بالداي ونىمدەرى بۇگىندە بايتاق الەمنىڭ ءار تۇپكىرىنە تاراپ كەتكەن «بايان سۇلۋ» كونديتەرلىك فابريكاسىنىڭ تابىستى ورلەۋ جولىنا بەت بۇرىپ, ىشكى ءھام سىرتقى ساۋدا كەڭىستىگىنە تەڭ ءوتىمدى كوپ تاتتىلەرىنىڭ برەندكە اينالۋى ەلىمىز تاۋەلسىزدىك العاننان كەيىنگى ءورىستى وتىز جىل ىشىندەگى ەكونوميكالىق دامۋدىڭ جەمىسى ەكەنى انىق. توقسانىنشى جىلدارى توقىراڭقىراپ قالعان ءىرى كاسىپورىنعا تاۋەلسىزدىك جىلدارى اۋقىمدى ينۆەستيتسيا سالىندى. ناتيجەسىندە, گەرمانيا, يتاليا, شۆەيتساريا سياقتى ءوندىرىسى وركەندەگەن مەملەكەتتەردەن زاماناۋي تەحنولوگيا قۇرىلعىلارى اكەلىنىپ, جاڭا جەلىلەر ورناتىلدى.
– قوستاناي كونديتەرلىك فابريكاسىنا سوڭعى 10-15 جىلدىڭ وزىندە شامامەن 20 ملرد تەڭگە ينۆەستيتسيا سالىندى. ءبىزدىڭ كوپتەگەن جوبامىز ۇكىمەت پەن اۋىل شارۋاشىلىعى مينيسترلىگى, سونداي-اق وبلىس باسشىلىعى تاراپىنان وتە ۇلكەن قولداۋ تاپتى. مەملەكەت سۋبسيديا, دوتاتسيا, قولجەتىمدى نەسيە بەرۋدە كوپ جەڭىلدىك جاساپ, از جىلدىڭ ىشىندە تولايىم تابىسقا جەتۋىمىزگە جاعداي جاسادى. وسىنىڭ ناتيجەسىندە تۇتىنۋشىلار ونىمدەرىمىزدى ەلىمىزدىڭ كەز كەلگەن تۇكپىرىنەن ساتىپ الۋ مۇمكىندىگىنە يە بولىپ وتىر. قوستاناي تاتتىلەرىن قازاقستاندا جاسالعان ءونىم دەپ ۇلكەن ماقتانىشپەن ايتۋعا بولادى, – دەدى «بايان سۇلۋ» اق باسقارماسىنىڭ توراعاسى تيمۋر سادىقوۆ.
ايتا كەتەرلىگى, سوڭعى ون شاقتى جىلدىڭ ىشىندە كونديتەرلىك فابريكا ەكسپورت كولەمىن ەداۋىر ۇلعايتىپ الدى. كاسىپورىن جىلىنا 85 مىڭ توننا مارمەلاد, شوكولاد, كارامەل, پەچەنە, كارامەل ونىمدەرىن شىعارادى. «بايان سۇلۋ» وندىرەتىن تاتتىلەردىڭ ءتۇرىن تۇستەپ, اتىن اتايتىن بولساق, 350-ءدىڭ ۇستىنە شىعىپ كەتەدى. فابريكا ونىمدەرىنىڭ 60 پايىزعا جۋىعى ىشكى نارىقتى قامتاماسىز ەتسە, 43 پايىزى ەكسپورتقا جونەلتىلەدى.
