Pfizer ۆاكتسيناسىنىڭ 46 800 دوزاسى الماتى قوعامدىق دەنساۋلىق ساقتاۋ باسقارماسىنىڭ قويماسىنا جەتكىزىلدى, دەپ حابارلايدى Egemen.kz.
بۇگىن «كوميرناتي» ۆاكتسيناسى اۋەجايدان قوعامدىق دەنساۋلىق ساقتاۋ باسقارماسى ۆاكتسينالاردىڭ ورتالىقتاندىرىلعان قويماسىنا كەلىپ ءتۇستى. ەندى اتالعان ۆاكتسينا الماتى قالاسىنىڭ بارلىق ەمحانالىق ۇيىمدارىنا بولىنەتىن بولادى.
ء«بىز ۆاكتسينانىڭ تەمپەراتۋرالىق رەجيمنىڭ بارلىق شارتتارىن ساقتاي وتىرىپ جەتكىزىلۋىن باقىلادىق جانە وعان كوز جەتكىزدىك. ءبىز 8 قوراپتا قاپتالعان ۆاكتسينا الدىق. بارلىق قوراپتار زاۋىتتان ۆاكتسينا قويماسىنا دەيىنگى بارلىق جول بويىندا تەمپەراتۋرالىق داتچيكتەرمەن جابدىقتالدى», دەدى ورتالىق قالالىق كلينيكالىق اۋرۋحانا ديرەكتورىنىڭ ينفەكتسيالىق باقىلاۋ ەپيدەميولوگيالىق ماسەلەلەرى جونىندەگى ورىنباسارى ەلۆيرا يبراگيموۆا.
ونىڭ ايتۋىنشا, ۆاكتسينالاۋ ءبىرىنشى كەزەڭدە مەديتسينالىق مەكەمەلەردە, سودان كەيىن مەكتەپتەر مەن جوو-دا وتەدى.
«بارلىعى 46 800 دوزا الدىق. مۇندا ءبىرىنشى جانە ەكىنشى كومپونەنت بار. سوندىقتان ءبىز ولاردى ەكىگە ءبولۋىمىز كەرەك - ءبىرىنشى كومپونەنتتىڭ 23 400 دوزاسى جانە ەكىنشىسىنىڭ 23 400 دوزاسى. ۆاكتسينالاۋ 21-28 كۇن ارالىعىندا جۇرگىزىلەدى», دەدى دەنساۋلىق ساقتاۋ باسقارماسىنىڭ وكىلى.
ۆاكتسينالاۋ توبىنا جۇكتى, بالا ەمىزەتىن ايەلدەر مەن 12 جاستان 18 جاسقا دەيىنگى جاسوسپىرىمدەر جاتادى.
«جۇكتىلىكتىڭ 16-دان 37 اپتاسىنا دەيىن ۆاكتسينا الۋعا بولادى. ال بالا ەمىزەتىن ايەلدەر بالا تۋعان ساتتەن باستاپ 42 كۇننەن كەيىن ۆاكتسينا سالدىرا الادى», دەپ ءتۇسىندىردى دارىگەر.
قويماداعى ۆاكتسينا 60-تان 90 گرادۋسقا دەيىنگى تەمپەراتۋرالىق رەجيمدە ساقتالادى.
«ەمحانالار ۆاكتسينا العان كەزدە تەمپەراتۋرا رەجيمىن وزگەرتەدى. ياعني, ۆاكتسينانى ساقتاۋ تسەلسي بويىنشا + 2, + 8 گرادۋس تەمپەراتۋرادا جۇزەگە اسىرىلادى. بۇل نۇسقاۋلىقتا جازىلعان, ءبىر اي ىشىندە اتالعان ۆاكتسينانى وسى تەمپەراتۋرالىق رەجيمدە ساقتاۋعا بولادى», دەدى ەلۆيرا يبراگيموۆا.