يسپانيانىڭ «بارسەلونا» فۋتبول كلۋبىنىڭ سۋ جاڭا باس باپكەرى حاۆي كوماندا فۋتبولشىلارىنا قاتاڭ تالاپ قويۋعا نيەتتەنىپ وتىر, دەپ حابارلايدى Egemen.kz.
ونىڭ تالابىنا سايكەس فۋتبولشىلار جاتتىعۋ باستالعانعا دەيىن ءبىر جارىم ساعات بۇرىن بازاعا كەلىپ, جاتتىعۋعا دايىندىق جۇمىستارىن جۇرگىزۋى كەرەك. سونداي-اق ولار تۇسكى جانە كەشكى استى بىرگە ءىشۋى ءتيىس. ال باپكەرلەر شتابىنىڭ مۇشەلەرى جاتتىعۋدان ەكى ساعات بۇرىن بازادان تابىلۋعا مىندەتتى. ودان بولەك كەزەكتى ويىنعا 48 ساعات قالعاندا فۋتبولشىلاردىڭ ۇيىنە كەش بارۋىنا تىيىم سالىنباق. قالا سىرتىنا شىققىسى كەلسە, باپكەردەن رۇقسات سۇرايتىن بولادى. سونىمەن قاتار ءتارتىپتى بۇزعان فۋتبولشىلارعا ايىپپۇل سالىنادى. قايتالانعان جاعدايدا ايىپپۇل كولەمى ارتادى.