– 2014 جىلى بيسكۆيت تسەحىندا بىرنەشە جاڭا جەلى ىسكە قوسىلدى. بۇگىندە ءبىزدىڭ تسەح ايىنا 400 توننادان استام ۆافلي شىعارادى. ءونىمنىڭ ءبىراز بولىگىن وزبەكستان, ازەربايجان, گرۋزيا, رەسەي ەلدەرىنە جىبەرەمىز. ءار ەلدىڭ قالاۋى ءار ءتۇرلى. مىسالى, رەسەيگە نەگىزىنەن اراحيس ارومات پەن ارتەك ونىمدەرىن جونەلتەمىز. ال وزبەكستانعا قۋىرىلعان اراحيس پەن قانت قوسىلعان توعىز قاباتتى «تسيرك» ءۆافليى ۇنايدى. وندىرىستىك جەلى اۆتوماتتى رەجىمدە جۇمىس ىستەيدى, – دەيدى بيسكۆيت تسەحىنىڭ باس تەحنولوگى اليسا گاليموۆا.
بۇگىندە «بايان سۇلۋدا» 2 مىڭنان استام ادام جۇمىس ىستەسە, سونىڭ 80 پايىزى – قىز-كەلىنشەكتەر. ولاردىڭ ايلىق ەڭبەكاقىسى – 150-200 مىڭ تەڭگەنىڭ ارالىعىندا. فابريكا ءوز جۇمىسشىلارىن الەۋمەتتىك قولداۋ جاعىنان كوپتەگەن كاسىپورىنعا ۇلگى بولىپ وتىر.
– «بايان سۇلۋدا» 11 جىلدان بەرى جۇمىس ىستەپ كەلەمىن. جالاقىمىز جاقسى, ۋاقتىلى الىپ وتىرامىز. بەس كۇن جۇمىس ىستەيمىز. فابريكانىڭ ءوز اسحاناسى بار, تاماعى ءدامدى ءارى ارزان. مىسالى, قالانىڭ اسحانالارىندا مىڭ-مىڭ جارىم تەڭگە تۇراتىن استى ءبىز مۇندا 150-250 تەڭگەگە ىشەمىز. ءوزىمىزدىڭ قىزمەتتىك اۆتوبۋس بار, جۇمىسقا تەگىن اكەپ, ۇيگە تەگىن اپارىپ تاستايدى. باس عيماراتىمىزدا مەديتسينالىق ءبولىم جۇمىس ىستەپ تۇر. سوندىقتان وسىندا تەگىن ءتىس ەمدەتىپ, فيزيوتەراپيادان ءوتىپ, قانتقا قان تاپسىرۋعا بولادى. ۇجىمنىڭ دەنى ايەلدەر بولعان سوڭ, جەكە گينەكولوگيا كابينەتى جۇمىس ىستەيدى. كوپ كاسىپورىنداردا مۇنداي قولداۋ جوق. وسىندا بىرگە جۇمىس ىستەپ ءجۇرىپ, جاراسىپ, باس قوسىپ, شاڭىراق كوتەرىپ جاتقان جاستار كوپ. باسشىلىق ولارعا دا قوماقتى مولشەردە قارجىلاي كومەك كورسەتۋدى داستۇرگە اينالدىرعان. بالالارىمىز جازعى دەمالىس ماۋسىمىندا 10-15 كۇنگە دەمالىس ورىندارىنا بارىپ, تىنىعىپ قايتادى. لاگەر اقىسىنىڭ 80 پايىزىن فابريكا تولەيدى. مۇندا ەرىنبەي ەڭبەك ەتكەن ادامعا قولداۋ كوپ. مىسالى, ءوز باسىم لاۋازىمىم بويىنشا سوڭعى 4 جىلدىڭ ىشىندە قاتارداعى جۇمىسشىدان شەبەر كومەكشىسى, اۋىسىم شەبەرى بولىپ بىرنەشە ساتى ورلەپ, قازىر تسەح باستىعىنىڭ مىندەتىن اتقارىپ جاتىرمىن. ماعان جۇكتەلگەن جاۋاپكەرشىلىك وتە جوعارى. تسەحتا 150 ادام جۇمىس ىستەيدى. بىرنەشە وندىرىستىك جەلى بار. ولاردىڭ توقتاۋسىز جۇمىس ىستەۋىن باقىلاپ, تەحنيكالىق قاۋىپسىزدىكتى قامتاماسىز ەتەمىن, – دەيدى №1 بيسكۆيت تسەحىنىڭ باستىعى سايىن تالاپ ۇلى.
