قوستاناي وبلىسىندا تابيعي ورتاداعى اۋا مەن سۋدى زەرتتەپ, ونىڭ قۇرامىنداعى زياندى زاتتاردىڭ مولشەرىن انىقتاۋ جۇمىستارى ءجۇرىپ جاتىر. ەكولوگ ماماندار, اسىرەسە, «قوستاناي مينەرالدارى» اق, «توقتار» «مك», «ۆارۆارينسك» اق مەن «برەند» جانە «وركەن» جاۋاپكەرشىلىگى شەكتەۋلى سەرىكتەستىكتەرىنە قاراستى كەن ورىندارىنىڭ ماڭايىنداعى وزەن-كولدەردىڭ لاستانۋ دەڭگەيىن انىقتاۋعا كوپ كوڭىل ءبولىپ وتىر.
وبلىستىق ەكولوگيا دەپارتامەنتىنىڭ مالىمەتىنشە, قوستاناي, ارقالىق, ليساكوۆ جانە جىتىقارا قالالارىندا ورنالاسقان ءىرى كاسىپورىنداردىڭ اينالاسىنداعى اتموسفەرالىق اۋانىڭ لاستانۋىن انىقتاۋ جىل بويى جۇرگىزىلەدى. مۇنداي مونيتورينگ جۇمىستارىنىڭ اياسىندا توبىل وزەنى مەن ونىڭ ايات, شورتاندى, جەلقۋار, وباعان سياقتى سالالارىنداعى, سونداي-اق جوعارعى توبىل, قاراتومار, امانگەلدى سۋ قويمالارىنداعى زياندى زاتتار مولشەرى تەكسەرىلەدى.
تاياۋدا ليساكوۆ قالاسى مەن بەيىمبەت مايلين اۋدانىندا مونيتورينگ جۇمىستارى جۇرگىزىلدى. زەرتحانالىق-ساراپتامالىق باقىلاۋ بولىمىنە قاراستى سىناما زەرتحاناسىنىڭ ماماندارى ليساكوۆتاعى اتموسفەرالىق اۋا قۇرامىن زەرتتەپ, قالانىڭ توبىل, پرومىشلەننايا, گورنياك, جوعارعى توبىل كوشەلەرىندە ورنالاسقان سۋ توراپتارىنداعى شاڭ-توزاڭ مەن ازوت ديوكسيدى, كۇكىرت ديوكسيدى, كومىرتەگى وكسيدى سياقتى زياندى زاتتار مولشەرىن انىقتادى. ال بەيىمبەت مايلين اۋدانىنداعى «ۆارۆارينسك» كاسىپورنىنىڭ اۋماعىندا اتموسفەرالىق اۋا قۇرامىندا شوعىرلانعان تسيانيد مولشەرىن انىقتاۋ جۇمىستارى جۇرگىزىلدى. مامانداردىڭ ايتۋىنشا, مونيتورينگ قورىتىندىسى بويىنشا, اتموسفەرالىق اۋاداعى ازوت ديوكسيدىنىڭ شەكتى مولشەردەن شامالى عانا اسىپ تۇرعانى انىقتالعان. اۋا قۇرامىنىڭ لاستانۋى اۆتوكولىكتەر مەن جىلۋ كوزدەرىنەن شىققان كوك ءتۇتىننىڭ اسەرىنەن بولۋى مۇمكىن دەيدى ەكولوگتەر.
تالداۋ جۇمىستارىن قورىتىندىلاعان ماماندار «ۆارۆارينسك» كەن ورنىن جاناي اعىپ وتەتىن ايات وزەنىنىڭ بويىنداعى باقىلاۋ نۇكتەلەرىندە, سونداي-اق كاسىپورىننىڭ وندىرىستىك اۋماعىنا ورنالاسقان باقىلاۋ ۇڭعىمالارىندا ءتسيانيدتىڭ جوق ەكەنىن ايتىپ وتىر.
ەكولوگتەر وبلىستا تابيعي ورتانىڭ تازالىعىن تەكسەرۋ جۇمىستارى قاراشا اۋعانشا جالعاساتىنىن جەتكىزدى.
قوستاناي وبلىسى