇتىنۋ قاجەت.
تەمىر - ادام اعزاسى ءۇشىن وتە ماڭىزدى ميكروەلەمەنت. ونىڭ دەفيتسيتى گەموگلوبين ءتۇزىلۋىن تومەندەتەدى.
«گەموگلوبين وتتەگىنىڭ مۇشە مەن ءتىن جاسۋشالارىنا جەتكىزىلۋىن قامتاماسىز ەتەدى. گەموگلوبين جەتكىلىكسىز بولعاندا اتالمىش فۋنكتسيا بۇزىلادى دا, بىرتە-بىرتە اۋىر سوزىلمالى دەرتتەرگە اكەپ سوعاتىن پاتولوگيالىق پروتسەستەر باستالادى. سوندىقتان تەمىر تاپشىلىعىن مىندەتتى تۇردە ەمدەۋ قاجەت», دەيدى ەرلان سۇلەيمەنوۆ.
تەمىرتاپشىلىقتى انەميا كەزىندە السىزدىك, باستىڭ اۋىرۋى, اينالۋى, جۇرەكتىڭ ءجيى سوعۋى, دەمىگۋ, فيزيكالىق جۇكتەمەلەردى كوتەرە الماۋ, تابەتتىڭ, جۇمىسقا, وقۋعا قابىلەتتىلىكتىڭ تومەندەۋى, تەرىنىڭ قۇرعاۋى, شاشتىڭ ءتۇسۋى بايقالادى.
اۋىر دەڭگەيدەگى تەمىرتاپشىلىقتى انەميا كەزىندە وتتەگىنىڭ ايتارلىقتاي جەتىسپەۋشىلىگى سالدارىنان اعزانىڭ بارلىق جۇيەلەرى بۇزىلادى.
اعزاداعى تەمىر دەفيتسيتى ونىڭ تاماقپەن جەتكىلىكسىز دەڭگەيدە كەلۋىمەن بايلانىستى.
جاڭا تۋعان بالالاردا تەمىر جەتىسپەۋشىلىگى اناسىنىڭ جۇكتىلىك كەزىندەگى جانە وعان دەيىنگى انەمياسى سالدارىنان بولۋى مۇمكىن.
تەمىر دەڭگەيىنىڭ تومەندەۋى اعزانىڭ ميكروەلەمەنتتى كوپ مولشەردە شىعىنداۋىنان دا تۋىندايدى: بالالاردىڭ تەز ءوسۋ كەزەڭدەرىندە, ايەلدەردە جۇكتىلىك پەن بالانى ەمىزۋ كەزىندە. سونداي-اق ءارتۇرلى اۋرۋلار كەزىندەگى قان كەتۋ سالدارىنان دا ورىن الۋى ىقتيمال.
بىرقاتار جاعدايدا تەمىر دەفيتسيتى اسقازان-ىشەك اۋرۋلارى كەزىندە ميكروەلەمەنت ءسىڭىرىلۋىنىڭ بۇزىلۋى جانە تەمىردىڭ ءسىڭىرىلۋىن تەجەيتىن ونىمدەردى كوپ جەۋ سالدارىنان تۋىندايدى.
تەمىر جەتىسپەۋشىلىگىنىڭ گەنەتيكالىق سەبەبى دە بولۋى ىقتيمال. ماسەلەن, IRIDA-سيندرومى بار. ول - تەمىر پرەپاراتتارىنىڭ اسەرىنە سەزىمتال ەمەس تەمىرتاپشىلىقتى انەميا. قۋانىشقا وراي, بۇل سيندروم سيرەك كەزدەسەدى.
وليمپ كدز زەرتتەۋىنىڭ ناتيجەسى
پاتسيەنتتەردىڭ جاسى
توپتاعى تەمىر دەفيتسيتىنىڭ تارالۋى
0-7 جاس
16,5%
8-18 جاس
18%
19-25 جاس
34%
26-35 جاس
29%
36-45 جاس
29%
46-55 جاس
28,5%
56-65 جاس
25,5%