ۇلتتىق قوردىڭ ۆاليۋتالىق اكتيۆتەرى 55,1 ملرد دوللارعا جەتتى. بۇل تۋرالى ۇلتتىق بانك توراعاسىنىڭ ورىنباسارى ءاليا مولدابەكوۆا ايتتى, دەپ حابارلايدى Egemen.kz.
«الدىن الا دەرەكتەرگە سايكەس, ۇلتتىق قوردىڭ ۆاليۋتالىق اكتيۆتەرى وتكەن ايدا شامالى عانا وزگەرىپ, قازاننىڭ سوڭىندا 55,1 ملرد دوللارعا جەتتى. كەپىلدىك بەرىلگەن جانە نىسانالى ترانسفەرتتەردى ءبولۋ ءۇشىن قازاندا ۆاليۋتا نارىعىندا 988 ملن اقش دوللارى سوماسىنا اكتيۆتەر ساتىلدى, بۇل 420 ملرد تەڭگەگە بالاما مولشەردى بىلدىرەدى. بۇل رەتتە, رەسپۋبليكالىق بيۋدجەتتىڭ قاجەتتىلىگىن قاناعاتتاندىرۋ ءۇشىن ۇلتتىق قوردان شامامەن 428 ملرد تەڭگە ترانسفەرتتەر ءبولىندى», دەيدى ول.
سپيكەردىڭ سوزىنشە, قازاندا قورعا تۇسكەن ءتۇسىم 103 ملرد تەڭگە بولدى.
«ەگەر قىركۇيەكتە ءبىز نارىقتارداعى ايتارلىقتاي تۇزەتۋدىڭ كۋاسى بولساق, قازاندا اكتسيالار نارىعىنىڭ قالپىنا كەلۋى جانە ونىڭ ودان ءارى ءوسۋى بايقالدى. ناتيجەسىندە, قازاننىڭ قورىتىندىسى بويىنشا ۇلتتىق قوردىڭ ينۆەستيتسيالىق كىرىسى وڭ قالىپتاستى جانە نەگىزىنەن اكتسيالار مەن التىننىڭ تيىسىنشە 5,69%-عا جانە 3,78%-عا ءوسۋى ەسەبىنەن 871 ملن اقش دوللارىن قۇرادى. ۇلتتىق قوردىڭ اكتيۆتەرىن تەڭگەرىمدى اللوكاتسيالاۋ ەسەبىنەن ينۆەستيتسيالىق كىرىس جىل باسىنان بەرى قالپىنا كەلىپ, 2 ملرد اقش دوللارى نەمەسە 3,44 پايىز بولدى», دەپ ناقتىلادى ءاليا مولدابەكوۆا.
سونىمەن قاتار, ول قاراشا ايىندا اكتسيالاردىڭ ءوسىمى جالعاساتىنىن جەتكىزدى.
«وسىعان بايلانىستى وسى ايدىڭ باسىنان باستاپ ۇلتتىق قوردىڭ ينۆەستيتسيالىق كىرىسى تاعى دا 470 ملن اقش دوللارىنا ءوستى جانە جىل باسىنان باستاپ 2,45 ملرد اقش دوللارى نەمەسە 4,3% بولدى», دەدى ۇلتتىق بانك وكىلى.