قارت كاسپيدىڭ جاعالاۋىنان جەتكەن ونەر كوشى استانا حالقىنا تاماشا تارتۋ جاسادى. ەل تاۋەلسىزدىگىنىڭ 30 جىلدىعى اياسىندا 9-12 قاراشا كۇندەرى نۇر-سۇلتان قالاسى اكىمدىگىنىڭ «جاستار تەاترى» ساحناسىندا نۇرمۇحان ءجانتورين اتىنداعى ماڭعىستاۋ وبلىستىق مۋزىكالىق دراما تەاترىنىڭ گاسترولى ءوتتى.
«جانتوريندىكتەر» ءتورت كۇن بويى جاستار تەاترى تورىندە رەپەرتۋارىنداعى ەڭ ۇزدىك دەگەن تاڭداۋلى قويىلىمدارىن باس شاھار كورەرمەندەرى نازارىنا ۇسىندى. اتاپ ايتساق, ونەر ساپارىنىڭ شىمىلدىعى بەلگىلى اقىن, «قۇرمەت» وردەنىنىڭ كاۆالەرى, «ەرەن ەڭبەگى ءۇشىن» مەدالىنىڭ يەگەرى سۆەتقالي نۇرجاننىڭ «حان كەگى» پوەتيكالىق دراماسىمەن (رەجيسسەرى گ.مەرعاليەۆا) اشىلسا, 10 قاراشا كۇنى ياكۋت رەجيسسەرى سەرگەي پوتاپوۆتىڭ گارسيا لوركا دراماتۋرگياسى نەگىزىندە ساحنالانعان «بەرناردا البانىڭ ءۇيى» دراماسى قويىلدى. ال 11 قاراشادا ورىس تىلىندە قويىلعان رەجيسسەر گۇلسينا مەرعاليەۆانىڭ «ديكيە يستوري 16+» سپەكتاكلى (اۆتورى دون نيگرو), 12 قاراشا كۇنى كينو جانە تەاتر اكتەرى, دراماتۋرگ نارتاي ساۋدانبەك ۇلىنىڭ ء«اليحاننىڭ اماناتى» (رەجيسسەرى گ.مەرعاليەۆا) رەكۆيەم-دراماسى كورسەتىلدى.
نۇرمۇحان ءجانتورين اتىنداعى ماڭعىستاۋ وبلىستىق مۋزىكالىق دراما تەاترى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن 2003 جىلدىڭ 21 ناۋرىزى كۇنى اشىلدى. ەڭ العاش تەاتردىڭ ۇلكەن زالىندا كورەرمەن نازارىنا ع.مۇسىرەپوۆتىڭ «قىز جىبەك» سپەكتاكلى, ەكىنشى زالىندا ت.الىپباەۆتىڭ «توميريس» دراماسى ۇسىنىلىپ, قوس قويىلىم دا جۇرتشىلىق تاراپىنان جوعارى باعالاندى. 2006 جىلى ماڭعىستاۋ وبلىستىق مۋزىكالىق دراما تەاترىنا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى نۇرمۇحان ءجانتوريننىڭ ەسىمى بەرىلدى.
وسى جىلدار ىشىندە ىرگەلى ونەر ۇجىمى ءارتۇرلى جانر, الۋان تاقىرىپتاعى سپەكتاكلدەردى ساحنالاپ, كورەرمەنگە ۇسىنىپ كەلەدى. تەاتر رەپەرتۋارىنداعى الەم ساحنالارىنان ماڭگىلىك ورىن العان ۋ.شەكسپير, ج.مولەر, ف.ەرۆە, ا.چەحوۆ, ن.گوگول, ش.ايتماتوۆ سىندى كلاسسيكتەرمەن قاتار, قازاق دراماتۋرگياسىنىڭ نەگىزىن قالاعان م.اۋەزوۆ, ع.مۇسىرەپوۆ, دراماتۋرگيا سالاسىندا سۇبەلى ساحنالىق تۋىندىلار قالدىرعان ءا.كەكىلباي ۇلى, د.يسابەكوۆ, س.بالعاباەۆ, ە.راۋشانوۆ, كورشىلەس ەلدەر دراماتۋرگتەرىنەن س.احماد, م.بايدجيەۆ, گ.حۋگاەۆ, ز.زاينۋللين, سونداي-اق ماڭعىستاۋ وڭىرىنەن شىققان اقىن, جازۋشىلار – س.نازاربەك ۇلى, س.اداي, س.نۇرجان, س.قۇدايبەرگەنوۆ سەكىلدى باسقا دا اۆتورلاردىڭ تۋىندىلارى بار.
قۇرىلعاننان بەرگى 19 جىل ىشىندە كوپتەگەن ءىرى حالىقارالىق دەڭگەيدەگى فەستيۆالداردان ولجالى ورالىپ كەلگەن جاس تەاتر ءاردايىم قوعامداعى ساياسي-مادەني وزگەرىستەرگە بەيتاراپ قاراماي, ۇنەمى ءوز ءۇنىن قوسىپ كەلە جاتىر. بۇگىندە تەاتردىڭ رەپەرتۋار قورجىنىندا 90-عا تارتا ۇلكەندەرگە ارنالعان, 20-عا جۋىق بالالارعا ارنالعان قويىلىم بار. سونىڭ ءبىر پاراسىن ەلوردا تۇرعىندارى مەن قوناقتارى نازارىنا ۇسىنعان ىزدەنگىش ۇجىم وزدەرىنىڭ قاي كەزدە دە شىعارماشىلىق بابىندا ەكەندىكتەرىن تاعى ءبىر مارتە دالەلدەي ءتۇستى. كورەرمەننىڭ رۋحاني-ەستەتيكالىق تالعام-كوزقاراسىنىڭ قالىپتاسۋىنا ايرىقشا ۇلەس قوسىپ جۇرگەن ونەر ورداسىنىڭ بۇل ساپارى باس شاھار حالقىنا شىن مانىندە تاماشا تارتۋ بولدى.