پاندەميا كەزىندە رەسەيمەن ەكى اراداعى شەكارا جابىلىپ, ەكى ەل اراسىندا كەلىمدى-كەتىمدى جولاۋشىلاردىڭ سيرەپ كەتۋى, سونداي-اق تويدىڭ تولاستاپ قالۋى كونديتەرلىك ونىمدەردىڭ وتىمىنە دە كەرى اسەرىن تيگىزدى. بۇرىن «بايان سۇلۋدىڭ» فيرمالىق دۇكەندەرى قوستانايعا قىدىرىپ كەلگەن رەسەيلىك مەيمانداردىڭ ۇزىن-سونار كەزەگىنەن ارىلمايتىن. قازىر مۇنداي كەزەك جوق, سوندىقتان سوڭعى ەكى جىل ىشىندە سىي-كادە ەسەبىندە جۇرەتىن باعالى تاتتىلەردىڭ ءوتىمى ءتۇسىپ كەتتى. ەسەسىنە, پەچەنە, ۆافلي, ارزان كارامەلدەر مەن كامپيتتەردىڭ, ياعني جەرگىلىكتى حالىق تۇتىناتىن ونىمدەر كوپ ساتىلا باستادى.
ال قازىرگىدەي شەكارا بىرتىندەپ اشىلىپ, دۇكەندەر قالىپتى جۇمىس تارتىبىنە كوشىپ, توي-قۋانىشتار دا كوبەيە باستاعان ساتتە قوستاناي تاتتىلەرىنىڭ دە ساۋداداعى ءوتىمى وسە باستادى. اسىرەسە, ەكسپورت كولەمى ۇلعايدى. كاسىپورىن بىلتىر جالپى ءونىمىنىڭ 43 پايىزىن ەكسپورتتاسا, بيىل دا وسى مەجەنى كوزدەپ وتىر. ءتيىمدىسى سول, ىرگەدە رەسەي تۇر, ياعني بۇل جاقىن جەردە ۇلكەن نارىق بار دەگەن ءسوز. قازىردىڭ وزىندە قوستانايدىڭ كونديتەرلىك ونىمدەرى چەليابى, سۆەردلوۆ, ومبى, بارناۋل, التاي, ءتىپتى تاتارستان مەن ماسكەۋگە دەيىن تولاسسىز جونەلتىلىپ جاتىر. ال ەندى «بايان سۇلۋ» ونىمدەرىنىڭ سىرتقى نارىقتاعى ۇلەسىنىڭ قوماقتى بولۋىنىڭ قۇپياسى نەدە دەيتىن بولساق, بىرىنشىدەن, قوستانايلىق تاتتىلەر ەكولوگيالىق تۇرعىدان تازا ءونىم بولىپ سانالادى. ەكىنشىدەن, ساپاسى جوعارى, ۇشىنشىدەن, ارزان, ياعني قالتاسى جۇقا جۇرتتار دا ساتىپ الا الادى. ماسەلەن, رەسەيدە «كراسنوە-بەلوە» دەگەن ءىرى سۋپەرماركەت جەلىسى بار. ونىڭ قۇرامىنا ەنەتىن 200 دۇكەن اي سايىن 200 توننادان استام «بايان سۇلۋدىڭ» ءاراحيستى جانە شوكولادتى ۆافليلەرىن ساتادى. بۇل ۆافليلەر رەسەي نارىعىندا وتە جوعارى سۇرانىسقا يە. فابريكا باسشىسىنىڭ ايتۋىنشا, سوڭعى كەزدەرى رەسەيلىكتەر قوستانايدان شىعاتىن «قازاقستان» شوكولادىنا دا ۇلكەن قىزىعۋشىلىق تانىتىپ وتىر. ويتكەنى بۇل شوكولادتىڭ قۇرامىندا ەشقانداي قوسپا جوق, ەكولوگيالىق تازا ءونىم سانالادى.