قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى تۇركى كەڭەسىنىڭ VIII ءسامميتى قارساڭىندا وتكەن تۇركىتىلدەس مەملەكەتتەر ىنتىماقتاستىعى كەڭەسىنىڭ (تمىك) سىرتقى ىستەر مينيسترلەرى كەڭەسىنىڭ وتىرىسىنا قاتىستى, دەپ حابارلايدى Egemen.kz.
جىل سايىنعى مينيسترلىك كەزدەسۋلەردە تۇركى كەڭەسى مەملەكەتتەرى باسشىلارىنىڭ كەزدەسۋلەرى مەن شەشىمدەرىن دايىنداۋدىڭ مازمۇندى جانە ۇيىمداستىرۋشىلىق ماسەلەلەرى تالقىلانادى. وسى كەزدەسۋ بارىسىندا مينيسترلەر مەملەكەت باسشىلارى كەڭەسىنىڭ الداعى وتىرىسىندا قول قويۋ جانە بەكىتۋى جوسپارلانعان كۇن ءتارتىبى مەن قورىتىندى قۇجاتتاردىڭ جوبالارىن كەلىستى. كەزدەسۋ قورىتىندىسى بويىنشا ءسىم باسشىلارى بىرقاتار قۇجاتتاردى, سونىڭ ىشىندە تۇركى كەڭەسى حاتشىلىعىنىڭ قىزمەتى مەن قارجىلىق ماسەلەلەرى, تمىك اقساقالدار كەڭەسىنىڭ ەرەجەسى, تۇركى الەمىنىڭ قالالارىنا بەلگىلى ءبىر مارتەبە بەرۋ جانە ت.ب. قۇجاتتاردى قابىلدادى جانە ولارعا قول قويدى. قازاقستان تاراپى تۇركى الەمىنىڭ رۋحاني استاناسى تۇركىستان قالاسىندا قۇرىلىپ جاتقان «TURANSEZ» ارنايى ەكونوميكالىق ايماعىن تانىستىردى. بۇل ايماق قر پرەزيدەنتى قاسىم-جومارت توقاەۆتىڭ بيىلعى كوكتەمدە تمىك بەيرەسمي تۇركىستان ءسامميتى بارىسىندا باستاماشىلىق ەتكەن بولاتىن. تۇركىتىلدەس مەملەكەتتەردىڭ ىنتىماقتاستىق كەڭەسى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ باستاماسىمەن 2009 جىلى ناحىچەۆان قالاسىندا (ازەربايجان) قۇرىلدى. تۇركى كەڭەسىنىڭ حاتشىلىعى ىستانبۇل قالاسىندا (تۇركيا) ورنالاسقان. 7-ءشى ءسامميتتىڭ قورىتىندىسى بويىنشا وزبەكستان قوسىلعاننان كەيىن كەڭەس مۇشەلەرىنىڭ سانى بەسكە جەتتى (ازەربايجان, قازاقستان, قىرعىزستان, تۇركيا جانە وزبەكستان). تۇرىكمەنستان تمىك باقىلاۋشى مەملەكەت رەتىندە العاش رەت قاتىسىپ وتىر.