وسكەمەن قالاسىندا قاتتى جەل ءۇش قاباتتى عيماراتتىڭ شاتىرىن ۇشىرىپ اكەتتى, دەپ حابارلايدى Egemen.kz.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, 15 قاراشادا شاھاردا جىلدامدىعى سەكۋندىنا 20 مەترگە دەيىن جەتەتىن جەل تۇرىپ, 30-شى گۆارديالىق ديۆيزيا كوشەسىندەگى كوپقاباتتى عيماراتتىڭ شاتىرىن ۇشىرىپ اكەتكەن. ءتۇرلى مەكەمە كەڭسەلەرى ورنالاسقان نىساننىڭ جالپى اۋدانى 1800 شارشى مەتردى قۇرايدى.
«ابىروي بولعاندا, ەشكىم زارداپ شەككەن جوق. سول جەردە جەرگىلىكتى اتقارۋشى ورگان وكىلدەرىنەن قۇرالعان كوميسسيا جۇمىس ىستەپ جاتىر», دەلىنگەن اقپاراتتا.
تجد ماماندارى وسىعان دەيىن ءوڭىر جۇرتشىلىعىنا داۋىلدى ەسكەرتۋ جاريالاعان بولاتىن. قانداي دا ءبىر قيىندىققا تاپ بولعان تۇرعىندار «112» نومىرىنە حابارلاسۋلارى قاجەت.