ءبىزدىڭ مەملەكەتتىك تاۋەلسىزدىككە قول جەتكىزگەن كۇنىمىزگە دەيىنگى ساياسي, قۇقىقتىق جاعدايىمىزدى بۇگىنگى جاس ۇرپاق بىلە بەرمەيتىنى بەلگىلى. ءتىپتى سول جىلداردى كەيبىر اعا ۇرپاق وكىلدەرىنىڭ وزدەرى ۇمىتىڭقىراپ بارا جاتقانى دا جاسىرىن ەمەس. مەملەكەتتىك تاۋەلسىزدىك ەلىمىزگە تۇبەگەيلى وزگەرىستەر الىپ كەلدى. وزگەرىستەر جاسايتىن مۇمكىندىكتەر تۋدى. بىراق ول وزگەرىستەر ءوز-وزىنەن بولا قويعان جوق. ماسەلە سول وزگەرىستەردى قالاي پايدالانا العانىمىزدا.
مەملەكەتتىك تاۋەلسىزدىگىمىزدى جاريا ەتتىك. ەندىگى جەردە مەملەكەت قۇرلىسى, حالىقتىڭ تۇرمىسى, بۇكىل تىنىس-تىرشىلىگى, قاۋىپسىزدىگى, قورعانىسى, دۇنيەجۇزىلىك قاۋىمداستىقپەن قارىم-قاتىناسى, ىشكى-سىرتقى ساياساتى, تاعى دا باسقا ماڭىزدى باعىتتار بويىنشا قانداي جولمەن ۇيىمداسىپ, قانداي رەفورمالارعا جۇمىلۋ قاجەت دەگەن سۇراققا جاۋاپ ىزدەگەندە, ارينە, مىڭداعان وتانداسىمىز, ەڭ الدىمەن, ەلباسى – تۇڭعىش پرەزيدەنت نۇرسۇلتان ءابىش ۇلى نازارباەۆتىڭ مەملەكەتتىك, قايراتكەرلىك ەڭبەگىن ايتۋ ادىلدىك بولسا كەرەك.
حح عاسىردا حالقىمىز باسىنان وتكەرگەن ساياسي قۋعىن-سۇرگىن, اشارشىلىقتار سالدارىنان الەمنىڭ 40-تان استام ەلىنە شاشىراپ كەتكەن قازاق بالاسىن ەلگە قايتارۋ تاۋەلسىزدىگىمىزدىڭ ءبىرىنشى كۇنىنەن باستاپ تۇڭعىش پرەزيدەنتىمىزدىڭ, ۇكىمەتتىڭ باستى نازارىندا بولدى. بۇرىنعى, ياعني 70 جىلدان استام ۋاقىتتا شەتەلدەگى قازاقتارمەن قارىم-قاتىناسىمىز ءۇزىلىپ قالعان ەدى. سول الاساپىران كەزدىڭ وزىندە شەتەلدەگى قانداستارىمىزبەن قارىم-قاتىناس ورناتىپ, ولاردىڭ ەلگە قايتام دەگەندەرىنە مەيلىنشە جاعداي جاساۋ تاپسىرمالارى قۇزىرلى ورگاندارعا مىندەتتەلدى. 1992 جىلدىڭ كۇزىندە ەلباسى نۇرسۇلتان نازارباەۆتىڭ باستاماسىمەن الماتى قالاسىندا دۇنيەجۇزىلىك قازاقتاردىڭ ءى قۇرىلتايى وتكىزىلىپ, وعان شەتەلدەردەن 2 مىڭعا جۋىق قانداس جينالىپ, شىن مانىندە رۋحاني, ساياسي بوستاندىقتى سەزىندىك.
مىنە, قازاقتىڭ ۇلى كوشى سول جىلدارى, وسىدان 30 جىل بۇرىن باستالىپ ەدى. تاۋەلسىزدىگىمىزدىڭ ارقاسىندا ەل مەن ەل قوسىلىپ, ەجەلگى قازاق جەرى جاڭا ءداۋىردىڭ قۇت مەكەنىنە اينالىپ وتىر. ول كوش ءوزىنىڭ كەرۋەنىن جىلدان جىلعا ءوسىرىپ كەلەدى. ويتكەنى ادامداردىڭ كوشى-قونى – ۇنەمى جالعاستىقتاعى قۇبىلىس. تاۋەلسىزدىك داۋىرىندە قازاق جەرىنە شەتەلدەردەن 1 ميلليوننان استام قانداسىمىز تۇراقتى كەلىپ, ورنىقسا دا بولاشاق تاعدىرىن اتامەكەنىمەن بايلانىستىرۋ ارمانى كەلگەن باۋىرلاردان بىرنەشە ەسە كوپ سىرتتا جۇرگەن باۋىرلاردىڭ ارمانى ەكەنى دە ايعاق. بۇل ءسوز جوق, ءبىزدىڭ قازاق حالقىنىڭ ۇلتتىق مەملەكەتتىك تاۋەلسىزدىگىمىزدىڭ جارقىن جەڭىسى.
قۋانىش سۇلتانوۆ,
قازاقستاننىڭ ەڭبەك سىڭىرگەن قايراتكەرى