قازاقستان قورعانىس مينيسترلىگى ورتالىق سپورت كلۋبىنىڭ سپورتشى-نۇسقاۋشىسى جانسەل دەنيز يسلامابادتا وتكەن «Pakistan Open International Taekwondo (G-1)» حالىقارالىق تۋرنيردە «التىن» الدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
جالپى G-1 دارەجەسىندەگى سايىستا ءتۇرلى ەلدەردەن 500-دەن استام اتلەت قاتىسىپ, 16 جيىنتىق مەدال ويناتىلدى.
«ارميا سپورتشىسى كاسىبي شەبەرلىگىنىڭ جوعارى دەڭگەيىن كورسەتتى. ءتۋرنيردىڭ رەيتينگى بويىنشا قازاقستان قۇراماسى التى التىن مەدال الىپ, جالپىكوماندالىق ەسەپتە ءبىرىنشى ورىنعا تۇراقتادى», - دەدى ورتالىق ارميا سپورت كلۋبى توراعاسىنىڭ ورىنباسارى – شتاتتىق كوماندانى دايارلاۋ ورتالىعىنىڭ باستىعى مايور ءانۋار ۇسەنوۆ.
سايىس وتكەن ەلدەن بولەك, تۋرنيرگە اۋعانستان, البانيا, نەپال, يوردانيا, قازاقستان, ومان, مىسىر, يران, تۇركيا, ماروككو, بىرىككەن اراب امىرلىكتەرى, سالۆادور, حورۆاتيانىڭ ۇزدىك سپورتشىلارى قاتىستى.