داستارقان ۇستىندە القىزىل گۇل, جەمىس-جيدەك, قۇس قاۋىرسىنى تۇرسا, جازۋشىنىڭ جۇمىس ىستەيتىن ورنى, بولماسا قوناق كۇتكەن ءۇيدىڭ ەسكيزى ەلەستەيدى. وسى ءۇش دەتالدى ىلىككە العان سۋرەتشى شىعارماسىنىڭ جانرى ناتيۋرمورت ەكەنىن اڭداۋ وپ-وڭاي. سەبەبىن كەنەپ بەتىندەگى اشىق بوياۋلاردىڭ ءوزى-اق بايانداپ تۇرعانداي.
ونەردىڭ كوپتەگەن سالاسىندا اتى شىققان سۋرەتشى فەدور تولستويدىڭ كوركەم تۋىندىلارى كورەرمەندى يلليۋزورلىق كەمەلدىلىگىمەن, تاڭعاجايىپ ەرتەگىسىمەن جانە جىلى نۇرىمەن باۋراپ الادى. ونىڭ ەڭ تانىمال كارتينالارىنىڭ ءبىرى – «گۇلدەر, جەمىستەر, قۇستار».
ءيا, كەنەپتىڭ جانرى – ناتيۋرمورت. ءبىر-بىرىمەن ۇيلەسپەيتىن, ءبىر قاراعاندا, داستارقان باسىنداعى وسىمدىك پەن كىشكەنتاي قۇستىڭ ءبىر نىسان شەڭبەرىنە ەنۋى قيسىنسىزداۋ كورىنۋى مۇمكىن. ءتىپتى اۆتور جاساندىلىققا بارعانداي كۇيگە تۇسەسىز. لاكونيك ديزايندى شىنى ۆازا مەن كوبەلەك كەرەعار ۇعىم قالىپتاستىرادى.
سۋى بار قاراپايىم ۆازاعا جاي عانا ج ۇلىنعان دالا گۇلدەرى سالىنعان. الما مەن ءجۇزىمنىڭ يلليۋستراتسياسى, ءتۇرلى ءتۇستى قىزىل جولاقتار, قىزعىلت گۇل شوقتارى جانە اشىق-سارعىش گۇل رەڭكتەرى – سۋرەتشىنىڭ جەكە تانىمدىق يدەياسى. الدىمەن كوكتەمدى ەسكە تۇسىرەدى جانە وقىرمانعا قۋانىش سىيلاۋعا ۇمتىلادى. پىسكەن جەمىس-جيدەكتەر كومپوزيتسيانى بايىتىپ تۇر. المانىڭ قاق ورتاسىنان ەكىگە ءبولىنۋى مەزگىلدەردىڭ بايلانىسىن كورسەتەدى.
سۋرەتشى داندەر مەن الما ماسساسىن مۇقيات قاداعالاعان. جاسىل المانىڭ ۇستىنە قونعان شىبىن جەمىستىڭ حوش ءيىستى ەكەنىن اڭعارتىپ تۇر. وعان قوسا تولستوي بىرنەشە سۋ تامشىسىن بەينەلەگەن. ولار ءموپ-ءمولدىر تاڭعى شىققا ۇقسايدى.
ناتيۋرمورتتىڭ بۇكىل كومپوزيتسياسى اعاش ۇستەل ۇستىندە ورىندالادى. فون – قوڭىرقاي اعاش بەتى. قاراقات سول ءساتتىڭ بالعىندىعىن بايقاتادى. جاپ-جاسىل جاپىراقتار ءالى سارعايماعان. ءجۇزىم بۇتاعىنا قونعان عاجايىپ كوكشىل قۇستىڭ قاۋىرسىنى قوڭىر تۇسپەن تاماشا ۇيلەسەدى. قوس كوبەلەك ۆالس بيلەپ جۇرگەندەي.
شىنىندا, قىلقالام شەبەرى ءارتۇرلى زاتتاردىڭ قوسىندىسىنان كالەيدوسكوپيالىق شىعارما جازىپ شىققان. ناتيۋرمورت ءبىزدى تابيعاتتىڭ بايلىعىنا تامسانۋعا شاقىرادى.