بالىق شارۋاشىلىعى – ەل ەكونوميكاسىنىڭ تابىس كوزى. بۇل سالا قازىر حالىقتى جۇمىسپەن قامتۋ, ەكونوميكانىڭ ەكسپورتتىق الەۋەتىن ارتتىرۋ جانە بيولوگيالىق ارتۇرلىلىكتى كوبەيتۋ جاعىنان دا ماڭىزدى بولىپ تۇر.
ەكولوگيا, گەولوگيا جانە تابيعي رەسۋرستار مينيسترلىگىنە قاراستى بالىق شارۋاشىلىعى كوميتەتى بالىق رەسۋرستارىن تۇراقتى پايدالانۋ ءۇشىن ولاردى ساقتاۋ مەن ءوسىمىن مولايتۋعا باسىمدىق بەرىپ كەلەدى. «بۇل رەتتە ماڭىزدى مىندەتتەردىڭ ءبىرى – تابيعي ءوسىمدى مولايتۋ ءۇشىن جاعدايلار جاساۋ جونىندەگى ءىس-شارالاردى ىسكە اسىرۋ, سونداي-اق قولدان ءوسىرۋ ارقىلى بالىق رەسۋرستارىن ۇلعايتۋ» دەلىنگەن مينيسترلىكتىڭ ءباسپاسوز حابارلاماسىندا.
بۇل جۇمىستاردى اتىراۋ وبلىسىنداعى ەكى بەكىرە بالىق ءوسىرۋ زاۋىتى, قىزىلوردا جانە سولتۇستىك قازاقستان وبلىستارىندا ورنالاسقان قامىستىباس جانە پەتروپاۆل بالىق تالىمباعى قولعا العان. «ولار وسىرگەن قۇندى بالىق تۇرلەرى جىل سايىن بالىق شارۋاشىلىعى سۋ ايدىندارىنا جىبەرىلەدى. ايتالىق, 2021 جىلى قۇندى بالىق تۇرلەرى: بەكىرە, اقساحا, تۇقى جانە وسىمدىكجەمدى بالىعىنىڭ 68 ملن دانا شاباعى قولدان ءوسىرىلىپ, تابيعي مەكەنىنە جىبەرىلدى. سونىمەن قاتار, سۋ ايدىندارىنداعى بالىقتى كوبەيتۋ ءۇشىن كوپتەگەن كاسىپورىندارعا مەملەكەتتىك تاپسىرىستار بەرىلەدى. بۇل مەكەمەلەر اراسىنداعى باسەكەلەستىكتى تۋعىزادى جانە بالىقتى كوبەيتۋگە مۇمكىندىك بەرەدى» دەيدى مينيسترلىك ماماندارى.
بيىل ارال-سىرداريا, بالقاش-الاكول, ەسىل, جايىق-كاسپي جانە نۇرا-سارىسۋ باسسەيندەرىنىڭ سۋ قويمالارىنا 6,3 ملن دانا قۇندى بالىق تۇرلەرىنىڭ شاباقتارى, ونىڭ ىشىندە ءبىر ملن بەكىرە تۇقىمداس شاباق جىبەرىلگەن ەكەن.
جالپى, بيىل مەملەكەتتىك تاپسىرىس شەڭبەرىندە باعالى بالىق تۇرلەرىنىڭ 74,3 ملن دانا شاباقتارى وسىرىلگەن.
بۇعان قوسا, بالىق اۋلاۋ سۋبەكتىلەرى جىل سايىن سۋ ايدىندارىن شامامەن 200 ملن دانا سيرەك كەزدەسەتىن بالىق تۇرلەرىمەن تولىققان.